Цікава, што ў новай мінскай школе, якая пачне функцыянаваць у мікрараёне «Мінск-Мір» (дарэчы, фота да матэрыяла зроблены менавіта там), будуць створаны профільныя класы чыгуначнай накіраванасці. У іншай школе гэтага мікрараёна, што таксама адкрылася нядаўна, навучаюцца будучыя авіятары.
Як адзначылі ў Міністэрстве адукацыі, пашпарты гатоўнасці школ падпісваюцца да 20 жніўня. Старт гэтым мерапрыемствам ужо дадзены.
Сёлета 55,6 тысячы навучэнцаў будуць карыстацца паслугамі бясплатнага падвозу (1,6 тысячы аўтобусаў). У 2025 годзе закупяць 237 новых аўтобусаў — 61 ужо ў парку.
Акрамя таго, да навучальнага года падрыхтаваны 28 абноўленых і новых падручнікаў. Сярод іх — «Асновы бяспекі жыццядзейнасці» для 3-га класа і «Гісторыя Беларусі ў кантэксце сусветнай гісторыі» для 11-га класа.
Будзьце ў курсе!У міністэрстве нагадалі і аб зменах у Кодэксе аб адукацыі з 1 верасня 2025 года.
- Так, цяпер будзе арганізаваны падвоз школьнікаў на экскурсіі, спартыўныя і іншыя выхаваўчыя мерапрыемствы ў межах населеных пунктаў.
- Таксама ў школах у сельскай мясцовасці (пасёлках гарадскога тыпу) і спецыялізаваных ліцэях, Мінскім сувораўскім ваенным вучылішчы, кадэцкіх вучылішчах змогуць навучаць ваджэнню.
- Будзе ўведзены дзелавы стыль адзення на ўроках (акрамя фізкультуры і працы).
- Бацькі дзяцей, якія жывуць у нашай краіне, абавязаны забяспечыць атрыманне адукацыі ў Беларусі.
- Навучанне ў 10-х класах завершыцца 25 мая з улікам вучэбна-палявых збораў (10 дзён).
- Рэпетыцыя цэнтралізаванага экзамену будзе суправаджацца арганізаваным падвозам.
- З 2026 года ад выпускных экзаменаў у 11-м класе можна быць вызваленым па медыцынскіх паказаннях.
На ўрок — без мабільнага
З 1 верасня абмяжоўваецца выкарыстанне ў школе мабільных тэлефонаў.
«Калі гаварыць аб школах горада Мінска, то ўсе ўстановы агульнай сярэдняй адукацыі ў нас гатовы да гэтага новаўвядзення. Яны абсталяваны адпаведнымі ячэйкамі, якія будуць замыкацца для таго, каб захаваць мабільныя тэлефоны», — сказаў на прэс-канферэнцыі ў БелТА намеснік старшыні камітэта па адукацыі Мінскага гарадскога выканаўчага камітэта Глеб ЛАЎРЫНОВІЧ.Тое ж датычыцца і ўстаноў адукацыі Мінскай вобласці, дадаў намеснік начальніка галоўнага ўпраўлення па адукацыі Мінскага абласнога выканаўчага камітэта Юрый ЛАРЫЧАЎ. «Вясной былі праведзены бацькоўскія сходы, вызначаны месцы захоўвання, адказныя асобы. Арганізуецца відэаназіранне і гэтак далей», — падкрэсліў ён. Як адзначыў Юрый Ларычаў, недзе ў пачатковых класах тэлефоны будуць захоўвацца непасрэдна ў кабінетах, дзе вучацца маленькія дзеці. Што да астатніх класаў, для навучэнцаў прадугледжаны ячэйкі пад ключ, за якімі будуць наглядаць адказныя асобы.
Фота Віктара ІВАНЧЫКАВА
