Зададзеная тэма не выпадковая: тэлефонныя лініі прайшлі напярэдадні маштабнага форуму «Размова аб важным: шчаслівая сям’я — моцная дзяржава», асноўныя мерапрыемствы якога пройдуць у Полацку сёння. Гэта сумесная ініцыятыва Савета Рэспублікі і Беларускай праваслаўнай царквы, якая прысвечана ўмацаванню статусу сям’і і папулярызацыі традыцыйных каштоўнасцяў як неад’емнай умовы захавання суверэнітэту, забеспячэння далейшага ўстойлівага развіцця і працвітання Беларусі. Такая размова з грамадзянамі дазволіла вызначыць найбольш актуальныя праблемы, якія іх хвалююць, каб абмеркаваць на форуме.
Замест парковак — дзіцячыя пляцоўкі
У дзень правядзення прамой тэлефоннай лініі па пытаннях сямейнай палітыкі і ўдасканалення заканадаўства ў сферы шлюбу і сям’і па ўсёй краіне былі даступныя 57 нумароў. І званкі паступалі практычна без перапынку. Людзі не толькі дзяліліся сваімі праблемамі з сенатарамі, але і агучвалі прапановы. Па шырокім спектры пытанняў грамадзяне з розных рэгіёнаў краіны звярталіся да Старшыні Савета Рэспублікі Наталлі Качанавай. Так, жыхары сталічнага мікрараёна Лошыца заклапочаныя будаўніцтвам паркоўкі паміж шматкватэрнымі дамамі. Паводле слоў заяўнікаў, на пустыры планавалі пабудаваць дзіцячы садок, потым адмовіліся ад гэтага рашэння. Цяпер там маюць намер уладкаваць паркоўку. Між тым у дамах, якія і будаваліся для шматдзетных сем’яў, шмат дзяцей, а дзіцячых горак з арэлямі недастаткова. Бацькі запэўніваюць, што парковачных месцаў у акрузе хапае, і просяць садзейнічання ў будаўніцтве, напрыклад, стадыёна.
Узнімалася тэма, звязаная з удасканаленнем аказання дапамогі сем’ям, якія выхоўваюць дзяцей-інвалідаў. Адна з грамадзянак прасіла аказаць садзейнічанне ў стварэнні дадатковых спецыялізаваных груп у дзіцячых садках для дзяцей з асаблівасцямі маўлення.
«Маладая сям’я» — да 35 гадоў
Не сакрэт, што беларусы сталі ўступаць у шлюб у больш усвядомленым узросце. Таму трапіць у разрад «маладая сям’я» паспяваюць не ўсе. Прагучала прапанова, якую парламентарыі абяцаюць разгледзець. Як адзначыла член Пастаяннай камісіі Савета Рэспублікі па адукацыі, навуцы, культуры і сацыяльным развіцці Наталля Глінская, на дадзены момант сям’я, дзе аднаму з сужэнцаў да 31 года, мае магчымасць скарыстацца льготным крэдытаваннем для таго, каб пабудаваць уласнае жыллё. «Прапануецца павысіць узрост да 33, а можа быць, нават і да 35 гадоў. Думаю, што мы перададзім у адпаведную камісію гэту прапанову, яна будзе разгледжана».
«Дзеці ў любым выпадку не павінны пакутаваць»
Звярталіся з рознымі пытаннямі і да старшыні Пастаяннай камісіі Савета Рэспублікі па заканадаўстве і дзяржаўным будаўніцтве Міхаіла Русага. «Любы камунікат у любы час, у любым фармаце, з любой катэгорыяй грамадзян вельмі важны і для нас, заканадаўцаў, і для ўлады, і для людзей, — адзначыў ён. — Такім чынам мы атрымліваем магчымасці дапамагчы людзям вырашыць тыя ці іншыя пытанні, ліквідаваць прабелы ў заканадаўстве».
Актуальныя пытанні, якія хвалююць многіх, датычацца аліментаў. «Бывае так, што бацька заплаціў нейкі мінімум, і ў выніку маці яго дзяцей звяртаецца па дапамогу да дзяржавы, таму што не мае нават бюджэту пражытачнага мінімуму на кожнага члена сям’і, — прыводзіць прыклад Міхаіл Русы. — Гэта тэма знаходзіцца на асаблівым кантролі Старшыні Савета Рэспублікі. Падключаем Мінпрацы і Мінюст, каб яны дапамаглі прымусіць нядбайнага бацьку або маці выконваць свае абавязацельствы. Дзеці ў любым выпадку не павінны пакутаваць». Сенатар падкрэсліў, што няма, бадай, у свеце яшчэ адной краіны, дзе такая ж магутная падтрымка сям’і, як у Беларусі.
