У чацвер у Маскве быў дадзены старт новаму саюзнаму праекту «Камяні памяці». Ён прысвечаны беларусам і расіянам, якія гераічна абаранялі легендарную Малую Зямлю (плацдарм у Наварасійску) пад камандаваннем ураджэнца Баранавічаў віцэ-адмірала Георгія Халасцякова. Масквічы сталі першымі сярод ветэранскіх супольнасцяў Расіі, каму перадалі дзевяць асвечаных беларускіх валуноў.

«Камяні Памяці» будуць устаноўлены ў гарадах Расіі, у якіх умацоўвалася марское брацтва беларусаў і расіян, расказаў кіраўнік міжнароднага грамадска-патрыятычнага руху «Марское брацтва непарушнае!» Арсеній Крыцкі.

— Гэтыя камяні — працяг тых помнікаў, якія мы ставілі героям-маракам папярэднія 15 гадоў, мы ўсталявалі каля 40 памятных знакаў у гонар марскіх герояў. Ледніковыя валуны з Беларусі будуць устаноўлены на месцах баёў, у якіх разам змагаліся беларускія і расійскія маракі. Гэта, напрыклад, Наварасійск, Кранштат, Ленінградская вобласць, Краснадарскі край. Мы разлічваем да 27 лістапада, да Дня марской пяхоты, іх устанавіць у памятных месцах, — удакладніў ён.

Асноўнае мерапрыемства новага праекта адбылося ў Дзелавым і культурным комплексе пасольства Беларусі ў Расіі. Арганізатарамі мерапрыемства пры падтрымцы Савета Рэспублікі Беларусі выступілі БРСМ і Усерасійская грамадская арганізацыя марскіх пехацінцаў «Тайфун». У рамках падзеі адбылася ўрачыстая перадача беларускай моладзі марскіх артэфактаў, звязаных з подзвігам маракоў-беларусаў, а таксама выставы карцін марыністаў, якія раней складалі інтэр’ер баявых караблёў савецкага флоту. Гэтыя экспанаты папоўняць музеі школ і гістарычных клубаў Беларусі. 

Паводле прэс-службы Савета Рэспублікі