Беларусь са сваімі асновамі і выбраным палітычным вектарам сёння як костка ў горле Захаду. Зрэшты, і там некаторыя палітыкі ўжо зразумелі — без супрацоўніцтва з Беларуссю і Расіяй Еўропа не будзе бяспечнай, моцнай і эканамічна магутнай. Аб гэтым гаварылі ў Мінску на II Кангрэсе свабоды. Праўда, многія спікеры так і не змаглі прыехаць — ЕС абмежаваў выезд палітыкаў...
Самі еўрапейцы не падзяляюць палітыку сваіх эліт
Бізнесмен з Аўстрыі Валерый Кулеў праявіў цуды кемлівасці і дзякуючы некаторым манеўрам усё ж прыбыў у Мінск. «З-за праблемы з закрыццём літоўска-беларускай граніцы, на жаль, не ўся наша дэлегацыя змагла прыехаць. Прыехаў толькі я адзін з пэўнымі цяжкасцямі, таму што прыйшлося мяняць маршрут. Усё ж такі ў канчатковым выніку я з гэтымі цяжкасцямі змог справіцца», — расказаў Валерый Кулеў у эфіры «Першага інфармацыйнага».
Ён падзяліўся меркаваннем, што ўведзеныя Еўропай санкцыі вельмі моцна ўдараюць па аўстрыйскім бізнесе. Паводле яго слоў, усе санкцыі, якія Еўропа ўводзіць і супраць Беларусі, і супраць Расіі, адчуваюць самі еўрапейцы. «Яны ў першую чаргу ўдараюць па — не буду казаць пра іншых, я сам з Аўстрыі — па аўстрыйскім бізнесе. Усе аўстрыйскія кампаніі ўзаемазвязаныя. І калі нейкая адна вялікая еўрапейская кампанія перастае працаваць ці ў яе праблемы, гэта адразу па ланцужку закранае іншыя фірмы. І ў Аўстрыі на дадзены момант эканоміка не на самым лепшым узроўні. Яна вельмі моцна дэградавала, і гэта вельмі дрэнна», — сказаў жыхар Вены.
Валерый Кулеў заўважыў, што самі еўрапейцы не падзяляюць такую палітыку ўлад. «Трэба адразу падзяляць людзей і палітыкаў. Калі я размаўляю са знаёмымі, менавіта з аўстрыйцамі, яны ўсе выступаюць за сяброўства, за супрацоўніцтва. Вельмі многія наогул не разумеюць палітыку, якую вядзе ўрад», — заўважыў ён.Сам жа Валерый, нягледзячы на нестабільную палітычную сітуацыю, прыехаў у Мінск для знаёмства з новымі людзьмі, каб пачуць іх меркаванне аб сённяшняй сітуацыі і ў прынцыпе пра жыццё ў Беларусі. Жыхар Вены ведае, што Беларусь выступае за стабілізацыю сітуацыі і мір. «За супрацоўніцтва і з Еўропай, і іншым светам. На жаль, Еўропа цяпер сябе паводзіць не зусім адэкватна», — сказаў Валерый Кулеў, выказаўшы надзею, што ў бліжэйшы час усё зменіцца і вернуцца даўнія часы, калі ўсе адзін з адным супрацоўнічалі.
«Ні санкцыі, ні што іншае не зломіць волю беларускага народа»
Увядзеннем санкцый і закрыццём граніц заходнія краіны караюць самі сябе. Такім меркаваннем падзяліўся палітолаг з ЗША Стывен Самарын. Паводле яго слоў, такія крокі Захаду цалкам бессэнсоўныя. Зрэшты, негатыўныя наступствы адчуваюць тыя дзяржавы, якія іх жа і распачалі. «Таму яны пакаралі самі сябе: стрэлілі сабе ў нагу і будуць кульгаць. Нікому нічога яны не дакажуць. Беларусь як развівалася, так і развіваецца. Ні санкцыі, ні што іншае не зломіць волю беларускага народа. Усё будзе добра. Так яно і цяпер», — сказаў Стывен Самарын.
Палітолаг таксама звярнуў увагу, што адносіны паміж Беларуссю і ЗША выбудоўваюцца. У якасці прыкладу ён указаў на зняцце ЗША санкцый з «Белавія». «Хто застанецца ў накладзе? Тыя, хто цяпер робіць такія невялікія, ужо даруйце, гадасці», — заўважыў палітолаг, маючы на ўвазе еўрапейскія краіны.
Каментуючы тэму ваенных выдаткаў дзяржбюджэту некаторых дзяржаў, у прыватнасці, Польшчы, Стывен Самарын заўважыў, што такія тэндэнцыі сведчаць аб палітычным папулізме. «Вельмі лёгка прадаць ідэю, што табе пагражае небяспека. Нібыта страшная Расія і каварны Пуцін збіраюцца заваяваць. Гэта навіна добра прадаецца, на гэтым вельмі лёгка зарабіць палітычны капітал. Значна складаней зарабіць яго на тым, каб павысіць узровень жыцця сваіх грамадзян, якасць жыцця ў Польшчы. Гэта складаная, гэта карпатлівая і доўгая праца. Значна прасцей нагнятаць напружанасць і пад гэту справу атрымліваць велізарныя сродкі на ваенныя заказы і, адпаведна, развіваць ваенную прамысловасць. Магчыма, там ёсць і лабісты, — мяркуе палітолаг. — Але Польшча, аднак, выбрала такі шлях. Шлях у нікуды — спустошыць сваю краіну, знішчыць сваю эканоміку, абкрасці сваіх грамадзян».
«Закрыццё граніц з’яўляецца больш барацьбой супраць народа»
Закрыццё граніцы Літвой выглядае дурасцю, падзяліўся меркаваннем член партыі «Альтэрнатыва для Германіі» Дэтлеф Баўэр. «Можа, яны гэта робяць для таго, каб яшчэ які-небудзь лішні мільён ад Еўрапарламента атрымаць», — выказаў здагадку Дэтлеф Баўэр. Ён звярнуў увагу на важнасць свабоды перамяшчэння. Закрыццё граніц, паводле яго слоў, з’яўляецца больш барацьбой супраць народа, чым спробай нешта камусьці даказаць. Дарэчы, польскія пагранічнікі не прапусцілі лідара партыі «Фронт» Кшыштафа Талвінскага, які накіроўваўся ў Мінск для ўдзелу ў ІІ Кангрэсе свабоды. Палітык, былы намеснік міністра фінансаў і дэпутат Сейма, быў спынены на граніцы без тлумачэння прычын.
Першы такі форум у верасні 2024 года сабраў больш за 60 прадстаўнікоў з 13 краін Еўрапейскага Саюза і членаў дыпламатычнага корпуса. Арганізатары працягваюць фарміраваць міжнародную платформу для адкрытага дыялогу і выпрацоўкі агульных рашэнняў у галіне ўмацавання свабоды, міру і ўстойлівага развіцця. У 2025 годзе, нягледзячы на перашкоды і падножкі Захаду, колькасць удзельнікаў толькі ўзрасла. Гэта пацвярджае, што Беларусь выбрала правільны вектар, а значыць, ідзём правільным шляхам. Па выніках кангрэса ўдзельнікі падпісалі мемарандум аб партнёрстве. Гэта сведчыць аб тым, што супрацоўніцтва будзе працягвацца, нягледзячы на штучныя перашкоды.
Данііл ХМЯЛЬНІЦКІ.
