Абараніць дзяцей ад цацак

Абарона правоў і інтарэсаў дзяцей заўсёды была і застаецца адной з найважнейшых задач нашай дзяржавы, заявіла член Пастаяннай камісіі па ахове здароўя, фізічнай культуры, сямейнай і маладзёжнай палітыцы Палаты прадстаўнікоў Святлана Адзінцова. «Мы імкнёмся забяспечыць іх якаснае, усебаковае развіццё, адукацыю, выхаванне, і самае галоўнае — каб усё гэта адбывалася ў абстаноўцы, бяспечнай для жыцця і здароўя кожнага маленькага грамадзяніна нашай краіны. Усё гэта робіцца з разуменнем: ад таго, якім будзе падрастаючае пакаленне, залежыць будучыня краіны. 

Павысіць эфектыўнасць мер, якія прымаюцца дзяржавай, па абароне правоў дзяцей закліканы праект закона „Аб змяненні законаў па пытаннях забеспячэння правоў дзяцей“. 
Ключавое месца ў праекце займаюць нормы, якія прадугледжваюць стварэнне дадатковых прававых механізмаў, якія ўзмацняюць гарантыі рэалізацыі правоў і законных інтарэсаў дзяцей ва ўсіх сферах іх жыцця. Значная ўвага ўдзяляецца ўдасканаленню абароны дзяцей ад інфармацыі, якая наносіць шкоду іх здароўю і развіццю», — расказала яна.

Па вялікім рахунку гэты заканадаўчы акт — адказ на тыя выклікі, якія сёння адчувае неакрэплае маладое пакаленне, упэўнены старшыня Пастаяннай камісіі па ахове здароўя, фізічнай культуры, сямейнай і маладзёжнай палітыцы Палаты прадстаўнікоў Валерый Малашка. «У першую чаргу гэтыя выклікі ляжаць у інфармацыйнай бяспецы. Навелы закона прадугледжваюць адказнасць бацькоў за абарону ад дэструктыўнага ўплыву інтэрнэту. Яшчэ адна важная навела абароніць дзяцей ад цацак. У першую чаргу гэта тыя цацкі, якія з’яўляюцца прайграваннем камп’ютэрных гульняў і фільмаў, тыя вобразы, якія чужыя нашаму ўспрыманню і дэструктыўна ўздзейнічаюць на псіхіку і здароўе дзіцяці. Маркіруючы гэтыя цацкі ў адпаведнасці з узростам, мы даём права выбару бацькам набываць альбо не набываць іх», — рэзюмаваў ён. Законапраектам таксама прадугледжана, што наймальнікі, юрыдычныя асобы і індывідуальныя прадпрымальнікі маюць права арганізоўваць і праводзіць псіхалагічнае сумоўе з асобамі, якія плануюць пастаянна працаваць ці ўжо працуюць з дзецьмі.

Будзем з бульбай!

Пытанні харчовай бяспекі нашай дзяржавы, фарміраванне стабілізацыйных фондаў тавараў, вытворчасць якіх носіць сезонны характар, а таксама пытанні збалансаванасці спажывецкага рынку, забеспячэнне патрэб унутранага рынку айчыннай плодаагародніннай прадукцыяй у міжсезонны перыяд неаднаразова былі прадметам абмеркавання на ўзроўні кіраўніка дзяржавы, заўважыла старшыня Пастаяннай камісіі па заканадаўстве Палаты прадстаўнікоў Марына Лянчэўская. «Гэтай вясной беларусы нечакана сутыкнуліся з дэфіцытам добрай бульбы ў магазінах, — нагадала яна. — У развіццё гэтай тэмы 11 чэрвеня Прэзідэнтам был падпісаны Указ № 232, які рэгулюе асаблівасці пастаўкі плодаагародніннай прадукцыі для рэспубліканскіх дзяржаўных патрэб. Дакумент накіраваны на забеспячэнне яшчэ большай стабільнасці на спажывецкім рынку і гарантаваную бесперабойную наяўнасць якасных пладоў і агародніны ў крамах у міжсезонны перыяд».

У мэтах выканання гэтага прадпісання Пастаяннай камісіяй быў падрыхтаваны ініцыятыўны законапраект «Аб змяненні кодэксаў па пытаннях адміністрацыйнай адказнасці». «Мяркуецца ўвесці адміністрацыйнае спагнанне ў дачыненні да пастаўшчыка за непастаўку альбо недапастаўку плодаагародніннай прадукцыі па дагаворах пастаўкі такой прадукцыі з стабілізацыйных фондаў тавараў у гандлёвыя сеткі, а нарыхтоўшчыкаў — за адсутнасць у рэалізацыі такой прадукцыі. У Кодэкс аб адміністрацыйнай адказнасці будзе ўнесены новы артыкул 13.12-1. За гэтыя правапарушэнні мяркуецца адміністрацыйнае спагнанне ў выглядзе штрафу ад 5 да 12 базавых велічынь, а для юрыдычных асоб — ад 20 да 200 базавых велічынь. Мяркуем, што гэтыя меры змогуць упарадкаваць працу гандлёвых сетак, ліквідаваць наяўнасць таварнага дэфіцыту і, самае галоўнае, забяспечыць жыхароў якаснай сацыяльна значнай плодаагародніннай прадукцыяй, асабліва ў міжсезонны перыяд», — падагульніла дэпутат.

Для фарміравання рынку адпаведных паслуг

У сучасных эканамічных і знешнепалітычных умовах роля аўдыту як інструмента забеспячэння фінансавай бяспекі суб’ектаў гаспадарання і дзяржавы ў цэлым пастаянна ўзрастае, запэўніла член Пастаяннай камісіі па эканамічнай палітыцы Палаты прадстаўнікоў Вольга Жук. «Улічваючы гэту тэндэнцыю, карэкціроўка механізмаў ацэнкі добрасумленнасці аўдытараў і іх адпаведнасці патрабаванням прафесійнай этыкі, замацаванне мер па недапушчэнні здзяйснення дзеянняў, якія наносяць шкоду дзяржаве, з’яўляецца своечасовай і аб’ектыўна неабходнай мерай для вызначэння дзейсных механізмаў абароны правоў і законных інтарэсаў дзяржавы і арганізацый, якім аказваюцца паслугі ў сферы аўдыту», — падкрэсліла яна.

Законапраект «Аб змяненні Закона «Аб аўдытарскай дзейнасці» накіраваны на ўніфікацыю заканадаўства ў рамках ЕАЭС у сувязі з той работай, якая праводзіцца па фарміраванні адзінага рынку адпаведных паслуг. Такі крок дасць магчымасць павысіць якасць аказання медыцынскіх паслуг, забяспечыць абарону інтарэсаў дзяржавы і суб’ектаў гаспадарання. «Прымаючы ў першым чытанні законапраект, мы падкрэслівалі значэнне тэмы якасці паслуг у сферы аўдыту, важнасць дадзенага інстытута для дзяржавы і бізнес-супольнасці, грамадскую значнасць прафесіі аўдытара», — дадала Вольга Жук.

Таксама падчас сесіі было ратыфікавана Пагадненне аб падрыхтоўцы кадраў для пенітэнцыярных службаў дзяржаў — удзельніц СНД. Як адзначыў першы намеснік міністра ўнутраных спраў, начальнік міліцыі грамадскай бяспекі Юрый Назаранка, адным з прыярытэтных кірункаў удасканалення дзейнасці членаў Савета з’яўляецца належнае кадравае забеспячэнне спецыялістамі з неабходнымі профільнымі кампетэнцыямі.

Данііл ХМЯЛЬНІЦКІ

Фота: БелТА