Зямельныя адносіны з сацыяльным кантэкстам
Прыняцце ў першым чытанні законапраекта «Аб змяненні законаў па пытаннях рэгулявання зямельных адносін» — чарговы этап сістэмнай работы па павышэнні эфектыўнасці заканадаўства аб ахове і выкарыстанні зямель. Старшыня Палаты прадстаўнікоў Ігар СЕРГЯЕНКА нагадаў, што новая рэдакцыя Кодэкса аб зямлі, якая аблегчыла рашэнне многіх пытанняў землекарыстання, дзейнічае з 1 студзеня 2023 года. «Аднак непрацяглы перыяд практыкі яго прымянення, аналіз зваротаў грамадзян выявілі шэраг палажэнняў, якія патрабуюць далейшай карэкціроўкі і ўдакладненняў, — адзначыў ён. — За 8 месяцаў бягучага года нам паступіла 229 зваротаў па пытаннях землекарыстання: гэта амаль 5 % ад усіх зваротаў».
Спікер звярнуў увагу на тое, што, у адпаведнасці з планам падрыхтоўкі законапраектаў, дакумент, які датычыцца рэгулявання зямельных адносін, павінен быў уносіцца ў Палату прадстаўнікоў у лютым 2026 года. Аднак дзякуючы сістэмнай рабоце Пастаяннай камісіі па аграрнай палітыцы і Дзяржаўнага камітэта па маёмасці, іншых зацікаўленых ведамстваў, законапраект паступіў у Палату прадстаўнікоў з істотным апераджэннем графіку.
«Законапраект быў адпрацаваны па новай методыцы, — праінфармаваў старшыня Пастаяннай камісіі па аграрнай палітыцы Палаты прадстаўнікоў Іван МАРКЕВІЧ. — Дэпутаты разам з распрацоўшчыкамі дэталёва вывучылі і істотна прааналізавалі тыя артыкулы заканадаўства, якія падвергліся змяненню. Праведзена больш за 30 нарад, на якіх дэпутаты агучвалі просьбы выбаршчыкаў. Мы гэта ўсё ўлічылі».
У прыватнасці, райвыканкамы надзяляюцца больш шырокімі паўнамоцтвамі ў сферы адабрання і прадастаўлення зямельных участкаў для дзяржаўных патрэб. Грамадзянам, якія маюць патрэбу ў паляпшэнні жыллёвых умоў, але добраахвотна адмовіліся ад раней выдзеленага ім зямельнага ўчастка, пры наяўнасці ўважлівых прычын паўторна прадастаўляецца зямельны ўчастак для будаўніцтва жылога дома. Замацоўваюцца адобраныя раней кіраўніком дзяржавы падыходы па легалізацыі самавольнага заняцця зямель, пашырэнне падстаў для такой легалізацыі.
Падатак ад рэалізацыі сельгаспрадукцыі і павелічэнне транзітных патокаў
Уносяцца змяненні і ў Падатковы кодэкс. Як адзначыла член Пастаяннай камісіі па бюджэце і фінансах Палаты прадстаўнікоў Наталля КУЛЯШОВА, новаўвядзенні датычацца выключна фізічных асоб і даходаў, атрыманых імі ад рэалізацыі прадукцыі раслінаводства і жывёлагадоўлі, вырашчанай на асабістым падсобным участку як самой фізічнай асобы — уласніка зямельнага ўчастка, так і яе сваякоў, апекуноў.
«З прыняццем змяненняў даход будзе вызначацца з фактычна атрыманага даходу ў каляндарным годзе, — патлумачыла дэпутат. — Другое змяненне датычыцца асаблівасцяў падаткаабкладання або вызвалення даходу ад рэалізацыі сельскагаспадарчай прадукцыі, якая заяўляецца фізічнымі асобамі ў тлумачэннях аб крыніцах грашовых сродкаў пры дэкларыраванні даходаў і маёмасці».
Феерверкі — пад жорсткім кантролем
У другім чытанні прыняты законапраект «Аб змяненні законаў па пытаннях дзейнасці органаў і падраздзяленняў па надзвычайных сітуацыях». Удакладняюцца паўнамоцтвы Прэзідэнта і ўрада ў галіне гарантавання пажарнай бяспекі. Замацоўваюцца паўнамоцтвы па ажыццяўленні дзяржаўнага пажарнага нагляду на аб’ектах па вытворчасці, захоўванні і ўтылізацыі выбуховых матэрыялаў і вырабаў, якія іх змяшчаюць, па арганізацыі тушэння пажараў, што ўзніклі на такіх аб’ектах. З крыніц фінансавання органаў і падраздзяленняў па надзвычайных сітуацыях выключаюцца абласныя бюджэты і бюджэт горада Мінска.
«Гэта павысіць эфектыўнасць выкарыстання грашовых сродкаў, аднак мясцовыя органы кіравання і самакіравання не пазбаўлены права выкарыстоўваць свае бюджэты з мэтай удасканалення супрацьпажарнай бяспекі, развіцця інфраструктуры», — удакладніў член Пастаяннай камісіі па нацыянальнай бяспецы Палаты прадстаўнікоў Анатоль БУЛАЎКА.
Супрацоўнікі органаў і падраздзяленняў па надзвычайных сітуацыях надзяляюцца правам правядзення асабістага надгляду грамадзян і прымянення спецыяльных сродкаў у выпадках і парадку, вызначаных законапраектам. Як патлумачыў дэпутат, устанаўліваецца свайго роду заслона ад нядобрасумленных пастаўшчыкоў і прадаўцоў выбухованебяспечнай прадукцыі. «Ні адзін Новы год не праходзіў без апаленых рук, твараў, пажараў у кватэры з-за кантрафактных гірлянд і феерверкаў», — прывёў прыклад важнасці навацыі парламентарый.
Да правапарушальнікаў — з індывідуальным падыходам
Праектам Закона «Аб змяненні кодэксаў па пытаннях адміністрацыйнай адказнасці», адобраным у першым чытанні, павышаецца аператыўнасць вядзення па справах аб адміністрацыйных правапарушэннях, забеспячэнне прымянення прафілактычных і выхаваўчых мер уздзеяння. Устараняюцца прабелы ў адміністрацыйна-прававым рэгуляванні з улікам бягучых эканамічных, сацыяльных і палітычных працэсаў, пераважна ў інтарэсах забеспячэння нацыянальнай бяспекі Беларусі.
У якасці прыкладу намеснік старшыні Пастаяннай камісіі па заканадаўстве Палаты прадстаўнікоў Аляксандр АМЕЛЬЯНЮК прывёў правапарушэнні, звязаныя з невыкананнем Правілаў дарожнага руху. «Сёння ўстаноўлена адміністрацыйная адказнасць асобы, якая кіруе транспартным сродкам і якая не мае такога права, — канкрэтызаваў дэпутат. — Пад гэту катэгорыю трапляюць асобы, якія ніколі не атрымлівалі такога права, асобы, якія пазбаўлены кіравання транспартным сродкам за пэўныя правапарушэнні, і асобы, у якіх скончыўся тэрмін вадзіцельскага пасведчання. Натуральна, гэта розныя людзі, розныя правапарушэнні — адпаведна, і адказнасць павінна адрознівацца. Мы размяжоўваем гэтыя катэгорыі. Тых, хто па пэўных прычынах не працягнуў тэрмін дзеяння вадзіцельскага пасведчання, чакае больш мяккае адміністрацыйнае пакаранне, чым асоб, якія трапляюць пад іншыя катэгорыі».
Вераніка КАНЮТА
Фота БелТА
