Новы навучальны год вось-вось пачнецца. Хвалюючы момант для бацькоў, настаўнікаў і дзяцей. Карэспандэнт «Звязды» пагаварыла з дырэктарамі школ аб тым, як яны рыхтаваліся да новага навучальнага года, а таксама даведалася, як будзе арганізавана праца ў сувязі з тым, што мабільныя тэлефоны ў школе цяпер пад забаронай.

Аб тым, як будуць складвацца справы ў сувязі з новаўвядзеннем, стане зразумела пазней. Хоць многія школы самі ўводзілі абмежаванні на выкарыстанне мабільнікаў. Тэлефоны здаваліся ў асобную скрыначку на час урока.

Пакіньце гаджэты ў настаўніцкай

У гімназіі № 10 імя Мітрапаліта Філарэта (Вахрамеева) г. Гродна такая практыка выкарыстоўваецца ўжо на працягу некалькіх гадоў, расказала дырэктар Алена Зінчук. У новым навучальным годзе за парты сядуць больш за 1000 хлопчыкаў і дзяўчынак.

— Многія бацькі спакойна паставіліся да такога новаўвядзення. Маці і таты не выказалі вялікіх прэтэнзій, бо разумеюць, што пры неабходнасці настаўнік можа даць дзіцяці тэлефон для сувязі. Вядома, былі нязгодныя, але ўсё вырашаецца праз дыялог. Для захоўвання тэлефонаў вучняў у настаўніцкай абсталяваны спецыяльныя месцы — шафы з падпісанымі аддзяленнямі для кожнага класа. Усё замыкаецца на ключ. За захаванасць тэхнікі перажываць не варта. Школа поўнасцю гатова, праведзены ўсе неабходныя рамонтныя работы. Мінулай восенню дзякуючы гарадской адміністрацыі адкрылася абноўленае спартыўнае ядро — стадыён, які меў патрэбу ў рамонце. У гэтым годзе быў праведзены рамонт даху будынка і закуплены станкі ў кабінет працы для хлопчыкаў. Сярод новаўвядзенняў — з’яўленне педагагічнага класа. Акрамя таго, у гімназіі працягваюць работу тры ваенна-патрыятычныя класы. На факультатыўным узроўні вучні вывучаюць кітайскую мову ў дадатак да англійскай. Вельмі рады, што бацькі бяруць актыўны ўдзел у жыцці гімназіі, асабліва ў пытаннях добраўпарадкавання. Яны дапамагаюць у падрыхтоўцы класаў і тэрыторыі да новага навучальнага года.

У фае пад камерай

З нецярпеннем дзяцей чакаюць і ў СШ № 11 імя генерала арміі А. І. Антонава г. Гродна. Сёлета школа актыўна рыхтавалася да пачатку навучальнага года. Дырэктар школы Марына Кароза ўдзяліла асаблівую ўвагу кадравым пытанням: у школе з’явіліся шэсць маладых спецыялістаў — педагог сацыяльны, два настаўнікі пачатковых класаў, настаўнік англійскай мовы, настаўнік фізічнай культуры і здароўя. Апошні — выпускнік каледжа, які пасля вучобы ва ўніверсітэце вярнуўся ў родную школу. Акрамя таго, школа атрымала значную падтрымку ад кіраўніцтва горада. Былі выдзелены бюджэтныя сродкі на рамонт. У дзяцей актыўныя бацькі, якія заўжды з радасцю прыходзяць на дапамогу. Напрыклад, сёлета маці і таты дапамаглі вывезці нямала будаўнічага смецця, да іх далучыліся і супрацоўнікі Гродзенскай пагранічнай групы.

— У нашай школе ўжо не першы год вядзецца работа па абмежаванні выкарыстання мабільных тэлефонаў навучэнцамі. У кожным класе ўстаноўлены спецыяльныя боксы з ячэйкамі для тэлефонаў. З пачаткам урока вучні здавалі свае прыстасаванні, а пасля яго заканчэння маглі забраць іх назад. Рашэнне цалкам абмежаваць выкарыстанне мабільных абмяркоўвалася бацькамі. Большасць з іх падтрымалі яго, адзначыўшы, што смартфоны адцягваюць дзяцей ад вучобы і не спрыяюць развіццю асобы. Шафы для тэлефонаў размешчаны ў фае на першым паверсе, побач з месцам, дзе знаходзяцца пазаведамасная ахова і камеры відэаназірання. Шафкі замыкаюцца на ключ і ўвесь дзень знаходзяцца пад наглядам.

