Бо такія тавары — шырокага спажывання, і ў першую чаргу гэта адзенне, абутак, тэкстыль, вырабы са скуры і футра.
— У пагоні за нізкай цаной пакупнікі часам не звяртаюць увагу на якасць набытых тавараў, на наяўнасць плацежнага дакумента, каб у наступным абараніць свае правы як спажыўца, не кажучы ўжо пра наяўнасць на тавары неабходнай маркіроўкі — сродкаў ідэнтыфікацыі, — адзначылі ў МПЗ.
Дарэчы, пералік тавараў, якія падлягаюць маркіроўцы сродкамі ідэнтыфікацыі, устаноўлены адпаведнай пастановай Саўміна. Да такіх тавараў у тым ліку адносяцца абутак, прадметы адзення, бялізна пасцельная, сталовая і іншыя тавары.
— У рамках падатковага кантролю за суб’ектамі гаспадарання, якія ажыццяўляюць рэалізацыю тавараў лёгкай прамысловасці, у тым ліку ў крамах «нізкага» цэнавага сегмента, падатковымі органамі ў першым паўгоддзі 2025 года правераны шэраг суб’ектаў гаспадарання, якім прад’яўленыя падатковыя абавязацельствы на значную суму, — расказалі ў міністэрстве.
Тут дадалі, што да адміністрацыйнай адказнасці ў выглядзе штрафу прыцягнута больш за 120 вінаватых асоб.
— Пры гэтым больш за 50 % устаноўленых парушэнняў прыпадае на парушэнні парадку прыёму сродкаў плацяжу і патрабаванняў заканадаўства аб маркіроўцы тавараў сродкамі ідэнтыфікацыі. Высветлена сума схаванай ад падаткаабкладання наяўнай выручкі ў памеры больш за 11 мільёнаў рублёў, а таксама адсутнасць дакументаў, якія пацвярджаюць набыццё (паступленне) тавараў, — канстатавалі ў ведамстве.
Тут таксама звярнулі ўвагу, што адначасова на кантролі знаходзяцца пытанні выплаты падаткаў з утоенай ад падаткаабкладання выручкі і паўнаты выплаты падатку на дабаўленую вартасць, які спаганяецца падатковымі органамі пры ўвозе тавараў на тэрыторыю Беларусі з тэрыторыі дзяржаў — членаў Еўразійскага эканамічнага саюза.
Трэба сказаць, што ў рамках прафілактычнай работы, якая ладзіцца, праведзена 22 маніторынгі. Па выніках накіраваных у рамках камеральнага кантролю апавяшчэнняў, у якіх прапанавана добраахвотна ліквідаваць парушэнні, суб’ектамі гаспадарання прадстаўлены ўдакладненыя падатковыя дэкларацыі (разлікі) і добраахвотна вылічаны і выплачаны падаткі.
У ведамстве заверылі, што мерапрыемствы падатковага кантролю ў сферы гандлю таварамі лёгкай прамысловасці будуць працягнутыя.
