Нягледзячы на даволі складаныя кліматычныя ўмовы, жніво ў Беларусі набірае абароты. Брэсцкая вобласць пераадолела паказчык па намалоце 500 тысяч тон збожжа. Аб гэтым БелТА паведаміў старшыня камітэта па сельскай гаспадарцы і харчаванні Брэсцкага аблвыканкама Анатоль ШЧУПЛЯНКОЎ.
Выкарыстоўваць кожную магчымасць
«Брэсцкая вобласць першай у краіне намалаціла паўмільёна тон збожжа. На раніцу 1 жніўня ў нас 538 тысяч тон збожжавых і зернебабовых (без рапсу). У рэгіёне ўбрана 35 % плошчаў. Ураджайнасць 46,5 ц/га», — адзначыў Анатоль Шчуплянкоў.
Пяць раёнаў Брэстчыны з’яўляюцца лідарамі па ўраджайнасці. У Баранавіцкім, Ляхавіцкім, Жабінкаўскім, Драгічынскім і Іванаўскім раёнах у сярэднім атрымліваюць 50 і больш цэнтнераў. «Па яравым ячмені ўраджайнасць каля 53 ц/га. Гэта на 16 ц/га вышэй за ўзровень мінулага года», — адзначыў старшыня аблсельгасхарча.
Аграрыі працуюць без аглядкі на надвор’е. Выкарыстоўваюць кожную магчымасць, каб убраць збожжа і пакласці яго ў засекі. «Хлебаробы Брэсцкай вобласці нарошчваюць тэмпы і павялічваюць плошчы ўборачнай», — падкрэсліў Анатоль Шчуплянкоў. Паралельна са жнівом у гаспадарках займаюцца нарыхтоўкай кармоў і падрыхтоўкай да азімай сяўбы.
Імкненне да перамогі
Першым маладым камбайнерам-двухтысячнікам у Гродзенскім раёне стаў Дзяніс Круглікаў — механізатар СВК імя Дзеньшчыкова, паведамілі БелТА ў Гродзенскім абласным камітэце БРСМ.
Гэта ўжо другая перамога маладога камбайнера на жніве-2025. На мінулым тыдні ён прымаў віншаванні з першай намалочанай тысячай тон, і таксама першым з моладзі ў раёне. А летась па выніках уборачнай кампаніі стаў другім у абласным спаборніцтве за дасягненне высокіх паказчыкаў на ўборцы ўраджаю збожжавых і зернебабовых культур сярод старшых камбайнераў маладзёжных экіпажаў.
Дзяніс Круглікаў працуе механізатарам у СВК імя Дзеньшчыкова два гады, сваёй адказнасцю, стараннасцю ў працы, матываванасцю заслужыў
давер і павагу і ў кіраўніцтва, і ў калег. У Луцкаўляны, цэнтральную сядзібу гаспадаркі, Круглікавы прыехалі ўсёй сям’ёй. У аграгарадку ім выдзелілі добраўпарадкаваную кватэру. Жонка працуе медсястрой у мясцовай бальніцы, дачка перайшла ў трэці клас Луцкаўлянскай школы.
«Дзяніс — чалавек з актыўнай жыццёвай пазіцыяй, — так характарызуе хлопца сакратар пярвічнай арганізацыі БРСМ СВК Мікалай ЖУРНЕВІЧ. — Усё, за што бярэцца, што яму даручаюць, робіць з энтузіязмам, заўсёды накіраваны на вынік. Да ўдзелу ў праекце „Моладзь — за ўраджай“ падыходзіць з высокай зацікаўленасцю, тэлефануе, удакладняе свае пазіцыі, імкнецца да перамогі».
Як адзначае суразмоўца, Дзяніс таксама з’яўляецца прыкладам для моладзі ў адносінах да сваёй сям’і і родных. «Круглікавы вельмі дружная сям’я, — кажа Мікалай Журневіч. — Дзяніс з любоўю клапоціцца пра жонку і дачку. У вольны час выбіраецца да бацькоў, каб дапамагчы ім».
Сам лідар маладзёжнага спаборніцтва нешматслоўны. У яго цяпер на рахунку кожная хвіліна: пасля дажджоў, якія не давалі тэхніцы разгарнуцца на палях на ўсю моц, устанавілася сонечнае надвор’е, і яго трэба выкарыстоўваць па максімуме. «Праца ў сельскай гаспадарцы мне па душы, — падзяліўся Дзяніс Круглікаў. — І бацькі, і сваякі — усе аграрыі, і я пайшоў у рэчышчы сямейнай традыцыі.
Вельмі падабаецца і працаваць угаспадарцы, і жыць у вёсцы. Вядома, імкнуся дабіцца перамогі».
