Сталіца па выніках першага паўгоддзя выканала ўсе даведзеныя ўрадам паказчыкі сацыяльна-эканамічнага развіцця. Аб гэтым падчас пасяджэння Мінскага гарвыканкама заявіла першы намеснік старшыні Мінгарвыканкама Надзея ЛАЗАРЭВІЧ, паведаміла БелТА.

«У нас добрая дынаміка па інвестыцыях у асноўны капітал — звыш 113 %. Мы выканалі паказчыкі па росце заработнай платы — 115 %. Таксама станоўчая дынаміка па рознічным тавараабароце: на сталіцу прыпадае больш за 50 % рэспубліканскага аб’ёму. Сектар грамадскага харчавання стаў адным з драйвераў росту», — адзначыла Надзея Лазарэвіч.

Разам з тым яна падкрэсліла, што пры станоўчых выніках застаюцца і праблемныя пытанні. «Мы бачым зніжэнне дынамікі ў апрацоўчай прамысловасці. Калі ў пачатку года тэмп росту складаў 111 %, то цяпер — 99,5 %. Акрамя таго, упершыню за 10 гадоў назіраецца рост складскіх астаткаў. Гэта замарожаныя рэсурсы прадпрыемстваў, што вядзе да падзення аб’ёмаў вытворчасці і росту крэдытнай нагрузкі. Мы запрасілі кіраўнікоў буйных прамысловых прадпрыемстваў рэспубліканскай формы справаздачнасці, у тым ліку лёгкай прамысловасці і „Белдзяржхарчпрама“, каб дэталёва разабраць сітуацыю і намеціць меры па выхаду з яе», — адзначыла першы намеснік старшыні Мінгарвыканкама.

• Надзея Лазарэвіч звярнула ўвагу, што ў той жа час прадпрыемствы бязведамаснай формы справаздачнасці дэманструюць высокія паказчыкі: «У экспарце тавараў і паслуг менавіта яны забяспечылі больш за 80 % аб’ёму. Прыватны бізнес актыўна працуе, экспартуе, і гэта пацвярджае наяўнасць попыту на нашу прадукцыю і паслугі. Значыць, пытанні, з якімі сутыкаюцца рэспубліканскія прадпрыемствы, маюць унутраны характар і патрабуюць канкрэтных рашэнняў».

«Трымаць на пастаянным кантролі выкананне прагнозных паказчыкаў — гэта значыць валодаць той сітуацыяй, якая адбываецца ў горадзе. Мы разумеем, што ад эфектыўнай работы прадпрыемстваў, арганізацый і ўстаноў горада залежаць фарміраванне бюджэту і рэалізацыя тых задач, якія стаяць сёння. Гэта найперш эканоміка краіны ў цэлым, — падкрэсліла Старшыня Савета Рэспублікі, упаўнаважаны прадстаўнік Прэзідэнта па Мінску Наталля КАЧАНАВА. — Са свайго боку я акцэнтавала ўвагу прысутных на пасяджэнні выканкама кіраўнікоў па выкананні тых задач, якія пастаўлены кіраўніком дзяржавы ў развіццё нарады, якая адбылася на гэтым тыдні: аб гандлёвым забеспячэнні нашых грамадзян, аб сістэме аховы здароўя. Прэзідэнтам дакладна пастаўлена задача, што 1 студзеня 2026 года такіх праблем у нашага насельніцтва быць не павінна. Таму, вядома, трэба ўсім уключыцца ў гэтую работу».