Удзел у мерапрыемствах бяруць дэлегацыі дзевяці краін — удзельніц ЕАД (Беларусь, Індыя, Казахстан, Кітай, Кыргызстан, Расія, Таджыкістан, Туркменістан і Узбекістан). Таксама ўдзельнічаюць дзяржавы і міжнародныя арганізацыі, якія маюць статус назіральніка. Беларусь у ЕАД прадстаўляе Дэпартамент фінансавага маніторынгу Камітэта дзяржкантролю.
Больш за 300 прадстаўнікоў дзяржаўных і праваахоўных органаў, падраздзяленняў фінансавых разведак, экспертаў з 18 краін свету абмяркоўваюць пытанні ўзаемадзеяння ў сферы барацьбы з легалізацыяй злачынных даходаў. Як адзначыў на пленарным пасяджэнні ЕАД старшыня Камітэта дзяржкантролю Беларусі Васіль ГЕРАСІМАЎ, сёння ўвесь свет сутыкаецца з новай хваляй глабальных змяненняў, імклівым развіццём лічбавай эканомікі, з’яўленнем альтэрнатыўных форм грошай і разлікаў, а таксама пашырэннем міжнародных фінансавых інструментаў.
— Глабалізацыя сусветнай эканомікі прыводзіць да свабоднага руху фінансавых патокаў на ўзроўні дзяржаў, кампаній і прыватных асоб. У гэтых умовах сучасныя пагрозы становяцца ўсё больш складанымі і разнастайнымі. Сярод іх розныя віды развітага фінансавага махлярства і кіберзлачыннасці, незаконнае выкарыстанне крыптавалют, а таксама старанна арганізаваныя формы экстрэмізму, якія патрабуюць узгодненых падыходаў да іх выяўлення і папярэджання. Міжнародны вопыт паказвае, што эфектыўна супрацьстаяць такім выклікам магчыма толькі пры функцыянаванні ў кожнай дзяржаве добра прадуманай і зладжанай сістэмы кантролю, заснаванай на адзіных стандартах, а таксама выключна ў рамках цеснага супрацоўніцтва паміж краінамі, — сказаў Васіль Герасімаў.
Ён адзначыў, што Беларусь рыхтуецца да будучага працэсу ацэнкі ФАТФ (Група распрацоўкі фінансавых мер барацьбы з адмываннем грошай).
— Перш за ўсё працягваецца ўдасканаленне нацыянальнага антыадмывачнага заканадаўства, укараненне новых механізмаў, накіраваных на павышэнне эфектыўнасці фінансавых расследаванняў і аператыўнае выяўленне даходаў, атрыманых злачынным шляхам. Асаблівая ўвага ўдзяляецца рэгуляванню абароту лічбавых знакаў, вядуцца цэнтралізаваныя рэестры крыптакашалькоў, якія выкарыстоўваюцца для атрымання злачыннага даходу, наладжаны эфектыўны механізм арышту і канфіскацыі крыптавалюты, прыняты палажэнні аб падаткаабкладанні аперацый з лічбавымі актывамі і іншыя меры, якія забяспечваюць празрыстасць гэтай сферы, — адзначыў Васіль Герасімаў.
Дырэктар Расфінманіторынгу, старшыня Еўразійскай групы па супрацьдзеянні легалізацыі злачынных даходаў і фінансаванню тэрарызму Юрый ЧЫХАНЧЫН адзначыў, што нацыянальная антыадмывачная сістэма Беларусі знаходзіцца на высокім узроўні сярод краін — удзельніц ЕАД. «Што датычыцца прыярытэтаў на бліжэйшыя два гады, самая галоўная задача — даць магчымасць краінам — членам ЕАД прайсці ацэнку ФАТФ і пацвердзіць, што наша сістэма адпавядае ўсім міжнародным патрабаванням», — падкрэсліў Юрый Чыханчын.
Сярод дасягненняў Рэспублікі Беларусь, якія з’яўляюцца перадавым вопытам для іншых краін, дырэктар Дэпартамента фінансавага маніторынгу Камітэта дзяржкантролю Беларусі Дзмітрый ЗАХАРАЎ найперш назваў прагрэсіўны вопыт ідэнтыфікацыі кліентаў у банкаўскім і іншых сектарах эканомікі, які дазваляе аператыўна вызначаць падазроныя фінансавыя аперацыі, праводзіць работу па далейшым аналізе гэтых аперацый і накіроўваць праваахоўным органам адпаведную інфармацыю для больш дэтальнай прапрацоўкі. Таксама гэта рэгуляванне крыптарынку, які дэтальна рэгламентаваны, што дазваляе мінімізаваць рызыкі ў гэтай сферы. Сярод прагрэсіўных мер і аўтаматызаваная сістэма барацьбы з махлярствам, якая дазваляе па рашэнні праваахоўных органаў аператыўна блакіраваць падазроныя фінансавыя аперацыі, звязаныя з кібермахлярствам і фінансавымі злоўжываннямі, і тым самым папярэджваць вывад сродкаў за мяжу. Гэта і кантроль за ігральным бізнесам, дзе ёсць пэўная сістэма ідэнтыфікацыі і верыфікацыі фінансавых аперацый. Гэты вопыт выклікае цікавасць у міжнароднай супольнасці і абмяркоўваецца на пляцоўцы пленарнага тыдня ЕАД.
Алена КРАВЕЦ
