Кіраўнік беларускага ўрада адзначыў, што такое маштабнае міжнароднае мерапрыемства — гэта ўнікальная пляцоўка, дзе прадстаўнікі дзяржаўнай улады, бізнесу і экспертнай супольнасці абменьваюцца думкамі, дзеляцца вопытам, знаходзяць шляхі вырашэння сумесных задач у розных сферах дзейнасці. Ён падкрэсліў, што высокая цікавасць да ўдзелу ў форуме пацвярджае рэальную запатрабаванасць такіх мазгавых штурмаў і выказаў упэўненасць, што многія з удзельнікаў прыбылі сюды з папярэднімі дамоўленасцямі, ідэямі па актывізацыі супрацоўніцтва, укараненні новых форм і метадаў работы.

— Беларусь у аснову сваёй знешняй палітыкі ставіць «эканамічную дыпламатыю», у аснове якой спрашчэнне працэдур гандлю, імкненне выбудаваць узаемавыгадную мадэль супрацоўніцтва з усімі дзяржавамі, — акцэнтаваў увагу Аляксандр Турчын.- На аснове названых прынцыпаў будуецца і інтэграцыйнае ўзаемадзеянне ў рамках ЕАЭС, якое за мінулыя 10 гадоў прынесла прыкметныя вынікі і стала важным інструментам развіцця для ўсіх дзяржаў-членаў, у тым ліку і для Рэспублікі Беларусь. Так, з 2015 па 2024 год экспарт Беларусі ў краіны ЕАЭС вырас больш чым у 2,5 раза. 

Паводле яго слоў, за 10 гадоў у рамках ЕАЭС аб’ём прамысловай вытворчасці Рэспублікі Беларусь павялічыўся амаль на 20 працэнтаў і склаў 62 млрд.долараў. 

— Пры гэтым беларускі бок неаднаразова заяўляў аб неабходнасці прыняцця дзейсных мер, накіраваных на ўмацаванне тэхналагічнага суверэнітэту ЕАЭС, — падкрэсліў Прэм’ер-міністр.- Аб’яднаўшы нашы ўнікальныя кампетэнцыі, мы зможам стварыць эксклюзіўную прадукцыю, дасягнуць яшчэ большага эфекту. Выкарыстанне гэтых патэнцыялаў павінна стаць задачай стратэгічнага развіцця Саюза.

Прэм’ер-міністр Беларусі адзначыў, што нашай краіне ёсць што прапанаваць Еўразійскім партнёрам:

— Мы валодаем значным вопытам у машынабудаванні, нафтахіміі, дрэваапрацоўцы, развіцці аграпрамысловага комплексу. 

Ён нагадаў, што Беларусь уваходзіць у лік лідараў па вытворчасці кар’ерных самазвалаў гандлёвай маркі «БЕЛАЗ»:

— Адна з іх мадэляў занесеная ў Кнігу рэкордаў Гінеса як самы вялікі аўтамабіль. Сёння вы можаце бачыць яго на пляцоўцы перад выставачным цэнтрам, як і ўзоры тэхнікі беларускіх машынабудаўнікоў.

Аляксандр Турчын падкрэсліў: беларускія тавары ў ЕАЭС даўно добра ведаюць і любяць, а брэнд «Зроблена ў Беларусі» стаў для многіх сінонімам якасці:

— І мы маем намер свой аўтарытэт у гэтым пытанні падтрымліваць. 

 Беларусь уносіць важкі ўклад і ў забеспячэнне харчовай бяспекі ЕАЭС:

— У 2024 годзе намі экспартавана прадукцыі на суму каля 7 мільярдаў долараў. Доля нашай краіны ва ўзаемным гандлі Саюза харчовымі таварамі перавышае 40 працэнтаў. Мы заўсёды гатовыя гарантаваць пастаўкі якаснага беларускага харчавання на рынкі партнёраў па ЕАЭС. 

 Яшчэ адзін напрамак, на якім акцэнтаваў увагу Прэм’ер-мінсітр стаў ІТ-сектар:

— Наша краіна ўваходзіць у лік сусветных лідараў па экспарце IT-паслуг на душу насельніцтва. Мабільныя дадаткі, створаныя рэзідэнтамі Беларускага Парка высокіх тэхналогій, выкарыстоўвае звыш 1 мільярда людзей больш чым у 190 краінах свету. 

• Ён выказаў гатоўнасць беларускага боку да актыўнага ўдзелу ва ўзгадненні лічбавых палітык дзяржаў — членаў ЕАЭС, развіцці кібербяспекі і абароны ад лічбавых пагроз, стымуляванні інавацый і падтрымцы стартапаў у сферы інфармацыйных тэхналогій.

Гаворачы аб выбары тэмы форуму, Аляксандр Турчын канстатаваў не выпадковасць яе выбару: 

— Прэзідэнт Беларусі ў звароце да кіраўнікоў дзяржаў ЕАЭС адзначыў, што бягучы 2025 год з’яўляецца знакавым: завяршаючы пяцігодку рэалізацыі стратэгічных напрамкаў развіцця еўразійскай інтэграцыі, мы фарміруем падмурак для паспяховага старту новага этапу, закладзенага ў дэкларацыі «Еўразійскі эканамічны шлях».

Ён звярнуў увагу на тое, што гэтыя два дакументы лепш за ўсё адказваюць на галоўныя пытанні аб выніках і перспектывах інтэграцыйнага будаўніцтва на еўразійскай прасторы.

— Дыялог аб стратэгіі Еўразійскай эканамічнай інтэграцыі, яе выніках і перспектывах дазволіць дзяржавам-членам зверыць гадзіннікі для далейшага сумеснага руху наперад,- выказаў упэўненасць Прэм’ер-міністр і пажадаў удзельнікам форуму плённай працы і паспяховых перамоў.

Вольга АЛЯКСАНДРАВА.