У Палаце прадстаўнікоў, Канстытуцыйным і Вярхоўным судах праект Праграмы сацыяльна-эканамічнага развіцця краіны на 2026 — 2030 гады прадставіў міністр эканомікі Юрый Чабатар. Прыярытэты развіцця краіны на будучую пяцігодку дэлегатам УНС ад Гродзенскай вобласці давялі намеснік міністра эканомікі Марыя Мажынская, дэлегатам УНС ад Віцебскай вобласці — намеснік міністра эканомікі Алена Балігатава. 

Нашы карэспандэнты працавалі на месцах і пацікавіліся меркаваннямі дэлегатаў аб праграме жыцця краіны на наступныя пяць гадоў. 

Дэлегат УНС, намеснік Старшыні Палаты прадстаўнікоў Вадзім ІПАТАЎ:

— Дэпутаты і раней падключаліся да прапрацоўкі пытанняў Праграмы сацыяльна-эканамічнага развіцця краіны на 2026 — 2030 гады, былі ўнесены адпаведныя прапановы. Усенароднае абмеркаванне гэтага найважнейшага дакумента ўяўляе яркі прыклад дэмакратыі. Прымаючы такія стратэгічныя дакументы, як Праграма сацэканамразвіцця, Усебеларускі народны сход падкрэслівае сваю ролю ў кансалідацыі, забеспячэнні адзінства ў грамадстве, суверэнітэту і незалежнасці нашай краіны. Вызначаныя ў праграме сем прыярытэтаў накіраваны на гарантаванне дабрабыту нашых грамадзян, стабільнасць у краіне, паступальнае эканамічнае развіццё. Дэмаграфічную бяспеку, развіццё чалавечага патэнцыялу немагчыма забяспечыць без адпаведных выдаткаў на тую ці іншую сферу. 

Дэлегат УНС, першы намеснік Старшыні Вярхоўнага суда Валерый КАЛІНКОВІЧ:

— Праект Праграмы сацыяльна-эканамічнага развіцця Беларусі на 2026—2030 гады ўяўляе сабой комплексны і добра прапрацаваны погляд на будучыню нашай краіны па ўсіх асноўных кірунках яе развіцця, становішча спраў у нашым грамадстве, захаванне тых сацыяльных гарантый, якія прадугледжвае сацыяльна-арыентаваная прававая дзяржава, якой з’яўляецца Рэспубліка Беларусь. Асноўныя палажэнні дакумента дэлегатамі вывучаны, яны зразумелыя і ўспрымаюцца як правільныя. У судовай кампетэнцыі вельмі шмат пытанняў, якія неабходна вырашаць для таго, каб у грамадстве быў мір і спакой, эканоміка працавала стабільна, а дзейнасць судоў умацоўвала давер насельніцтва да інстытутаў улады, у тым ліку судовай.

Дэлегат УНС, старшыня Лідскага раённага Савета дэпутатаў Інеса БЕЛУШ:

— У грамадстве ўжо сфарміравалася разуменне важнасці рашэнняў, якія прымаюцца Усебеларускім народным сходам. Мы, дэлегаты, з пачуццём адказнасці будзем прымаць Праграму сацыяльна-эканамічнага развіцця Беларусі да 2030 года. Яна распрацавана дасведчанымі людзьмі: упраўленцамі, экспертамі, прадстаўнікамі грамадзянскай супольнасці, але і мы зможам выказаць сваю думку і прапановы. Запыт насельніцтва, які неабходна пакласці ў стратэгію работы на перспектыву, — захаваць сацыяльную мадэль развіцця дзяржавы, забяспечыць дабрабыт, роўныя магчымасці для развіцця кожнага рэгіёна. Прыняцце праграмы з улікам новых стандартаў якасці жыцця, арыентацыі на развіццё чалавечага патэнцыялу, захавання роўных магчымасцяў забяспечыць не толькі ўстойлівасць, але і росквіт беларускай дзяржавы.

Дэлегат УНС, ляснічы Параф’янаўскага лясніцтва Бягомльскага лясгаса Андрэй ЗАІКА:

— І сям’я, і асобнае прадпрыемства, і раён, і дзяржава ў цэлым павінны развівацца ў адпаведнасці з пэўным планам. Мы ж на бытавым узроўні плануем, якую адукацыю хочам даць дзецям, будзем будаваць новы дом ці застанёмся ў невялікай кватэры, што будзем рабіць, каб зарабіць больш грошай. Так і ў краіне: трэба вызначаць прыярытэты, імкнуцца да павышэння ўзроўню жыцця народа, шукаць крыніцы папаўнення бюджэту. Звычайным людзям трэба, каб быў мір і спакой, стабільная работа, годны заробак, каб пасля работы можна было спакойна адпачыць. Гэта і ёсць якасць жыцця, на паляпшэнне якога і накіравана праграма сацэканамразвіцця краіны на наступную пяцігодку. Дакумент датычыцца ўсіх. І каб усё ажыццявілася, патрэбны намаганні кожнага беларуса. 

