Будаўніцтва — гэта тая галіна, з якой звязана практычна ўсё наша жыццё. Маладыя сем’і з радасцю атрымліваюць новыя кватэры ў шматпавярховых дамах, дзеці ўтульна і камфортна адчуваюць сябе ў новых дзіцячых садках і школах, прыгожыя велічныя будынкі ўзводзяцца для прадпрыемстваў і арганізацый. Дзякуючы штодзённай нястомнай працы будаўнікоў гарады квітнеюць і набываюць новае аблічча. Наш жыллёвы дабрабыт — гэта паказчык высокага прафесійнага майстэрства работнікаў будаўнічай галіны. Напярэдадні іх прафесійнага свята мы пабывалі ў ААТ «Будаўнічы трэст № 20» г. Светлагорска.
Генеральны дырэктар будтрэста Аляксандр Ціхаміраў прапаноўвае нам праехаць на будаўнічы аб’ект, дзе ўзводзіцца малочнатаварная ферма «Хутар-Агра». Да канца года тут павінны быць узведзены два будынкі кароўнікаў на 288 галоў, даільна-малочны блок з даільнай устаноўкай тыпу «Паралель» 2×18 на 36 месцаў, пляцоўка з навесам для ўтрымання нецеляў у клетках-доміках на 140 месцаў, цялятнік на 312 галоў і іншыя аб’екты. На працягу года тут плануецца таксама стварыць шэсць траншэй для захоўвання сіласу.
Калі мы прыехалі на месца будоўлі, тут кіпела работа. Шчыравалі дарожныя рабочыя, цесляры, цесляры-бетоншчыкі, зваршчыкі, аддзелачнікі ўнутраных і знешніх работ, страхары, мантажнікі будаўнічых канструкцый, сантэхнікі, электрамантажнікі і іншыя спецыялісты. З некаторымі з іх мы пазнаёміліся бліжэй.
Аляксандр ЧУЛКОЎ з’яўляецца старшым вытворцам. Рабоце ў галіне будаўніцтва Аляксандр Уладзіміравіч аддаў не адзін дзясятак гадоў і сваім багатым напрацаваным вопытам шчодра дзеліцца з калегамі.
У сферу будаўніцтва Аляксандр Уладзіміравіч трапіў па падказцы. Аднойчы ў госці да бацькі прыйшоў сябар, які працаваў старшым прарабам у дарожна-будаўнічым кааператыве.
Ён шмат расказваў пра сваю работу, і яна вельмі зацікавіла хлопца. У 1982 годзе старшы вытворца работ скончыў Светлагорскі індустрыяльны тэхнікум і з таго часу працуе на будоўлі, прычым у трэсце № 20 з 1985-га.
- «Магу з гонарам сказаць, што ўсе дарогі, тратуары ў Светлагорску пракладвалі мы з маімі калегамі, — гаворыць ветэран. — Калі прыйшоў на работу ў 20-ы будаўнічы трэст, у чацвёртым мікрараёне Светлагорска „Юбілейны“ стаяў усяго адзін дом. Аднак на сённяшні дзень гэта забудова — сярод самых вялікіх у горадзе. Магу з упэўненасцю сказаць, што інжынерныя сеткі ў ёй — справа і маіх рук. Разам з калегамі мы працавалі над добраўпарадкаваннем такіх гігантаў, як ААТ „Хімвалакно“, „Цэлюлозна-кардонны камбінат“ і многіх іншых будоўлях».
У ветэрана ёсць і свае вучні. Старшы прараб сантэхучастка Аляксандр Папоў шчыра называе Аляксандра Чулкова сваім настаўнікам.
Назіраем, як спрытна працуе машыніст пагрузчыка Аляксандр Ятчанка. Старшы вытворца адзначае, што ў калегі «залатыя рукі». Планіроўку глебы, якую ён робіць грэйдарам пагрузчыка, можна не папраўляць, яна заўсёды выглядае ўзорна. Любімай рабоце машыніст пагрузчыка прысвяціў больш за трыццаць гадоў. Падчас нашай сустрэчы работнікам вялося добраўпарадкаванне пляцоўкі для часовага захоўвання гною.
Шмат гадоў аддаў любімай рабоце таксама Дзмітрый Верасаў, дарожны рабочы чацвёртага разраду.
— Мая работа не з лёгкіх. Аднак я разумею, наколькі яна неабходная людзям, і гэта заўсёды дорыць мне энергію, — шчыра прызнаецца суразмоўнік. — На рабоце я пастаянна спасцігаю штосьці новае, і гэта вельмі важна для мяне. Да таго ж я працую ў калектыве аднадумцаў, людзей, якія дасканала ведаюць сваю справу і выконваюць работу якасна.
За працай сваіх падначаленых уважліва сачыў таксама брыгадзір цесляроў-бетоншчыкаў Павел Чайкоўскі. Павел Мікалаевіч мае вялікі досвед работы і на іншых аб’ектах: сярод буйных, на якіх давялося працаваць, — Беларуская атамная электрастанцыя, Студэнцкая вёска пад Мінскам і інш.
Не адзін дзясятак гадоў аддаў рабоце ў галіне будаўніцтва і брыгадзір Аляксандр Ушак. Асноўныя работы, якімі Аляксандр Аляксандравіч займаецца са сваімі калегамі, — гэта мантаж сантэхнічнага абсталявання.
— Кожны дзень, прыходзячы працаваць на аб’ект, я бачу, як шчыруюць мае калегі, з якой адказнасцю яны падыходзяць да сваёй работы — і гэта штодня дае мне прыліў новых сіл. За працай час заўсёды пралятае непрыкметна. Калі ж работа любімая, яна заўсёды дорыць радасць і задавальненне, — шчыра прызнаецца Аляксандр Ушак.
— У нас наперадзе вялікі аб’ём дзейнасці, — гаворыць Аляксандр Ціхаміраў. — Плануем завяршыць будаўніцтва шэрага аб’ектаў уздоўж малочнатаварнай фермы «Хутар-Агра» да канца года. Паколькі неабходныя віды работ выконваюць высокакваліфікаваныя спецыялісты, сапраўдныя прафесіяналы, я ўпэўнены, што з усімі пастаўленымі задачамі мы абавязкова справімся. Усе належныя дзеянні будуць выкананы своечасова і на высокім узроўні.
Святлана СІЛЬВАНОВІЧ
Фота Віктара ІВАНЧЫКАВА
