Ужо ў панядзелак у Смаленску адбудзецца ўрачыстае адкрыццё ІХ Фестывалю дакументальнага кіно краін СНД «Еўразія.DOC».
На працягу пяці дзён (да 3 кастрычніка) гэты форум зноў стане пляцоўкай для знаёмства з аўтарскімі кінаработамі і сустрэч з іх стваральнікамі. Сёлета аргкамітэт атрымаў 352 заяўкі з 12 краін постсавецкай прасторы і далёкага замежжа. У выніку адабрана 35 фільмаў, якія гледачы ўбачаць на вялікім экране.
Урачыстае адкрыццё пройдзе ў Смаленскім кінатэатры «Сучаснік». Стартуе фестываль паказам стужкі расійскага рэжысёра Уладзіміра Сумашэдава «Вораг нумар тры». Фільм расказвае пра мастака і майстра фотамантажу Аляксандра Жытомірскага, які спрабуе з дапамогай мастацтва пераканаць ворага спыніць бойню. Але ці атрымаецца ў яго ў гэтай барацьбе зберагчы свой талент і самога сябе? Гледачы пра гэта даведаюцца падчас прагляду.
- У наступныя дні запланаваны круглы стол «Нацызм у ХХІ стагоддзі», паказ праграмы кароткаметражнага кіно і фільмаў з асноўнай конкурснай праграмы. Сярод краін, чые заяўкі сёлета прайшлі адбор, — Расія, Беларусь, Арменія, Кыргызстан, Латвія, Азербайджан, Узбекістан, Казахстан. Фільм «Тайметаў. Веснік перамогі» рэжысёра Эльдара Юлдашава з Узбекістана прадэманструюць на спецыяльным пазаконкурсным паказе. Таксама ў Смаленскім гуманітарным універсітэце пройдзе сустрэча з паралімпійцам, грамадскім дзеячам Аляксеем Талаем. Аўдыторыі пакажуць фільм «Птушка Фенікс Аляксея Талая» рэжысёра Уладзіміра Луцкага. Акрамя гэтага, у вялікай зале Смаленскага дзяржаўнага інстытута мастацтваў адбудзецца маладзёжны конкурс «Еўразія.DOC: 4 хвіліны».
Праграма фестывалю ў Мінску распачнецца 2 кастрычніка. На працягу двух дзён аматараў дакументальнага кіно чакаюць кінапаказы, сустрэчы з прадстаўнікамі здымачных каманд, абмеркаванні шэрагу важных і актуальных тэм. Так, у рамках круглага стала абмяркуюць «Гарызонты новага свету» і «80-годдзе заканчэння Другой сусветнай вайны», пакажуць кінаработы з праграмы кароткаметражных фільмаў і дакументальнае кіно з асноўнага конкурсу.
У Беларускай дзяржаўнай акадэміі мастацтваў чакаецца прэзентацыя мультымедыйнага праекта «RUсторыя». Там жа ўбачым маладзёжны конкурс «Еўразія.DOC: 4 хвіліны». Яго ўдзельнікаў сёлета адбіралі з паўсотні заявак з Расіі, Беларусі, Кітая і Казахстана.
Лакацыямі для прагляду і абмеркавання фільмаў стануць кінатэатры «Беларусь», «Перамога». У асноўную конкурсную праграму ад беларускіх аўтараў трапілі такія дакументальныя фільмы, як «У прарыў ідуць адны штрафныя батальёны» Вольгі Медніс-Аліпавай і Аляксандра Бондарава, «Выжыўшыя» Ганны Літаш, «Птушка Фенікс Аляксея Талая» Уладзіміра Луцкага, «Нелюдзі» Анастасіі Бенедзясюк, «Перамога. Адна на ўсіх» Юліі Яфімік і беларуска-расійскі фільм «Дзеці вайны... Дзеці перамогі!» Ашота Джазаяна.
А ў праграме кароткаметражнага кіно прадстаўлены фільм «Той, хто бачыць рукамі» Ірыны Васільевай. Калі акрэсліваць тэматычную палітру, то яна традыцыйна не толькі паказвае мінулае і рэчаіснасць, але і даследуе прыроду чалавека ў самых розных абставінах.
Алена ДРАПКО
