Прэзідэнт Рэспублікі Беларусь Аляксандр Лукашэнка ад імя беларускага народа і сябе асабіста павіншаваў Генеральнага сакратара ЦК Камуністычнай партыі Сацыялістычнай Рэспублікі В’етнам То Лама і Прэзідэнта Лыонг Кыонга з 80-годдзем незалежнасці гэтай краіны. Кіраўнік дзяржавы звярнуў увагу, што сувязі паміж Мінскам і Ханоем маюць даўнюю гісторыю і на працягу ўсёй гісторыі двухбаковых адносін Беларусь з захапленнем назірае за поспехамі В’етнама ў дасягненні амбіцыйных мэт палітычнага, эканамічнага і сацыяльнага развіцця. Умацаванне цесных сувязяў з В’етнамам як галоўным партнёрам у Паўднёва-Усходняй Азіі, па словах Прэзідэнта, з’яўляецца безумоўным прыярытэтам Беларусі.

Як вядома, па даручэнні кіраўніка дзяржавы, Старшыня Палаты прадстаўнікоў знаходзіцца з візітам у гэтай краіне. Спікер правёў шэраг перагавораў з кіраўніцтвам В’етнама, у рамках эканамічнага складніка праграмы наведаў правінцыю Лаакай, дзе адбылася цырымонія перадачы партыі кар’ерных самазвалаў БелАЗ, былі падпісаны двухбаковыя дакументы па рэалізацыі паставак беларускай і в’етнамскай прадукцыі.

На парадзе ў Ханоі, які стаў найбуйнейшым за апошнія дзесяцігоддзі, была прадэманстравана самая сучасная ваенная тэхніка, уключаючы танкі, ракеты, верталёты і рэактыўныя знішчальнікі. У калонах прайшлі тысячы в’етнамскіх салдат, а таксама ваеннаслужачыя Кітая, Расіі, іншых краін. В’етнамскі флот прайшоў строем у глыбакаводным заліве Камрань.

Парад адбыўся на плошчы Бадзінь, дзе 2 верасня 1945 года першы Прэзідэнт В’етнама Хо Шы Мін абвясціў гістарычную дэкларацыю незалежнасці. Тады ж было аб’яўлена аб поспеху Аўгустоўскай рэвалюцыі, вызваленні ад японскай акупацыі і амаль стагадовага каланіяльнага панавання Францыі, а таксама аб стварэнні дэмакратычнай рэспублікі.

Ігар Сергяенка павіншаваў Старшыню Нацыянальнага сходу В’етнама Чан Тхань Мана з гэтымі важнымі датамі і адзначыў, што парламентарыі Рэспублікі Беларусь надаюць вялікае значэнне пашырэнню ўсяго комплексу беларуска-в’етнамскіх сувязяў, а таксама канструктыўнаму ўзаемадзеянню ў рамках міжнародных арганізацый. 

Спікер выказаў спадзяванне, што пры падтрымцы в’етнамскіх калег дыялог заканадаўчых органаў будзе актыўна развівацца і садзейнічаць умацаванню дружалюбных адносін паміж дзяржавамі.

Ад імя дэпутатаў Старшыня Палаты прадстаўнікоў усклаў вянок да маўзалея Хо Шы Міна ў Ханоі. Маўзалей, які, дарэчы, спраектаваны і пабудаваны пры садзейнічанні савецкіх спецыялістаў, уяўляе сабой двухпавярховы будынак з шэрага мармуру, на другім паверсе якога знаходзіцца празрысты саркафаг з целам першага Прэзідэнта В’етнама. Пры ўваходзе ў маўзалей на мармуровай пліце выбіта яго знакамітая фраза: «Няма нічога даражэйшага за незалежнасць і свабоду».

Паводле прэс-службы Палаты прадстаўнікоў.

Фота ТГ-канала Палаты прадстаўнікоў.