З 1 жніўня ў бальніцы, паліклінікі, урачэбныя амбулаторыі і ФАПы па размеркаванні прыбылі каля 2450 выпускнікоў медыцынскіх універсітэтаў, якія працуюць урачамі-інтэрнамі, прыкладна 4000 спецыялістаў з сярэдняй медыцынскай адукацыяй і каля 2,2 тысячы ўрачоў, якія прайшлі інтэрнатуру. Больш за палову выпускнікоў медыцынскіх ВНУ адправіліся ў цэнтральныя раённыя бальніцы, аптэкі і іншыя арганізацыі аховы здароўя, у тым ліку ў сельскай мясцовасці. 40 % урачоў-інтэрнаў накіруюцца ў сталічныя і абласныя медыцынскія ўстановы. Трыццаць чалавек з банка адоранай моладзі размеркаваны ў рэспубліканскія навукова-практычныя цэнтры. 

У параўнанні з мінулым годам у арганізацыі аховы здароўя прыбудзе амаль на 10 % больш маладых медыкаў. Сярод сацыяльных гарантый, якія належаць маладому спецыялісту, шэраг выплат, у тым ліку аднаразовая грашовая дапамога, дапамога на пераезд (калі спецыяліст размеркаваны не па месцы жыхарства), а таксама штомесячныя стымуляцыйныя выплаты, якія ў сістэме аховы здароўя складаюць ад 20 % да 50 % ад акладу. Акрамя гарантаваных дзяржавай бонусаў, наймальнікі і мясцовыя ўлады па-свойму заахвочваюць маладых спецыялістаў. Паглядзелі, як сёлета з гэтым справы на месцах.

Нясвіж: не толькі работа, але і культурны вольны час

У Нясвіжскай цэнтральнай раённай бальніцы сёлета пачнуць працаваць чатыры ўрачы-спецыялісты, тры ўрачы-інтэрны для праходжання інтэрнатуры па агульнай урачэбнай практыцы і сем медыцынскіх сясцёр. У першы працоўны дзень на першым працоўным месцы іх урачыста сустрэлі: павітаць маладых дактароў і медсясцёр разам з кіраўніцтвам ЦРБ прыйшло і кіраўніцтва раёна. Акрамя стандартных надбавак, маладыя людзі, якія прыбылі ў раённы цэнтр на першае рабочае месца, будуць забяспечаны жыллём.

• — Прапануем або арэнднае жыллё, або кампенсуем да 5 базавых велічынь, калі спецыяліст вырашыў арандаваць кватэру. Таксама прапануем пакоі і ложка-месцы ў інтэрнаце. Маецца ў нас і кватэра, якую сёлета якраз зойме адзін з маладых спецыялістаў, — расказвае галоўны ўрач Нясвіжскай цэнтральнай раённай бальніцы Вікторыя ПРАЖЭНІК.

Акрамя таго, падчас работы ў маладых медыкаў ёсць магчымасць удасканальвацца ў прафесіі — прайсці курсы павышэння кваліфікацыі і перападрыхтоўку.

— Калі ёсць неабходнасць у змене першапачатковага месца работы, маецца патрэба ў пэўных спецыялістах, мы накіроўваем урача на перападрыхтоўку. Напрыклад, наш малады хірург выказала жаданне прайсці перападрыхтоўку на эндаскапіста.

Заўсёды ёсць магчымасць у маладых спецыялістаў і падзарабіць. Гэта і дзяжурствы ў прыёмным аддзяленні, а таксама работа ў святочныя і выхадныя дні. Кругласутачныя дзяжурствы арганізаваны для тэрапеўтаў, хірургаў, анестэзіёлагаў-рэаніматолагаў, педыятраў і акушэраў-гінеколагаў.

А каб маладыя медыкі з першых тыдняў адчувалі сябе ў новым калектыве як дома, ім прапануюць удзельнічаць у шматлікіх культурна-масавых мерапрыемствах. У жніўні—верасні, напрыклад, у Нясвіжы праходзіць раённы турыстычны злёт, прафсаюзная арганізацыя набывае білеты на канцэрты, экскурсіі. Па традыцыі восенню ЦРБ праводзіць «Пасвячэнне ў прафесію» — конкурс, дзе маладыя спецыялісты павінны прадэманстраваць сваю тэарэтычную падрыхтоўку, а медсёстры — і практычныя навыкі. А таксама прэзентаваць сябе — расказаць, чаму абралі медыцыну, і падзяліцца ўражаннямі ад першых крокаў у прафесіі. А ў завяршэнні ўсе маладыя людзі атрымліваюць падарункі і сувеніры.

Слонім: падзарабіць на высокатэхналагічных аперацыях

Слонімская ЦРБ сёлета папоўнілася 28 маладымі дактарамі і медсёстрамі. Усім з іх, хто мае патрэбу, прапануюць арэнднае жыллё.

