Удзельнікі семінара азнаёміліся з падыходамі ў ахове працы на месцы. У прыватнасці, работнікі гаспадаркі падзяліліся вопытам у арганізацыі рабочага працэсу ў рамонтных майстэрнях і на палях, а таксама метадамі арганізацыі харчавання для работнікаў сельскай гаспадаркі. Супрацоўнікі хуткай дапамогі паказалі, як аказваць першую дапамогу людзям пры розных траўмах: цеплавых і сонечных апёках, цеплавым удары, а таксама ў выпадку падзення работніка.

Супрацоўнікі ДАІ нагадалі аб важнасці захавання Правіл дарожнага руху, расказалі аб найбольш распаўсюджаных парушэннях, якія могуць прывесці да ДТЗ. Яны таксама падказалі, як пазбегнуць парушэнняў пры эксплуатацыі тэхнікі. Супрацоўнікі МНС нагадалі аб неабходнасці захавання мер пажарнай бяспекі падчас уборкі ўраджаю. Яны расказалі аб парадку дзеянняў у выпадку пажару і ўзгарання ў месцах уборкі і пры эксплуатацыі тэхнікі і абсталявання.

— Вельмі важна, каб уборачная кампанія прайшла без здарэнняў, а гэта магчыма, калі ўсе будуць выконваць правілы аховы працы і прытрымлівацца іх. Для агульнага спакою ўся тэхніка ў гаспадарцы застрахавана, работнікі таксама ходзяць у форме і спецыяльным абутку, — адзначыў старшыня Навагрудскага райвыканкама Сяргей Чаркоўскі.

Міністэрства працы і сацыяльнай абароны абвясціла 2025-ы годам бяспечнай працы ў сельскай гаспадарцы, расказаў галоўны тэхнічны інспектар Гродзенскай абласной прафсаюзнай арганізацыі Беларускага прафсаюза работнікаў аграпрамысловага комплексу Віталь Крыштопік:

— У прыярытэце — забеспячэнне бяспекі працы. Неабходна своечасова выяўляць патэнцыяльныя пагрозы для супрацоўнікаў і прымаць меры для іх прадухілення ці мінімізацыі. Для гэтага выкарыстоўваюцца сродкі індывідуальнай аховы, а таксама бяспечныя прылады, абсталяванне і метады працы.

Бяспеку на ўборцы павялічвае і ўдасканаленне тэхнікі. Мікалай Дарашкевіч працуе на палях ужо 44 гады. За гэты час ён паспеў пабываць на борце вялікай колькасці тэхнікі.

— Якасць тэхнікі мінулых гадоў нельга параўнаць з сучаснай. Працаваць вельмі камфортна, бяспечна. За гэтыя дзесяцігоддзі многае змянілася ў лепшы бок і адпавядае ўсім сучасным нормам. Шмат гадоў я быў за рулём камбайна, цяпер працую на прэсе для саломы, — падзяліўся супрацоўнік СПК «Нягневічы» Мікалай Дарашкевіч.

Як падкрэсліў Ігар Сарокін, які ўзначальвае камітэт па сельскай гаспадарцы і харчаванні Гродзенскага абласнога выканаўчага камітэта, прадстаўлены вопыт будзе карысны і кіраўнікам профільных упраўленняў рэгіёна.

— Пытанні бяспекі — гэта галоўнае ва ўборачнай кампаніі. Безумоўна, кожны з нас павінен быць уцягнуты ў працэс і імкнуцца да паляпшэння сітуацыі, калі бачыць парушэнні правілаў бяспекі, — адзначыў Ігар Сарокін.

Вераніка КАЗЛОЎСКАЯ

Фота аўтара