Цікавасць да новабудоўляў не толькі застаецца стабільна высокай, але і з кожным годам узмацняецца. І гэта нягледзячы на існуючыя ў гісторыі негатыўныя моманты, звязаныя з купляй кватэр на стадыі будаўніцтва. Чаму пакупнікі ўкладваюцца ў будаўніцтва, а не выбіраюць больш даступныя па цане і ўжо гатовыя кватэры на другасным рынку? Якія новыя фарматы жылля з'яўляюцца на рынку — аб гэтым у аналітычным матэрыяле кампаніі «Твая сталіца. Кіраванне праектамі».
Час эканамічнай стабільнасці
Канкурэнцыя паміж новабудоўлямі і другасным рынкам назіраецца пастаянна. У залежнасці ад спрыяльнасці эканамічнай абстаноўкі ў краіне яна можа толькі нарастаць або слабець. Напрыклад, лічыць кіраўнік «Твая сталіца. Новабудцэнтр» Наталля Жалава, у крызісныя перыяды колькасць тых, хто адважыўся набыць недабудаваную кватэру некалькі зніжаецца — адбіваецца нежаданне людзей звязвацца з рызыкамі чакання заканчэння будаўніцтва. І наадварот, у перыяд аптымізму, выкліканага няхай невялікім, але ўсё ж ростам заробкаў, і ў цэлым, эканамічнай стабільнасці, усё больш пакупнікоў аддаюць перавагу новабудоўлям.
У апошнія гады больш за 80 % патэнцыйных пакупнікоў жылля разглядаюць новабудоўлі ў якасці альтэрнатывы кватэрам другаснага рынку. Няўжо новае жыллё прыцягвае кліентаў больш нізкім коштам? А вось і не. Гэта адна з распаўсюджаных памылак. І вось чаму.
Згодна з праведзеным кампаніяй даследаваннем, цана, як фактар уплыву на выбар кватэры, мае вагу толькі прыкладна на 20 %. Яна не пераважае над астатнімі фактарамі, такімі як месцазнаходжанне, стадыя будаўнічай гатоўнасці, інфраструктура ў наваколлі і іншае. Для параўнання — аналагічную значнасць мае размяшчэнне дома паблізу станцыі метро.
Да таго ж у цяперашні час розніца паміж коштам кватэры ў новабудоўлі і на другасным рынку ў некаторых выпадках нават стала большая. Гэта значыць, кватэры на другасным рынку ў шэрагу выпадкаў абыдуцца пры куплі танней.
Сітуацыя моцна змянілася
Яшчэ чатыры гады таму, у кастрычніку 2014 года, розніца ў коштах новабудоўляў і кватэр другаснага рынку была больш істотная. Калі параўнаць цэны таго перыяду на кватэры стандартных спажывецкіх якасцяў другаснага рынку і новабудоўлі класа «Эканом», то розніца ў кошце складала ў сярэднім каля 170 долараў за квадратны метр. Гэта дазваляла сэканоміць пры куплі новай аднапакаёвай кватэры ў сярэднім 7 тысяч долараў, двухпакаёвай — 10 тысяч, а трохпакаёвай — 12 тысяч. Пры гэтым пакупнік атрымліваў цалкам новую кватэру, з больш прадуманымі планіроўкамі і запасам трываласці ўсяго дома і яго складнікаў.
Цяпер разрыў у кошце паменшыўся ў сярэднім да 50 долараў за квадратны метр. А з улікам таго, што кватэры ў новабудоўлях, як правіла больш прасторныя, чым аналагічныя па колькасці пакояў кватэры на другасным рынку, то выніковы кошт новабудоўлі можа звесці эканомію на нішто.
Танней, калі на стадыі катлавана
Тады ў чым сакрэт папулярнасці новабудоўляў? Бо кватэры другаснага рынку маюць хоць нейкае аздабленне, а новабудоўлі прадаюцца ў стане «голыя сцены і столь».
— Сёння можна сказаць, што асноўным фактарам цікавасці да новабудоўляў з'яўляецца так званы эфект навізны, — адзначае Наталля Жалава. — Ён грунтуецца на ўсім нам знаёмым імкненні набыць абсалютна новую рэч — кватэру, у якой да нас ніхто не жыў.
Але гэта зусім не значыць, што сэканоміць пры куплі новабудоўлі не атрымаецца. Напрыклад, на эканомію можна разлічваць, калі разглядаць новабудоўлі, якія знаходзяцца на пачатковых стадыях будаўніцтва. Або звярнуць увагу на прыгарадныя жылыя комплексы.
А наконт рамонту хочацца адзначыць, што, напрыклад, большасць кватэр стандартных спажывецкіх якасцяў другаснага рынку пасля куплі таксама запатрабуюць правядзення рамонту. Не заўсёды такога маштабнага, як у выпадку новабудоўлі, але ўсё ж. Акрамя таго, некаторыя пакупнікі робяць рамонт у прынцыпе — купляючы любую кватэру, у якой да іх хтосьці жыў. А ў прыгарадных комплексах зараз можна набыць новабудоўлю з чыстым адстройваннем і па кошце ніжэй, чым кватэра другаснага рынку ў Мінску.
Развітая інфраструктура плюс чыстая зялёная зона
Якія яшчэ фактары ўплываюць на выбар новабудоўлі ў першую чаргу? Пасля цаны, стадыі будаўнічай гатоўнасці дома і месцазнаходжання ўлічваюцца і спецыяльныя ўмовы па аплаце (растэрміноўка і праграмы крэдытавання).
З асаблівасцяў попыту можна вылучыць, што за апошнія некалькі гадоў значна вырасла цікавасць да новабудоўляў сталічнага мікрараёна Уручча, які спалучае ў сабе сучаснасць і экалагічную чысціню. Сярод пакупнікоў гэтых кватэр можна сустрэць як маладыя сем'і, так і людзей ва ўзросце, як адзінокіх прадстаўнікоў ІT-сферы, так і работнікаў сферы культуры. Але ўсіх іх прыцягвае магчымасць карыстацца перавагамі горада і пры гэтым пражываць паблізу экалагічна чыстай зялёнай зоны.
Малапавярховы прыгарад сталіцы
На новы ўзровень выходзяць праекты малапавярховых жылых комплексаў, якія складаюцца ўжо не толькі з таўнхаусаў (шматкватэрныя дамы ў прыгарадзе з асобнымі ўваходамі з вуліцы), а маюць на ўвазе комплекснае напаўненне: кватэры ў сіці-хаусах (гарадскія таўнхаусы) і урбан-вілах (аднапад'ездныя невысокія дамы), дзе асобна стаяць катэджы. У папярэднія гады вопыт вывядзення падобных аб'ектаў быў не вельмі ўдалы, адзначае Наталля Жалава, плошчы дамоў былі неабгрунтавана вялікія (больш за 250 «квадратаў»), а ў наваколлі не прадугледжвалася інфраструктура. У той час як цяпер плошчы дамоў зменшыліся да прымальных для пакупнікоў 140 квадратных метраў, а кватэры ўвогуле можна знайсці плошчай ад 40 «квадратаў». Пры гэтым цана для падобных аб'ектаў «Камфорт» класа застаецца прымальнай. А пры жаданні — пакупнік можа замовіць адразу і чыставое адстройванне.
Падрыхтаваў Сяргей КУРКАЧ
Спасылкі
[1] https://zviazda.by/be/tags/syargey-kurkach
[2] https://zviazda.by/be/ekanomika
[3] https://zviazda.by/be/zhyllyo
[4] https://zviazda.by/be/tags/zhyllyo
[5] https://zviazda.by/be/tags/novabudouli