Сёлета Гомельшчына ставіць перад сабой задачу — закласці ў стабілізацыйныя фонды 18 тысяч тон сельскагаспадарчай прадукцыі. Паступленне харчовых рэзерваў забяспечаць больш за дваццаць гаспадарак паўднёва-ўсходняга рэгіёна.
Што закладваецца?
Першай на закладку трапляе культура, якая патрабуе асаблівага падыходу, — цыбуля. Галоўкі гэтай расліны павінны добра высахнуць яшчэ ў полі, пасля чаго іх дадаткова дасушваюць і толькі потым перамяшчаюць у камеры. Сярод сельгасарганізацый, якія забяспечваюць харчовы запас цыбулі для рэгіёна, — фермерская гаспадарка ў Гомельскім раёне пад кіраўніцтвам Андрэя Парфянькова. Як перакананы фермер, цыбуляй спажывец вобласці будзе забяспечаны да канца лютага. Толькі ў агароднінасховішчах яго гаспадаркі можна змясціць да 600 тон прадукцыі.
— Сёлета ўраджай прыемна здзіўляе: дробнай цыбулі амаль няма, а сярэдняя ўраджайнасць складае 550 цэнтнераў з гектара. У параўнанні з мінулым годам вынікі выглядаюць непараўнальна лепшыя, — зазначаюць у фермерскай гаспадарцы.
У папаўненне стабфонду на Гомельшчыне важкі ўнёсак робіць сельгасарганізацыя «Брылёва». На прыкладзе гэтай гаспадаркі вельмі добра прасачыць, як пры захаванні ўсіх неабходных тэхналогій ідзе нарыхтоўка ледзь не галоўнага караняплода восеньскіх градак — морквы. Для закладкі на зіму мясцовыя аграрыі выкарыстоўваюць у першую чаргу сярэдняспелыя і познія сарты. Іх убіраюць у апошнюю чаргу, каб агародніна паспела набраць салодкасць, пакрылася шчыльнай лупінай. Убіраюць моркву толькі ўручную, гэта неабходна для таго, каб караняплод заставаўся цэлым і доўга захоўваў таварны выгляд.
Вядома, асноўнай культурай сезона ўсё ж такі застаецца бульба. На Гомельшчыне ў асобных гаспадарках ураджайнасць «другога хлеба» дасягнула 500 цэнтнераў з гектара. Захаваць ураджай належным чынам — не менш важная задача для працаўнікоў гаспадарак, таму ў сховішчах сёння — напружаная праца.
Строга па тэхналогіі
Сапраўды, сучасныя сховішчы для агародніны — гэта тэхналагічныя інжынерныя комплексы з сістэмамі вентыляцыі, кантролю тэмпературы і вільготнасці. Усё гэта дае магчымасць захоўваць агародніну свежай на працягу доўгага часу. Вопыт у захоўванні агародніны аграрыяў Калінкавіцкага раёна ацаніў памочнік Прэзідэнта — інспектар па Гомельскай вобласці Руслан Пархамовіч. Ён наведваў фермерскія гаспадаркі, філіялы спажывецкіх таварыстваў у Лельчыцкім, Калінкавіцкім і Жыткавіцкім раёнах. Таксама адным з аб’ектаў наведвання стала фермерская гаспадарка Калінкавіцкага раёна, якая вырошчвае садавіну і агародніну на больш як 700 гектарах зямлі. Мясцовыя фермеры вырошчваюць паўнавартасны «баршчовы набор», частка якога будзе закладзена ў стабілізацыйны фонд.
Руслан Пархамовіч ацаніў гатоўнасць сельгаспрадпрыемства да міжсезоннага захоўвання прадукцыі: выкананне ўмоў захоўвання, тэхналагічных патрабаванняў па захаванасці ўраджаю да наступнага сезона. Падчас агляду памочнік Прэзідэнта засяродзіў увагу аграрыяў на тэхнічным стане халадзільных установак, спраўнасці сістэм вентыляцыі, а таксама захаванні належнага санітарнага стану памяшканняў для захоўвання сельгаспрадукцыі.
Дзяржаўная падтрымка і кантроль
Па інфармацыі Міністэрства сельскай гаспадаркі і харчавання, у рамках дзяржзаказу на міжсезонне 2025/2026 года ў цэлым па рэспубліцы неабходна паставіць 148,78 тыс. тон прадукцыі.
Гэтыя аб’ёмы ўжо сфарміраваныя ў разрэзе ўсіх абласцей і горада Мінска з улікам патрэб гандлёвых сетак і ўстаноў сацыяльнай сферы, у тым ліку школ, бальніц і дзіцячых садкоў.
Каб гарантавана забяспечыць насельніцтва якаснымі прадуктамі ў перыяд міжсезоння, усе гаспадаркі павінны закласці прадукцыю на захоўванне да 15 лістапада.
Наталля КАПРЫЛЕНКА
фота ТК «Гомельшчына афіцыйна»