Дэлегат УНС, студэнтка ГрДУ імя Янкі Купалы Анастасія КІСЕЛЬ:

— Распрацоўка Праграмы сацыяльна-эканамічнага развіцця на бліжэйшыя пяць гадоў — цэнтральная падзея, якая вызначае вектары развіцця Беларусі. Мяне, як студэнта і прадстаўніка СМІ, найбольш цікавяць пытанні падтрымкі моладзі і маладых сем’яў, пытанні адукацыі і развіцця медыясферы. У праграме ўсё накіравана на людзей, паляпшэнне іх якасці жыцця. Улічваюцца патрэбнасці ўсіх катэгорый насельніцтва, у тым ліку моладзі. Прэзідэнт адзначыў, што кожны малады чалавек у сучасным свеце непазбежна сутыкаецца з палітыкай, бо яна праходзіць праз усе аспекты нашага жыцця. Для грамадзян Беларусі вельмі важна быць у курсе падзей, якія адбываюцца ў краіне. Ініцыятыўнай моладзі ўсё больш, і мы разам смела крочым у новую пяцігодку.

Дэлегат УНС, старшыня Пастаяннай камісіі па працы і сацыяльных пытаннях Палаты прадстаўнікоў Ірына КАСЦЕВІЧ: 

— Ключавая мэта праграмы — пераход на новы, якасны ўзровень жыцця кожнага беларуса. У цэнтры ўвагі — чалавек. Адразу кідаецца ў вочы, што на першым месцы ў праекце праграмы — дэмаграфічная бяспека, другім прыярытэтам з’яўляецца развіццё чалавечага патэнцыялу. Забеспячэнне стабільнасці колькаснасці насельніцтва і рост нараджальнасці датычыцца кожнага з нас. Ёсць працоўныя рэсурсы — ёсць развіццё эканомікі. Адпаведна, ёсць падаткі, якія паступаюць у бюджэт, — значыць ёсць развіццё краіны ў цэлым. Індыкатары, вызначаныя ў праграме, накіраваны на вырашэнне гэтай звышскладанай, найважнейшай задачы. Для развіцця краіны неабходны здаровая нацыя і высокакваліфікаваныя кадры, таму ў адным звязку і адукацыя, і ахова здароўя. Акцэнт зроблены на адказнасці кожнага беларуса за сваё здароўе, на адукацыю праз усё жыццё. Усё гэта адпавядае выклікам часу. 

Дэлегат УНС, старшыня Новалукомльскага гарадскога Савета дэпутатаў Алена МАЛЯРОВА:

— Бачу падабенства ў праектах праграмы і плане развіцця роднага горада. Рэалізацыя сацыяльна значных праектаў напрамую залежыць ад стану эканомікі рэгіёна. У Новалукомлі стаў актыўней развівацца бізнес. Так, у рамках рэалізацыі праграмы «Адзін раён — адзін праект» адкрыўся кансервавы завод. Цяпер тут перапрацоўваюць рыбу, плануюць увесці лінію па перапрацоўцы мяса птушкі. Разглядаецца пытанне аб мадэрнізацыі горадаўтваральнага прадпрыемства, Лукомльскай ГРЭС. Стабільная эканоміка дазволіць будаваць і рамантаваць дамы, добраўпарадкаваць гарадскія тэрыторыі. Чалавек жыве не хлебам адзіным: у наступнай пяцігодцы гараджане плануюць аказаць дапамогу пры ўзвядзенні праваслаўнай царквы. Мы хочам развівацца разам з усёй краінай.

Дэлегат УНС ад судзейскага корпуса, суддзя Канстытуцыйнага суда Ала БОДАК:

— Праграма сацыяльна-эканамічнага развіцця накіравана на рэалізацыю тых сацыяльных гарантый і абавязацельстваў, якія ўсклала на сябе дзяржава ў выніку рэспубліканскага рэферэндуму, праведзенага 27 лютага 2022 года. Тры з сямі прыярытэтаў датычацца сацыяльнага складніку нашай дзяржавы. Гэта сведчыць аб тым, што прынцып сацыяльнай дзяржавы атрымаў сваё рэальнае ўвасабленне. Сярод ключавых прыярытэтаў праграмы — павышэнне якасці жыцця людзей. Для вырашэння тых задач, якія пастаўлены, патрэбныя высокакваліфікаваныя кадры, здольныя вырашыць задачы па фарміраванні інтэлектуальнай эканомікі. Адзін з такіх кірункаў — практыкаарыентаваная адукацыя. Нам патрэбныя высокакваліфікаваныя спецыялісты, якія могуць забяспечыць лічбавую трансфармацыю грамадства і эканомікі. 

Дэлегат УНС, начальнік аддзела ідэалагічнай работы і па справах моладзі Мастоўскага райвыканкама Таццяна ПРАКАПЕНЯ:

— Пытанні сацыяльна-эканамічнага характару (такія, як годны ўзровень аплаты працы, забеспячэнне сацыяльных гарантый) асабліва актуальныя для маладых спецыялістаў. Важна, каб моладзь заставалася ў малых гарадах і сельскай мясцовасці. Увага да гэтых пытанняў мае крытычнае значэнне для будучыні краіны. Неабходна стварыць умовы, пры якіх маладыя спецыялісты змогуць рэалізаваць свой патэнцыял, унесці свой уклад у развіццё рэгіёнаў. Ад моладзі залежыць, якой будзе будучыня Беларусі. Таму важна ўдзяліць асаблівую ўвагу распрацоўцы і рэалізацыі мер, накіраваных на падтрымку маладых спецыялістаў, паляпшэнне якасці жыцця ў малых гарадах і сельскай мясцовасці. Гэта стане залогам росквіту нашай краіны, забеспячэння яе ўстойлівага развіцця. 

Вераніка КАНЮТА, Вераніка КАЗЛОЎСКАЯ, Данііл ХМЯЛЬНІЦКІ, Святлана ЯКАЎЛЕВА.