Задача вучоных — зрабіць так, каб мары ў сферы развіцця штучнага інтэлекту (ШІ) рэалізаваліся, а рызыкі — не. Аб гэтым на фарсайт-сесіі заявіў старшыня Прэзідыума Нацыянальнай акадэміі навук Уладзімір КАРАНІК, паведаміла БелТА.
«Стаўленне да штучнага інтэлекту на працягу часу змянялася. Спачатку гэта былі мары аб тым, што ён выканае ўсю працу за чалавека. Потым гэта былі страшылкі, што ён загубіць чалавецтва. Цяпер гэта стала рэальнасцю. Ён шчыльна ўвайшоў у наша жыццё. Сфера прымянення вельмі шырокая. Пачынаючы з таго, што мы кожны дзень бачым — разумныя калонкі, галасавыя асістэнты ў прыладах мабільнай сувязі, — і заканчваючы больш канкрэтным укараненнем у вытворчасць. Напрыклад, машынны зрок, які аўтаматызуе працэсы, павышае якасць прадукцыі. Гэта і сістэмы падтрымкі і прыняцця рашэнняў у ахове здароўя, адміністрацыйным упраўленні. Гэта ўжо рэальнасць, якая істотна ўплывае на жыццё людзей і эканоміку», — адзначыў Уладзімір Каранік.
- Па ініцыятыве Нацыянальнай акадэміі навук падрыхтаваны мадэльны закон аб тэхналогіях штучнага інтэлекту, які з’яўляецца асновай для прыняцця такіх законаў ва ўсіх краінах СНД. «На фарсайт-сесіі сабраліся спецыялісты, якія вызначаюць, як будзе развівацца штучны інтэлект у нашых краінах, што мы можам прапанаваць адзін аднаму і як зрабіць так, каб гэтае развіццё было бяспечным і накіраваным на карысць чалавецтва і эканомікі», — звярнуў увагу старшыня Прэзідыума НАН. Паводле яго слоў, работа па развіцці ШІ праводзіцца ва ўсіх краінах. «Калі мы хочам быць канкурэнтаздольнымі, не залежаць ад пастаўшчыкоў гэтых паслуг з іншых краін, мы павінны развіваць свае тэхналогіі», — падкрэсліў Уладзімір Каранік.
Міністр сувязі і інфарматызацыі Кірыл ЗАЛЕСКІ адзначыў, што цяпер актуальна гаварыць аб тым, дзе трэба прымяняць штучны інтэлект для паскарэння працэсаў ва ўсіх сферах грамадскіх адносін. «Попыт вялікі. Гэта і ўкараненне ШІ ў існуючыя інфармацыйныя сістэмы, якія ёсць у краіне, а таксама прымяненне яго пры іх распрацоўцы», — звярнуў увагу ён.
Віцэ-прэм’ер Расіі Дзмітрый ЧАРНЫШЭНКА наведаў Нацыянальную акадэмію навук Беларусі, паўдзельнічаў у семінары, прысвечаным Міжнароднаму фарсайту ў сферы штучнага інтэлекту, а таксама абмеркаваў супрацоўніцтва з Беларуссю ў сферы ШІ. Ён падзякаваў вучоным за праведзеную работу. «Выконваючы задачы па даследаванні штучнага інтэлекту, мы разам з нашымі вучонымі, міжнароднымі экспертамі вызначылі 10 кірункаў фундаментальных даследаванняў. Мы лічым, што яны павінны прадвызначыць будучыню. Таксама яны ляглі ў аснову міжнароднага фарсайту, — падкрэсліў расійскі віцэ-прэм’ер. — Для пачатку нам трэба расставіць прыярытэты паміж гэтымі фундаментальнымі кірункамі, каб вылучыць стратэгічна важныя з іх менавіта для міжнароднага супрацоўніцтва. Паспрабуем вызначыць асноўныя навуковыя задачы ўнутры гэтых кірункаў: з чаго варта пачаць, каб выбудаваць правільны навуковы парадак дня. Структура ўсіх гэтых кірункаў — не статычная, яе трэба актуалізаваць, абнаўляць. Я ўпэўнены, што разам з вамі мы зможам зрабіць новыя адкрыцці. У нас назапашаны вялікі досвед укаранення вынаходстваў».
В.а. дырэктара расійскага Стратэгічнага агенцтва падтрымкі і фарміравання ШІ-распрацовак Кірыл ЗЕМЛЯНУХІН адзначыў, што ў ходзе абмеркавання падчас фарсайт-сесіі і ў ходзе рабочых дамоўленасцяў намеціліся некалькі магчымых кірункаў супрацоўніцтва. «Мы вельмі шмат даведаліся, паглядзелі на беларускі бок. Пачулі таксама пра кірункі магчымага навуковага супрацоўніцтва паміж нашымі краінамі і арганізацыямі. Паспрабуем іх недзе запусціць, а недзе рэанімаваць, пазнаёміць людзей, каб структураваць новыя сумесныя праекты, — заўважыў Кірыл Землянухін. — Расійскі бок зацікаўлены ў праектах аб выкарыстанні ШІ ў хіміі, медыцыне, а канкрэтна анкалогіі. Паспрабуем таксама вырашыць праблему даступнасці вылічальных магутнасцяў для беларускіх арганізацый, якія займаюцца даследаваннямі».
Узровень развіцця штучнага інтэлекту ў Беларусі і Расіі дастаткова высокі і практычны. Аб гэтым заявіў генеральны дырэктар Аб’яднанага інстытута праблем інфарматыкі Нацыянальнай акадэміі навук Беларусі Сяргей КРУГЛІКАЎ. «Калі разглядаць тэорыю будучыні, то штучны інтэлект прыйдзе ва ўсе сферы дзейнасці. Абсалютна. З чагосьці трэба пачынаць, рухацца наперад, развіваць свае алгарытмы, фарміраваць уласныя моўныя мадэлі», — падкрэсліў Сяргей Круглікаў. Ён адзначыў, што штучнага інтэлекту не трэба апасацца, але пры гэтым трэба вызначыць рэальныя выклікі, рызыкі і пагрозы для таго, каб на заканадаўчым узроўні спыніць іх рэалізацыю ў новых алгарытмах, якія будуць стварацца ў нашых краінах.
