У першую нядзелю жніўня традыцыйна адзначаецца Дзень чыгуначніка. Каб павіншаваць людзей, намаганнямі якіх мы камфортна пераадольваем адлегласці на цягніку, а таксама азнаёміцца са спецыфікай работы «штаба» лідара нацыянальнай сістэмы перавозак, Старшыня Палаты прадстаўнікоў Ігар СЕРГЯЕНКА наведаў Цэнтр кіравання перавозкамі Беларускай чыгункі і пагутарыў з калектывам.
Беларуская чыгунка — гэта 5,5 тысячы кіламетраў эксплуатацыйнай даўжыні чыгуначных шляхоў, звыш 25 % якіх электрыфікаваны. Штогод айчынныя чыгуначнікі перавозяць больш як 100 мільёнаў тон грузаў. Кожны дзень на больш як 200 чыгуначных станцыях ажыццяўляецца пагрузка звыш 200 тысяч тон грузу. Калектыў Белчыгункі — гэта 60 тысяч супрацоўнікаў, звыш 400 дынастый.
Вытрымка і аператыўнасць
Цэнтр кіравання перавозкамі — структурнае падраздзяленне Беларускай чыгункі, прызначанае для аператыўнага кіравання перавозачным працэсам на ўсёй працягласці беларускай чыгункі. Адным словам, гэта яе «сэрца», дзе прымаюцца важныя рашэнні, накіраваныя на забеспячэнне своечасовасці дастаўкі пасажыраў і грузаў, папярэджанне надзвычайных сітуацый. Больш эфектыўна кіраваць сотнямі цягнікоў дыспетчарам дапамагаюць найноўшыя тэхналогіі. Спецыялісты загадзя папярэдзяць машыніста аб дрэве, якое ў выніку ўрагану апынулася на чыгуначных шляхах, створаць камфортныя ўмовы для таго, каб сустрэчныя саставы размінуліся.
«Сёння па беларускай чыгунцы штодзённа праходзіць каля 1300 цягнікоў, з якіх каля 650 — пасажырскага руху, — адзначыў першы намеснік начальніка службы перавозак Упраўлення Беларускай чыгункі Валерый МАЦКЕЛЬ. — Гэта дазволіла нам у першым паўгоддзі 2025 года перавезці 28 мільёнаў пасажыраў і 45,5 мільёна тон грузу».
Дыспетчар участка «Маладзечна — Асіповічы» Цэнтра кіравання перавозкамі Упраўлення Беларускай чыгункі Міхаіл ФЯСЬКОЎ расказаў, што работа ў дыспетчарскай патрабуе ад спецыялістаў вытрымкі, канцэнтрацыі ўвагі, дысцыплінаванасці, бо на працягу 12 гадзін ім даводзіцца кіраваць працэсам на чыгунцы ў рэжыме рэальнага часу. «Арганізоўваем пропуск цягнікоў і ствараем бяспеку руху на вылучаных участках, — коратка сфармуляваў ён свае задачы. — Нярэдка бываюць няштатныя сітуацыі, калі даводзіцца перадаваць паведамленні ў розныя службы. Напрыклад, траўміраванне чалавека на чыгуначных шляхах або перашкода на чыгуначных шляхах у выніку непагадзі. На ўсё гэта рэагуем аператыўна».
З улікам сённяшніх рэалій
У размове з журналістамі Ігар Сергяенка звярнуў увагу на тое, што работа па кіраванні перавозкамі чыгуначным транспартам арганізавана на высокім арганізацыйным узроўні. «Беларуская чыгунка актыўна развіваецца, мадэрнізуецца, — канстатаваў Старшыня Палаты прадстаўнікоў. — І цяпер праводзяцца работы па далейшай электрыфікацыі асобных участкаў. Рэалізоўваюцца сумесныя мерапрыемствы, рыхтуюцца сумесныя праекты з калегамі Расійскай чыгункі».
Параўноўваючы чыгунку 30—40-гадовай даўнасці з цяперашнім часам, спікер акцэнтаваў увагу на значных пераменах. «Штосутачна на станцыях грузіцца больш як 200 тысяч грузу, перавозіцца звыш 200 тысяч пасажыраў, — канкрэтызаваў ён. — Гэта перавозкі і прыгараднымі цягнікамі, цягнікамі мясцовых зносін, цягнікамі, якія накіроўваюцца ў Расійскую Федэрацыю. Па пэўных прычынах сёння рух на Захад закрыты, але мы заўсёды гатовы да супрацоўніцтва з нашымі суседзямі і партнёрамі».
Ігар Сергяенка назваў Беларускую чыгунку даволі складанай гаспадаркай, якая заўсёды працавала як ваенізаваная структура. «Усе людзі ў форме, але форма — гэта не проста атрыбут, — удакладніў ён. — Форма азначае дакладнасць, стараннасць, сістэмную арганізацыю. Усе цягнікі ў нас ходзяць дакладна па раскладзе: пасажырскія і грузавыя».
Падчас сустрэчы з калектывам Белчыгункі спікер праінфармаваў аб дзейнасці Палаты прадстаўнікоў, спыніўся на актуальнасці шэрагу заканадаўчых рашэнняў. Ігар Сергяенка звярнуў увагу на тое, што закон, які рэгламентуе работу чыгуначнага транспарту, быў прыняты ў 1999 годзе. «Ён фактычна базавы, не мяняўся, — сказаў спікер. — Гэта сведчыць аб стабільнасці ў свой час прапрацаваных нормаў, на якія сёння абапіраюцца ў тым ліку і работнікі, і кіраўнікі чыгуначнага транспарту. Можа быць, наспела неабходнасць унесці пэўныя змены з улікам сённяшніх рэалій — мы гатовы выслухаць вашы прапановы».
Вераніка КАНЮТА