Пад аховай — на пасту аховы

Да новага навучальнага года гатовы і ў Верцялішкаўскай сярэдняй школе. Тут прынялі рашэнне 

арганізаваць захоўванне гаджэтаў на пасту аховы. Такім чынам, тэхніка заўсёды будзе пад наглядам. Дырэктар школы Алег Казак адзначыў, што ў школе паглядзяць, наколькі зручна яны ўсё прадумалі.

— Вядома, дзецям такая ідэя не вельмі спадабалася. А вось бацькі ў большасці сваёй пагадзіліся з тым, што ўвесці такую практыку будзе правільным рашэннем. Хоць некаторыя дарослыя сумняваюцца, што змогуць знайсці хутка дзіця, калі ім спатрэбіцца з ім звязацца. Але класны кіраўнік і адміністрацыя школы заўжды на сувязі. Не варта перажываць, што камунікацыя будзе ўскладнена. І калі дзіцяці трэба будзе патэлефанаваць маці ці тату, яму ніхто не будзе забараняць. Хоць, калі так падумаць, практыка не зусім новая. На ўроках дзеці здавалі тэлефоны настаўніку. На мой погляд, гэта правільнае рашэнне, бо дзеці змогуць больш камунікаваць паміж сабой.

Дырэктар адзначыў, што школа поўнасцю гатова да прыняцця дзяцей, усе работы завершаны, а план па іх рэалізацыі намечаны яшчэ ў студзені 2025-га. Былі ўлічаны ўсе ўказанні зацікаўленых арганізацый, а работа пачалася яшчэ падчас вясновых канікулаў.

Самая галоўная задача школы — даць адукацыю дзецям. Але пры гэтым ніхто не адмяняе выхаваўчай функцыі, падтрымкі, настаўніцтва. Школы Гродзеншчыны чакаюць хлопчыкаў і дзяўчынак, а як будзе працаваць новаўвядзенне, якое датычыцца мабільных тэлефонаў, — пакажа час.

Вераніка КАЗЛОЎСКАЯ

фота аўтара

У забароне праносіць мабільныя на ўрок ёсць свае выключэнні

У прыватнасці, яны датычацца дзяцей і падлеткаў, якія маюць патрэбу ў мабільных прыладах па стане здароўя. Напрыклад, гэта можа быць неабходна для маніторынгу цукру ў крыві пры цукровым дыябеце (той выпадак, калі дзіця знаходзіцца на помпавай інсулінатэрапіі) або калі ў маленькага пацыента выяўлена захворванне, звязанае з парушэннем рытму сэрца.

У Міністэрстве аховы здароўя падкрэслілі, што для вызначэння групы дзяцей, якім неабходна выкарыстоўваць мабільныя ўстройствы ва ўстановах адукацыі, мэтазгодна дадаць у медыцынскую даведку наступную рэкамендацыю: «Кантроль глікеміі праводзіцца сістэмай бесперапыннага маніторынгу глюкозы з выкарыстаннем мабільнага дадатку» або «Кантроль рытму сэрца фіксуецца з дапамогай мабільнага дадатку».

Калі ў пацыента ёсць захворванні, спалучаныя з парушэннем камунікацыі (напрыклад, расстройствы аўтыстычнага спектра), фармулёўка для даведкі такая — «Магчыма выкарыстанне на мабільнай прыладзе дадаткаў па альтэрнатыўнай дадатковай камунікацыі». Для навучэнцаў з парушэннем слыху і (або) зроку — «Могуць выкарыстоўваць прыладу мабільнай сувязі як сінхранізатар маўлення».

Аднак у міністэрстве падкрэслілі, што недапушчальна ўказваць у медыцынскай даведцы агульную рэкамендацыю аб дазволе выкарыстання мабільнай сувязі па медыцынскіх паказаннях. Іншыя медыцынскія паказанні для выкарыстання навучэнцамі мабільных прылад (уключаючы інтэрнэт-сувязь) у будынках устаноў агульнай сярэдняй адукацыі не ўстаноўлены.