Як дапоўніў сакратар пярвічкі БРСМ, у СВК імя Дзеньшчыкова ў рэспубліканскім спаборніцкім праекце «Моладзь — за ўраджай» удзельнічаюць тры камбайнеры ідва кіроўцы. Усе тры камбайнеры ўжо перасягнулі тысячную мяжу па намалотах. А Кірыл Саўчанка стаў першым маладым вадзіцелем, які перавёз 3 тысячы тон збожжавых і зернебабовых культур. Аб гэтым паведаміла афіцыйны прадстаўнік ЦК БРСМ, куратар рэспубліканскага праекта «Моладзь — за ўраджай» Таццяна МАКСІМОВІЧ. Хлопец пабіў свой жа рэкорд — 29 ліпеня ён першы ў краіне перасягнуў мяжу ў 2 тысячы тон.
СВК імя Дзеньшчыкова традыцыйна ў лідарах на жніве. Галоўны аграном Дзмітрый ШЫНТАР паведаміў, што ў гаспадарцы ўбрана больш за палову плошчаў, ураджайнасць збожжавых і зернебабовых складае 87,5 ц/га, намалот — звыш 14 тысяч тон. Завершана ўборка азімага рапсу, яго ўраджайнасць — 64,6 ц/га.
Прафсаюзы на сувязі
Прафсаюзы дапамагаюць работнікам розных прадпрыемстваў вырашыць пытанні з нявыплатай адпускных, матдапамогі і адмовай у пераразліку ў сувязі з перапрацоўкай. Аб гэтым паведамілі ў прэс-службе Федэрацыі прафсаюзаў Беларусі.
Міжгаліновы маніторынгавы цэнтр ФПБ з 1 жніўня змяніў час працы. Усяго з пачатку работы цэнтра (21 мая) паступіла больш за тысячу зваротаў. Задаць сваё пытанне, звязанае з працоўнымі адносінамі, цяпер можна штодня, у тым ліку ў выхадныя і святочныя дні, — з 8.00 да 20.00 па адзіным нумары 8 801 100 1111. Званок бясплатны для абанентаў «Белтэлекама» і мабільных аператараў БеСТ (Lіfe), A1, МТС.
«Ніводнае пытанне не застаецца без увагі. Калі зварот адносіцца да кампетэнцыі прафсаюзаў, даюцца не толькі неабходныя кансультацыі, але і па запыце работніка прадстаўнікі прафсаюзаў выязджаюць у арганізацыю для дэталёвага вывучэння сітуацыі і вырашэння працоўнай спрэчкі. Калі ж пытанне не ўваходзіць у кампетэнцыю прафсаюзаў, спецыялісты цэнтра дапамагаюць сарыентаваць грамадзян, дзе можна атрымаць неабходную кансультацыю. Таксама важным арыенцірам работы цэнтра з’яўляецца аператыўнасць — адказ тым, хто звярнуўся, даецца ў самыя кароткія тэрміны. Дарэчы, пытанні паступаюць ад работнікаў розных сфер дзейнасці з усіх рэгіёнаў краіны», — расказалі ў прэс-службе Федэрацыі прафсаюзаў Беларусі.
Так, у цэнтр звярнуўся работнік аднаго з сельгаспрадпрыемстваў Гомельскай вобласці, якому наймальнік не зрабіў пераразлік у сувязі з перапрацоўкай. Прадстаўнікі прафсаюза правялі перамовы з кіраўніцтвам арганізацыі, і работнік атрымаў належныя выплаты.
Як вядома, у перыяд уборачнай кампаніі прафсаюзы забяспечваюць падтрымку ўдзельнікаў жніва. Спецыялісты гатовы аператыўна адрэагаваць на праблемныя і спрэчныя сітуацыі, звязаныя з умовамі, аплатай працы аграрыяў.
Тым часам
Кліматычныя ўмовы палепшацца
Як будуць складацца ўмовы для ўборачных работ у пачатку жніўня, паведамілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
Паводле звестак аграметэаролагаў, у глебах пад бульбай, караняплодамі і кукурузай запасы вільгаці добрыя. У многіх раёнах Віцебскай, у паўночных і цэнтральных раёнах Магілёўскай і месцамі ў Мінскай вобласці гэтыя паказчыкі павышаныя. Дажджы, якія прайшлі пасля інструментальнага вывучэння сітуацыі спецыялістамі Белгідрамета, яшчэ павялічылі запасы вільгаці.
«Верхні 10-сантыметровы пласт глебы на большай частцы тэрыторыі краіны моцна ўвільготнены, што ўскладняе работу тэхнікі на палях. У пачатку жніўня ўмовы для ўборачных работ на тэрыторыі Беларусі крыху палепшацца — дажджы будуць мець кароткачасовы характар і пройдуць не паўсюдна», — адзначылі ў Белгідрамеце.
Фота БелТА
