Сур’ёзны іспыт
Міжнародная геаграфічная алімпіяда іGeo-2025 сёлета праходзіла ў Бангкоку і сабрала 180 маладых людзей з 47 краін.
Разам з Мікалаем нашу краіну прадстаўлялі Аляксей Клімко (сярэбраны прызёр, сярэдняя школа № 118 г. Мінска імя К. К. Ракасоўскага), а таксама Елізавета Цоўка (гімназія № 1 імя абаронцаў Брэсцкай крэпасці) і Аляксандр Шалкоўскі (Магілёўскі дзяржаўны абласны ліцэй № 1). Кіраўнікамі каманды былі першы прарэктар БДУ Дзмітрый Курловіч і дэкан факультэта геаграфіі і геаінфарматыкі Алена Кальмакова. Выкладчыкі рыхтавалі ўдзельнікаў да інтэлектуальных іспытаў, суправаджалі каманду ў Тайландзе, ствараючы надзейны тыл для кожнага са спаборнікаў.
Сам конкурс складаўся з трох тураў: тэарэтычнага, практычнага і мультымедыйнага. У першым вучні выконвалі заданні, звязаныя з глабальнымі праблемамі і прыроднымі з’явамі: апоўзнямі, спажываннем энергарэсурсаў, міграцыйнымі крызісамі, эфектам «гарадскога вострава цяпла» і іншымі. Заданні патрабавалі глыбокага разумення прыродных працэсаў, а таксама ўмення працаваць са статыстыкай, картамі і спадарожнікавай інфармацыяй.
Практычны тур алімпіяды ўключаў два асноўныя этапы: палявы і камеральны. Спачатку ўдзельнікі выязджалі на востраў Ко Крэт на рацэ Чаўпхрая (на ўскрайку Бангкока), дзе праводзілі даследаванне землекарыстання на пэўным участку тэрыторыі. Акрамя гэтага, неабходна было ацаніць турыстычны патэнцыял мясцовасці, вызначыць лакальныя асаблівасці, вывучыць расліннасць і г. д. На другім этапе — камеральным — удзельнікі апрацоўвалі сабраныя матэрыялы, прапаноўвалі ідэі па вырашэнні выяўленых праблем. Адзін з самых складаных элементаў праграмы — мультымедыйны тэст, у якім было 40 пытанняў па розных цяжкасцях геаграфіі. І з усімі заданнямі Мікалай паспяхова справіўся.
Дарэчы, асаблівасць міжнародных геаграфічных алімпіяд — усе англамоўныя матэрыялы падаюцца без перакладу, што стварае дадатковыя складанасці для ўдзельнікаў і патрабуе высокага ўзроўню падрыхтоўкі, у тым ліку і ў частцы валодання замежнай мовай.
Міжнародная алімпіяда патрабуе ад удзельнікаў не толькі ведаў, але і гнуткасці мыслення, умення прымаць рашэнні ва ўмовах абмежаванага часу. Маладыя беларусы годна паказалі сябе ва ўсіх турах, праявіўшы як акадэмічную падрыхтоўку, так і ўпэўненасць у сваіх сілах. А Мікалай Місіюк стаў сапраўдным героем спаборніцтваў, якім па праве можа ганарыцца ўся краіна.
Як усё пачыналася...
Вядома, за поспехамі юнака стаяць падтрымка бацькоў і вялікая праца настаўнікаў гімназіі. Вось што расказала яго выкладчыца па геаграфіі Юлія БАГДАСАРАВА:
— З Мікалаем мы з пятага класа. Тады прадмет называўся «Чалавек і свет», і ўжо ў той час было бачна, што хлопчык мае асаблівы падыход да вучобы, глыбокую цікавасць да навакольнага свету. Пачынаючы з сёмага класа, Мікалай актыўна ўдзельнічае і перамагае ў алімпіядах па геаграфіі. Спачатку гэта былі лакальныя спаборніцтвы, потым узровень паступова павышаўся. З кожным годам хлопец удасканальваў свае веды і навыкі, не баяўся новых выклікаў. У дзявятым класе ён атрымаў дыплом другой ступені на рэспубліканскай алімпіядзе. Наступным крокам стала перамога ў дзясятым класе, калі вучань узяў дыплом першай ступені і трапіў на міжнародную алімпіяду.
Юлія Віктараўна адзначыла, што юнак мае даволі грунтоўны досвед міжнародных спаборніцтваў. Так, у мінулым годзе ён стаў абсалютным пераможцам Еўрапейскай геаграфічнай алімпіяды ў Сербіі, ёсць у яго і сярэбраны медаль Міжнароднай геаграфічнай алімпіяды ў Ірландыі. А вось цяпер як заканамерны вынік паступовага развіцця Мікалая — трыумф на міжнародным узроўні ў Тайландзе. І гэта сапраўды так.
— Хлопец — прыклад таго, як настойлівасць і любоў да вучобы могуць прывесці да вялікіх поспехаў. Гэта той выпадак, калі асабістыя інтарэсы і прафесійныя планы цалкам супадаюць, — падкрэслівае педагог.
А яшчэ трэба дадаць, што перамога Мікалая Місіюка — гэта яшчэ і перамога ўсёй нашай сістэмы адукацыі, якая, захаваўшы лепшыя традыцыі савецкага часу і стварыўшы свае, рыхтуе сапраўдных прафесіяналаў і, што надзвычай важна, сапраўдных патрыётаў.
Міхаіл ДАНІЛКОВІЧ
