Ужо зусім хутка школьнікі Беларусі сядуць за вучэбныя парты і пачнуць захапляльнае падарожжа па свеце ведаў. Школы ва ўсю рыхтуюцца да новага навучальнага года: праводзяць рамонт, закупляюць мэблю, абсталяванне, выконваюць генеральныя ўборкі. Уласны карэспандэнт «Звязды» адправілася ў гродзенскую сярэднюю школу № 41 імя А. М. Кузняцова, каб паглядзець, як там рыхтуюцца да першага верасня.

18 тысяч «квадратаў», 84 кабінеты...

Школа знаходзіцца ў мікрараёне Альшанка, адным з самых вялікіх у Гродне. Па меры яго развіцця з’яўляліся новыя сацыяльна значныя аб’екты, адкрыццю школ тут заўсёды былі рады. СШ № 41 расчыніла дзверы перад вучнямі ў 2019 годзе і з’яўляецца адной з самых буйных не толькі ў горадзе, але і ў вобласці. У новым навучальным годзе тут плануюць атрымліваць веды 4000 чалавек, якія вучацца ў дзве змены. Класы вялікія (сярэдняя напаўняльнасць — 28 чалавек), навучаюцца на некалькіх паралелях, напрыклад, у 5 і 7 класах сфарміравана 17 навучальных груп. Усяго сфарміравана 134 клас-камплекты.

Штогод па заканчэнні навучальнага года перад калектывам адкрываецца вялікі фронт работ, бо плошча школы большая за 18 000 м2, а навучальны фонд — 84 кабінеты. Акрамя гэтага, установа адукацыі мае вялікую тэрыторыю: ёсць басейн, сталовая на 450 пасадачных месцаў. Дырэктар школы Алена ШЭЎЧЫК адзначае, што школа з усім спраўляецца дзякуючы згуртаванаму калектыву і ініцыятыўным бацькам, якія з вялікім задавальненнем прымаюць удзел у жыцці ўстановы адукацыі.

— У гэтым плане нам вельмі пашанцавала. Бацькі адказныя, лёгкія на пад’ём. Напрыклад, мы арганізавалі акцыю «Выгадуй кветку». Прапанавалі дзецям і бацькам разам вырасціць кветачкі, якія потым былі б высаджаны на тэрыторыі школы. Гэта ініцыятыва была рэалізавана ў рамках Года добраўпарадкавання. Сёлета на тэрыторыі школы таксама з’явіліся новыя архітэктурныя формы. Калі нехта з дарослых умее праводзіць рамонтныя работы — прапануе дапамогу: штосьці пафарбаваць, паправіць, прыбраць. Акрамя таго, школа мае рахунак, на які можна адправіць ахвяраванні. Маці і таты ахвотна адгукнуліся, усе сабраныя сродкі пайшлі на рамонт. Вядома, вялікую ролю адыграла і бюджэтнае фінансаванне, але тым не менш вельмі прыемна, што і бацькі не засталіся ўбаку. Яны яшчэ і крэатыўныя. У нашай сталовай ёсць вітамінная зона, дызайн якой распрацавала маці аднаго з вучняў. У мінулым годзе бацькі выпускнікоў падаравалі ў актавую залу дадатковае асвятляльнае абсталяванне.

Добры прыклад для дзяцей

Як адзначыла лабарант СШ № 41 і маці другакласніцы Вольга Гедзіч, удзельнічаць у жыцці школы трэба яшчэ і для таго, каб даваць прыклад дзецям. Бо яны вучацца, гледзячы на дарослых. Толькі на сваім асабістым прыкладзе можна паказаць, што добра, а што дрэнна.

— Да таго ж важна, у якіх умовах вучацца нашы дзеці. За навучальны год нешта страчвае прэзентабельны выгляд, здараюцца паломкі. Мы ўсе разам дапамагаем, працуем. І потым, калі бачым вынік працы, адчуваем гонар. Кожны разумее, што школа вельмі вялікая, і ўсё паспець да пачатку навучальнага года складана. Таму рады дапамагчы, — падзялілася Вольга.