— Летась восем нашых супрацоўнікаў атрымалі арэндныя кватэры, сёлета — яшчэ столькі ж. У канцы жніўня будаўнікі здаюць яшчэ адзін дом з арэндным жыллём, таксама будзем прапаноўваць тым, хто мае патрэбу, — адзначае галоўны ўрач Слонімскай цэнтральнай раённай бальніцы Наталля РЫЗВАНОВІЧ, дадаючы, што, калі малады спецыяліст здымае жыллё, па дагаворы найму яму кампенсуюць частку сродкаў.

Калі медык пасля абавязковага тэрміну адпрацоўкі вырашае застацца на першым рабочым месцы, пры падаўжэнні кантракта атрымлівае дадатковую выплату ў 20 базавых велічынь. Падчас адпрацоўкі маладыя спецыялісты павышаюць сваю кваліфікацыю на адпаведных курсах. Нярэдка прымаюць рашэнне абраць больш вузкую спецыялізацыю. Напрыклад, з агульнай урачэбнай практыкі пераходзяць у дыягнастычныя спецыялізацыі, эндакрыналогію, уралогію і кардыялогію.

— Мы вітаем, калі маладыя спецыялісты выказваюць жаданне ўдзельнічаць у высокатэхналагічных умяшаннях, за гэта прадугледжана заахвочванне, — кажа Наталля Рызвановіч. — Зрэшты, як і за актыўны ўдзел у грамадскім жыцці.

Орша: магчымасці для ўдасканалення

У Аршанскай гарадской бальніцы № 1 імя Сямашкі сёлета сустрэлі восем новых дактароў і 24 прадстаўніцы сярэдняга медыцынскага персаналу. Загадчык бальніцы Вольга ПЯТРАШКА асабіста напярэдадні сустрэлася з усімі маладымі спецыялістамі і паказала іх першыя рабочыя месцы.

— Урачу-рэнтгенолагу я прапанавала ў будучыні прайсці падрыхтоўку і працаваць не толькі на рэнтгенаўскім, але і на апаратах КТ і МРТ. Яна аршанка, у жыллі патрэбы не мае. Пяці маладым дактарам анестэзіёлагам-рэаніматолагам паказалі нашу рэанімацыю, прапанавалі развівацца ў кірунках як анестэзіялогіі, так і рэанімацыі. Адзін малады чалавек прыехаў да нас з Віцебска, другі — з Гомеля, таму прапанавалі ім арэнднае жыллё. Прыйшлі да нас урач-отарыналарынголаг і ўрач-неўролаг. Апошняй на выбар прапанавалі працаваць у аддзяленні інсультаў ці аддзяленні агульнай неўралогіі, яна выбрала другое, бо жадае практыкавацца ў лячэнні рассеянага склерозу, — расказала Вольга Пятрашка, падкрэсліўшы, што за ўсімі маладымі спецыялістамі замацаваны настаўнікі — загадчыкі аддзялення, якія маюць вышэйшую ці першую кваліфікацыйную катэгорыю.

Пастараліся ўлічыць і ўсе пажаданні медыцынскіх сясцёр, якія ў якасці першых рабочых месцаў абралі аперблок, рэанімацыйнае, а таксама аддзяленні неўралогіі, хірургіі і траўматалогіі, лабараторыю.Тым, хто мае патрэбу, дадуць інтэрнат.

Мінск: ад матдапамогі да дадатковага водпуску

25-я гарадская дзіцячая паліклініка 1 жніўня гасцінна сустрэла 2 урачоў-інтэрнаў, урача-стаматолага і ўрача-артапеда, а таксама 4 медыцынскія сястры. Як расказала галоўны ўрач паліклінікі Ганна МАЖАКА, акрамя агульных гарантый і льгот, згодна з калектыўным дагаворам, маладыя спецыялісты маюць права на некаторыя іншыя выплаты, напрыклад, штогадовую матэрыяльную дапамогу, выплату да сямі базавых велічынь пры будаўніцтве індывідуальнага жылля, дадатковы заахвочвальны водпуск працягласцю да 5 дзён, кампенсацыю часткі грашовых сродкаў за найманне жылля.

У тэму

Універсітэт пракантралюе наймальнікаў

Гатоўнасць першых працоўных месцаў для маладых медыкаў і месцы іх пражывання напрыканцы ліпеня кантралявала і кіраўніцтва медыцынскіх ВНУ. Напрыклад, прадстаўнікі адміністрацыі Віцебскага дзяржаўнага медуніверсітэта на чале з рэктарам Аляксеем Чуканавым з гэтай мэтай традыцыйна наведалі медустановы Магілёўскай вобласці. Падчас візіту яны сустрэліся і з працуючымі маладымі спецыялістамі, абмеркаваўшы пытанні адаптацыі, сацыяльна-бытавой і прававой падтрымкі медыкаў, прафесійнага развіцця і падтрымкі з боку ўніверсітэта.

Алена КРАВЕЦ

Фота Канстанціна ДРОБАВА