Арт-галерэя «Сфера» бібліятэкі № 18 запрашае на выстаўку рэпрадукцый карцін Святаслава Рэрыха «Вестка Прыгажосці», арганізаваную ў супрацоўніцтве з аддзяленнем Міжнароднай грамадскай арганізацыі «Міжнародны Цэнтр Рэрыхаў».
Творчы шлях Святаслаў Рэрых пачынаў як партрэтыст і дасягнуў у гэтым жанры вялікага майстэрства. Адной з адметных асаблівасцей яго творчасці было імкненне адчуць характар чалавека, чый партрэт ён пісаў. Святаслаў Мікалаевіч адзначаў: «Мы павінны памятаць, што партрэт, які атрымаўся, — гэта больш, чым проста падабенства». Яго палотны вытанчаныя, лаканічныя, яны дакладна перадаюць духоўна-эмацыянальны вобраз чалавека. Менавіта таму ўвасобленыя на іх людзі выглядаюць такімі жывымі і прыцягальнымі. Толькі партрэтаў свайго бацькі — Мікалая Канстанцінавіча — ён напісаў каля 30. Адзін з іх набыў Люксембургскі музей у Парыжы, калі Святаславу Рэрыху было толькі 35 гадоў.
У творах мастака можна заўважыць уплыў творчасці бацькі. Як прызнаваўся сам Святаслаў Рэрых: «Крыніцы маёй творчасці моцна звязаны з М[ікалаем] К[анстанцінавічам]». Аднак нягледзячы на захаванне традыцый свайго вядомага бацькі, творца знайшоў свой шлях.
Адным з кірункаў дзейнасці Рэрыха-сына былі розныя навуковыя даследаванні ў галіне прыродазнаўства. У аснове гэтай зацікаўленасці было глыбокае філасофскае разуменне прыроды як адзінага цэлага, якое непарыўна звязана з касмічнымі заканамернасцямі. Кола яго інтарэсаў уражвае: арніталогія, батаніка, мінералогія, хімія, астралогія, рэлігіязнаўства, філасофія, мастацтвазнаўства і культуралогія. Менавіта гэтая рознабаковая дзейнасць напоўніла творы майстра глыбінёй і натуралізмам.
Акрамя партрэтнага Рэрых звяртаецца да пейзажнага, эпічнага, жанравага і сімвалічнага жывапісу і ва ўсім праяўляе сябе як віртуозны майстар і смелы эксперыментатар.
З 1931 года Святаслаў Мікалаевіч пастаянна жыў у Індыі, дзе актыўна прымаў удзел у грамадскім і культурным жыцці. Унікальную прыгажосць, разнастайнасць культурных традыцый і вытанчанасць духоўных дасягненняў Індыі Рэрых услаўляў на сваіх палотнах. Таму гонар называць Святаслава Рэрыха сваёй нацыянальнай гордасцю належыць не толькі Расіі, але і Індыі.
У экспазіцыі арт-галерэі «Сфера» дэманструецца 25 рэпрадукцый карцін Рэрыха, якія адлюстроўваюць шматграннасць яго таленту. Наведвальнікі змогуць убачыць як раннія партрэтныя работы, дзе выразна прасочваецца ўплыў акадэмічнай школы, так і больш познія сімвалічныя палотны, створаныя пад уражаннем ад індыйскай прыроды і філасофіі. Асаблівае месца займаюць выявы, прысвечаныя вобразам Усходу — яго краявіды, архітэктура і духоўная атмасфера перададзены з той самай вытанчанасцю і глыбінёй, якія і адрозніваюць почырк мастака. У назве выстаўкі схаваны глыбокі філасофскі сэнс, блізкі погляду Святаслава Рэрыха. Мастак быў перакананы, што сапраўдная прыгажосць — гэта не толькі эстэтычная катэгорыя, але і духоўная сіла, здольная змяняць чалавека і свет. Далучаючыся да творчасці Рэрыха, наведвальнік атрымлівае магчымасць не толькі пазнаёміцца са спадчынай выдатнага майстра, але і адчуць сябе часткай агульначалавечага культурнага працэсу.
