З 15 да 24 жніўня на Жлобіншчыне па ініцыятыве Гомельскага дзяржаўнага мастацкага каледжа пры падтрымцы галоўнага ўпраўлення культуры 

Гомельскага аблвыканкама адбыўся Першы міжнародны жывапісны пленэр «Фарбы маёй зямлі».

Яго ўдзельнікі — члены Беларускага саюза мастакоў — з Мінска, Магілёва, Гомеля, Жлобіна, Саюза мастакоў Расіі — з Санкт-Пецярбурга, Смаленскай, Бранскай і Калужскай абласцей, выкладчыкі згаданага каледжа, настаўнікі ДШМ —стваралі свае карціны на берагах Дняпра (у Жлобіне і Стрэшыне) і Добысны (у Чырвоным Беразе).

Па выніках пленэру ў Жлобінскім гісторыка-краязнаўчым музейным комплексе прайшла двухдзённая выстаўка работ. Адкрываючы яе, кіраўнік гэтага праекта, дырэктар Гомельскага дзяржаўнага мастацкага каледжа Алена Зейбек адзначыла:

— Пленэр дазволіў мастакам атрымаць велізарны зарад творчай энергіі, бо Жлобінская зямля славіцца сваёй непаўторнай прыгажосцю.

А мастакі з Санкт-Пецярбурга Іван Тупейка і Яўгенія Даўлетшына падкрэслілі:

— Беларуская зямля, у тым ліку і Жлобіншчына, нас захапіла! Мы сюды абавязкова вернемся.

Начальнік аддзела культуры Жлобінскага райвыканкама Вячаслаў Паборцаў падзякаваў удзельнікам пленэру за тое, што яны выбралі для сваёй творчай камандзіроўкі менавіта Жлобіншчыну і праславілі яе ў сваіх новых работах. 

Ён уручыў Алене Зейбек падзячны ліст аддзела.

Удзельнікам гэтага незвычайнага мастацкага пленэру быў і жлабінчанін, старшыня Гомельскай абласной арганізацыі Беларускага саюза мастакоў Леанід Вялічка. Сваю карціну, напісаную на берагах Добысны, ён выра-

шыў падарыць Жлобінскаму гісторыка-краязнаўчаму комплексу.

Мікалай ШУКАНАЎ

Фота аўтара