Прэм’ер-міністр Беларусі Раман Галоўчанка ўручыў дзяржаўныя ўзнагароды супрацоўнікам МНС і перадаў пажарную аварыйна-выратавальную тэхніку. Урачыстая цырымонія прайшла ў Адукацыйным цэнтры бяспекі МНС, перадае [3] БелТА.
«Выратаванне чалавечага жыцця — складаная, ганаровая і адказная работа, якая патрабуе асаблівай кваліфікацыі і, вядома ж, мужнасці, самаахвярнасці, адвагі. Думаю, усе гэтыя якасці ўласцівыя супрацоўнікам органаў і падраздзяленняў па надзвычайных сітуацыях Беларусі. Краіна ганарыцца вамі, ганарыцца вашай работай. Нашы грамадзяне ведаюць, што супрацоўнікі МНС прыйдуць на дапамогу ў любой сітуацыі. Хачу шчыра падзякаваць вам за вашу працу. Ваша служба складаная, але высакародная», — падкрэсліў Раман Галоўчанка.
Прэм’ер-міністр уручыў супрацоўнікам МНС дзяржаўныя ўзнагароды. У іх ліку медалі «За выратаванае жыццё», якіх удастоены начальнік варты пажарнай аварыйна-выратавальнай часці нумар 2 Наваполацкага гарадскога аддзела па надзвычайных сітуацыях Віцебскага абласнога ўпраўлення МНС Максім Баравіцкі і камандзір аддзялення пажарнай аварыйна-выратавальнай часці нумар 1 Лоеўскага раённага аддзела па надзвычайных сітуацыях абласнога ўпраўлення МНС Барыс Грыцкоў. Таксама Раман Галоўчанка ўручыў ганаровыя граматы Савета Міністраў і падзякі прэм’ер-міністра.
Міністр па надзвычайных сітуацыях Вадзім Сіняўскі ў сваю чаргу ўручыў медаль «За адзнаку ў ахове грамадскага парадку» прапаршчыку ўнутранай службы вадзіцелю Бабруйскага гаррайаддзела па надзвычайных сітуацыях Уладзіміру Ярохіну. Міністр таксама ўручыў пагоны палкоўнікаў унутранай службы.
Раман Галоўчанка адзначыў, што МНС Беларусі сёння — гэта развітая структура, цэлая сістэма папярэджання і рэагавання на надзвычайныя сітуацыі прыроднага, тэхнагеннага характару, забеспячэння пажарнай, радыяцыйнай, прамысловай бяспекі.
«Нашы ратавальнікі неаднаразова даказвалі свой высокі ўзровень на міжнародных спаборніцтвах. Але немалаважнай задачай з’яўляецца таксама ўмацаванне матэрыяльна-тэхнічнай базы органаў і падраздзяленняў МНС. Упэўнены, што новыя ўзоры тэхнікі, якія сёння паступяць, дапамогуць яшчэ больш эфектыўна спраўляцца з усімі пагрозамі і здарэннямі», — сказаў ён.
Прэм’ер-міністр уручыў пасведчанні на 58 адзінак пажарнай аварыйна-выратавальнай тэхнікі. Сярод перададзенай тэхнікі — найбольш запатрабаваныя аўтацыстэрны з вялікім запасам вады (5 і 10 т), якія даюць магчымасць ліквідаваць значную колькасць пажараў без пошуку дадатковых водакрыніц. Палегчаныя і павялічаныя шклапластыкавыя цыстэрны месцяць дастатковую колькасць вогнетушыльных рэчываў, што дазваляе на працяглы час стрымліваць распаўсюджванне ўзгарання. Дзякуючы сучаснай цэнтрабежнай помпе пры неабходнасці забор вады можна вырабляць з пажарнага гідранта або адкрытага вадаёма. Бензінавы генератар забяспечвае бесперабойнае асвятленне месца правядзення аварыйна-выратавальных прац тэлескапічнай мачтай. Мабільная пажарная мотапомпа дазваляе набраць ваду нават з непрыстасаваных крыніц і вадаёмаў, якія не абсталяваны пад’язнымі шляхамі.
Аўтамабілі ўкамплектаваны сучаснай ручной і гідраўлічнай прыладай для правядзення дэблакіровак, вызвалення людзей з-пад завалаў і дэмантажу канструкцый. Наступствы непагадзі можна ўстараняць, выкарыстоўваючы бензапілы і бензарэзы для распілоўкі паваленых дрэў і разборкі пашкоджаных будаўнічых збудаванняў. У наяўнасці носныя і стацыянарная радыёстанцыі, шанцавая прылада і абсталяванне для выратавання людзей на воднай акваторыі.
Ёмістасць кабін дазваляе даставіць да месца здарэння баявы разлік у колькасці 6 чалавек. Канструкцыяй аўтамабільных сядзенняў прадугледжана магчымасць хуткага апранання апаратаў на сціснутым паветры, якія забяспечваюць бесперапынную працу ў непрыдатным для дыхання асяроддзі.
Актыўнае развіццё будаўнічай галіны таксама патрабуе і абароны жыхароў дамоў падвышанай паверхавасці. У падраздзяленні МНС сёння перададзены 32-метровыя аўталесвіцы для правядзення аварыйна-выратавальных работ на вышыні.
Штогод ратавальнікі сотні разоў выязджаюць на пошукі тых, хто заблудзіўся ў лясах. Пошук людзей у экасістэмах патрабуе не толькі асаблівых навыкаў і падрыхтоўкі, але і адпаведнай тэхнікі: сёння ў падраздзяленні перададзены квадрацыклы, мотаўсюдыходы і аўтамабілі пошукава-выратавальных работ.
Раман Галоўчанка таксама азнаёміўся з экспазіцыяй Адукацыйнага цэнтра бяспекі МНС, дзе размешчаны больш за 30 інтэрактыўных навучальных пляцовак па транспартнай бяспецы, бяспецы пры надзвычайных сітуацыях, грамадзянскай абароны, пажарнай і экалагічнай, а таксама крымінальнай бяспекі, здаровага ладу жыцця і небяспечных метэаралагічных з’яў, атамнай і радыяцыйнай, прамысловай бяспекі, аб’яднаных галоўнай мэтай — навучаць насельніцтва спосабам абароны і дзеянням у надзвычайных сітуацыях.
Спасылкі
[1] https://zviazda.by/be/palityka
[2] https://zviazda.by/be/urad
[3] https://www.belta.by/society/view/golovchenko-vruchil-gosnagrady-sotrudnikam-mchs-i-peredal-pozharnuju-avarijno-spasatelnuju-tehniku-480381-2022/
[4] https://zviazda.by/be/tags/raman-galouchanka
[5] https://zviazda.by/be/tags/mns
[6] https://zviazda.by/be/tags/uznagarody