• У асноўным будынку патрабаваўся касметычны рамонт: неабходна прыбраць сколы, недзе нешта падфарбаваць. Таксама трэба правесці генеральную ўборку, каб усё было чыста і акуратна. На дадзены момант работы знаходзяцца на завяршальнай стадыі: адрамантаваны 84 навучальныя памяшканні. У трох кабінетах пачатковай школы за кошт уласных сродкаў абнавілі вучнёўскую мэблю. А за кошт бюджэтных сродкаў закупілі яшчэ 80 камплектаў вучнёўскай мэблі.

— У гэтым годзе атрымалі яшчэ адну лінію раздачы ў харчаблок, набылі яе за кошт гарадскога бюджэту. У хуткім часе будзе дастаўлена транспарціровачная стужка для збору бруднага посуду, набытая пры дапамозе мясцовых улад. У планах закупіць два маразільныя куфры і дзве электрапліты пры падтрымцы бюджэту. За кошт уласных сродкаў абнавілі камп’ютарныя крэслы, мышкі і клавіятуры ў камп’ютарным класе, — расказала Алена Шэўчык. Дырэктар дадала, што ў школе пашыраецца інклюзіўнае асяроддзе, каб любое дзіця магло бесперашкодна атрымліваць веды. Гэтыя ініцыятывы таксама рэалізуюцца дзякуючы падтрымцы гарадскіх улад.

Працоўнае лета

Удзел у добраўпарадкаванні школы бяруць не толькі бацькі, але і дзеці, якія працуюць у перыяд летняй занятасці школьнікаў. Як расказала дырэктар, сёлета хлопчыкі і дзяўчынкі актыўна ўдзельнічалі ў рамонтных работах і добраўпарадкаванні школы. Летам былі арганізаваны 4 працоўныя брыгады па 25 чалавек кожная. Акрамя таго, працаваў яшчэ лагер працы і адпачынку, дзе дзеці змаглі не толькі папрацаваць, але і аздаравіцца.

У дзень, калі я наведвала школу, там шчыравалі вучні. Яны з цікавасцю расказвалі пра працоўныя будні. Валерыя Амбражэвіч перайшла ў 9 клас. Яна падзялілася, што праца дапамагла ёй атрымаць новыя навыкі і знайсці сяброў:

— Калі шчыра, хацелася зарабіць свае першыя грошы. Але разам з гэтым я была рада дапамагчы школе, зрабіць яе лепшай напярэдадні новага навучальнага года. На працу ўладкавалася ўпершыню: аб такой магчымасці расказала настаўніца, і я без разважанняў вырашыла папрацаваць. Думаю, за гэты час стала больш дарослай. У наступным годзе яшчэ папрацую.

Не менш эмоцый і ў дзевяцікласніцы Кіры Малахінскай, якая таксама працавала летам упершыню:

— Мы даглядаем кветкі, праводзім уборку, дапамагалі ў бібліятэцы. Гэта вельмі цікавы досвед. Праца дазваляе адчуць сябе дарослай. Будзе прыемна атрымаць свой першы заробак: планую купіць вінілавую пласцінку. Яна будзе для мяне асабліва каштоўнай, бо я сама на яе зарабіла.

Да працоўнага лета далучыўся і Яраслаў Жывушка, які таксама перайшоў у 9 клас:

— Пра падпрацоўку бацькі падказалі, мне ідэя спадабалася. У нас цудоўная брыгада. І вельмі здорава дапамагчы школе, у якой сам вучышся. У першы дзень было нязвыкла і незразумела, але ўжо на другі ўцягнуўся ў працу.

Вядома, чакаю сваю першую зарплату, планую выдаткаваць яе на падрыхтоўку да 1 верасня.

Калектыў у школе малады, сярэдні ўзрост — 35 гадоў. Штогод яго шэрагі папаўняюць маладыя спецыялісты, у мінулым годзе іх было 17. У гэтым таксама чакаецца папаўненне. Дырэктар адзначае, што маладым педагогам дапамагаюць старэйшыя калегі, працуе сістэма настаўніцтва. Такім чынам, школа гатова сустрэць новы навучальны год!

Вераніка КАЗЛОЎСКАЯ

фота аўтара