«Аб’ектыўна ў гэты год бачылі не толькі спякотнае, але і дажджлівае лета, і вясновыя замаразкі. З гэтага і складваўся наш сезон сельскагаспадарчых культур, якія мы вырошчваем у краіне. Год багаты. Хачу сказаць, што будзе каля 10 млн т збожжа і 1 млн т рапсу. Фактычна два гады мы маем прафіцыт зерня. Раней нам неабходна было звяртацца да Расійскай Федэрацыі па закупцы ўраджаю, а сёння аб’ектыўна многія гаспадаркі нашай краіны прапануюць свае паслугі да продажу. Збожжа захоўваецца добра. Мы ўтрымліваем баланс і праводзім абмен па дзяржаўных праграмах», — сказаў Юрый Шулейка.

Паводле яго слоў, сёлета была павялічана пасадка агародніны. «Вынік бачны. Бульбы ў краіне дастаткова. Агародніны накапана на 85 тыс. т больш. Прынята дакладнае рашэнне, нас падтрымаў кіраўнік дзяржавы. Мы перавялі стабілізацыйныя фонды ў дзяржзаказ, тым самым абазначылі абавязак усіх бакоў. Хто сёння захоўвае, хто выкладвае на паліцу і якія цэны будуць у міжсезонны перыяд на прадукцыю», — дадаў намеснік прэм’ер-міністра.

Паводле яго слоў, таксама вырашчана і сабрана 14 тыс. т агуркоў, што склала 172 працэнты ад патрэб беларусаў. Працягваецца стратэгія па вытворчасці памідораў, якія трэба давесці ад 6,5 тыс. т да 20 тыс. т, але такія вынікі плануюцца да канца 2027—пачатку 2028 года.

Юрый Шулейка адзначыў, што таксама праводзіцца работа над змяншэннем падзення тэхналагічнай дысцыпліны ў жывёлагадоўлі, але гэта працэс, які адбываецца не за адзін дзень, бо важны і стан жывёлы, і нарыхтоўка кармоў, і ўся сістэма ветэрынарнай службы. Напрыклад, зараз ідзе работа над узмацненнем райветстанцый. Дадаткова прыцягваюцца і фінансава стымулююцца ветэрынарныя ўрачы.

«У краіне дастаткова збожжа, і можна балансаваць рацыёны жывёл для таго, каб атрымліваць адпаведныя прыбаўкі ў вазе або неабходную колькасць малака і захаванасць жывёл. Да 2030 года трэба пабудаваць каля 350 малочнатаварных комплексаў, што мы сёння і робім», — падсумаваў віцэ-прэм’ер.