Уборачная гэтага сезона, да якой сельскія гаспадаркі паўночнага рэгіёна масава прыступілі ў апошняй дэкадзе ліпеня, зацягнулася больш як на месяц. На гэта ёсць важкая прычына — летнія дажджы занадта пераўвільгатнілі глебу. На пачатку жніва карціна была прыкрая: калоссе налілося, паспела, але цяжкая сельскагаспадарчая тэхніка загразала на палях. Працавалі збожжаўборачныя машыны на гусенічнай і паўгусенічнай хадзе. Дарэчы, у самыя «мокрыя» паўночныя і паўночна-заходнія раёны вобласці — Верхнядзвінскі, Глыбоцкі, Мёрскі, Пастаўскі, Шаркаўшчынскі — у дапамогу перакідвалі ад шасці да дзесяці адзінак тэхнікі на гусенічнай хадзе з іншых абласцей. Так выручалі таварышаў. Астатнія камбайны вымушаны былі чакаць, пакуль падсохне, у гаспадарках былі створаны спецыяльныя тэхатрады, каб выцягваць тэхніку, якая забуксавала.
— Як толькі надвор’е стабілізавалася, сельгаспрадпрыемствы адчувальна нарошчвалі тэмпы ўборкі, — адзначыў начальнік упраўлення раслінаводства аблсельгасхарча Віталь ВАРАБ’ЁЎ. — Пагоднымі днямі на палях шчыравалі да 900 камбайнаў. За штурваламі — надзейныя, правераныя людзі, якім не трэба тлумачыць, што яны закладваюць харчовую бяспеку краіны, дабрабыт сваіх прадпрыемстваў. Мужчыны, а на жніве занята пераважна моцная палавіна, працуюць з поўнай самааддачай і за штурваламі, і на адвозцы зерня, і на сушыльных комплексах.
- Імёны лідараў — камбайнераў, механізатараў, вадзіцеляў з вясковымі каранямі, значным стажам, прадстаўнікоў працоўных дынастый — добра вядомыя на Віцебшчыне. Сярод іх Аляксандр Зябко з Чашніцкага раёна і Уладзіслаў Карпушонак з Аршанскага. Правафланговым, першым у вобласці намалаціўшы тры тысячы тон збожжа, з’яўляецца Максім Сярноў з агракамбіната «Юбілейны» Аршанскага раёна (на фота). Наступаюць на пяты старэйшым таварышам маладыя камбайнеры Яўген Кухараў з Віцебскага раёна і Арцём Саратокін з Дубровенскага.
— Важкі намалот там, дзе добра вырасла, — падкрэсліў Віталь Вараб’ёў. — Сярэдняя ўраджайнасць па вобласці складае 33,7 ц/га, у той жа час у Аршанскім раёне — 48,6 ц/га, Віцебскім — 44 ц/га, Дубровенскім — 38 ц/га. Сярод асобных гаспадарак вылучаюцца СФГ «Пшанічны двор» Бешанковіцкага раёна, дзе ўраджайнасць збожжа дасягнула 88,9 ц/га, і СВК «Ларынаўка» Аршанскага раёна — 73,1 ц/га.
Агульны намалот па паўночным рэгіёне цяпер складае 706 тысяч тон зерня, і аграрыі маюць шанцы дасягнуць валавога збору збожжавых і рапсу ў 1 млн тон, як і планавалі. Толькі б зноў не пайшлі дажджы.
Віцебшчына імкнецца выканаць дзяржаўны заказ на збожжа. На дадзены момант гэты паказчык дасягнуў 64 %. Дзяржзаказ на рапс закрыты на 95 %, дзесяць раёнаў выканалі яго поўнасцю, астатнія закрыюць у найбліжэйшыя дні.
Паралельна з уборкай збожжавых рупліўцы вядуць яшчэ адно «жніво» — цярэбяць лён. Церабленне выйшла на фінішную прамую, гэта культура ўбрана на плошчы амаль 11 тыс. га, што складае 85 % ад плану. Нарыхтавана 7,8 тыс. тон неблагой ільнотрасты, сярэднім нумарам 0,93.
І тут жа — закладка падмурку пад ураджай наступнага года. На плошчы больш як 52 тысячы га пасеяны азімы рапс, прыступілі да сяўбы азімых збожжавых, пад гэтыя культуры ўзарана 84 тыс. га палеткаў.
Святлана ЯКАЎЛЕВА
фота «Аршанская газета»
