Вучэбныя швейныя майстэрні тут мала чым адрозніваюцца ад цэхаў на профільным прадпрыемстве, а будучыя цырульнікі ўдасканальваюць свае навыкі не на манекенах, а ва ўмовах, максімальна набліжаных да салона прыгажосці. Сваім досведам, як рыхтаваць спецыялістаў, гатовых да работы на сучаснай вытворчасці і ў сферы паслуг, са «Звяздой» з задавальненнем падзялілася творчая педагагічная каманда Гомельскага дзяржаўнага каледжа бытавога абслугоўвання.

Упор на практыку

У швейнай майстэрні пахне новым тэкстылем... Пад роўны гул машын дзяўчаты-навучэнцы ўважліва працуюць над пашывам штаноў для хлопчыкаў. І гэта не вучэбныя ўзоры, а рэальны раскрой паяснога вырабу школьнага дзелавога стылю ад ААТ «Камінтэрн».

На бясспрэчнай важнасці практыка-арыентаванай падрыхтоўкі спецыялістаў для лёгкай прамысловасці робіць акцэнт дырэктар Гомельскага дзяржаўнага каледжа бытавога абслугоўвання Аляксандр Гурын.

— Гэта тое, што называюць найвышэйшым пілатажам у прафадукацыі. Не проста вучэбнае заданне, а адказнасць перад рэальным заказчыкам, — заўважае Аляксандр Леанідавіч. — З прапановай такой формы ўзаемадзеяння да нас звярнулася гендырэктар «Камінтэрна» Таццяна Літвіновіч, а мы ахвотна падтрымалі ініцыятыву. Асноўная задача — уключыць у навучальны працэс пашыў вырабаў прадпрыемства. Даецца гатовы раскрой дзіцячых штаноў, і на вучэбных занятках навучэнцы шыюць рэальную прадукцыю. Так вытворчы працэс фабрыкі інтэграваны ў нашу вучэбную праграму.

Яшчэ адзін прарыў у навучанні — стварэнне вучэбнай майстэрні наўпрост у цэху ААТ «8 Сакавіка». У рамках сеткавага ўзаемадзеяння навучэнцы каледжа праходзяць вытворчае навучанне не ў класах, а на рэальным працоўным месцы.

Вучоба без межаў

У арганізацыі формаў навучання каледж максімальна арыентаваны на патрэбы рэгіёна і яго жыхароў. Выдатны прыклад — аддзяленне перападрыхтоўкі дарослага насельніцтва. Працуюць з усімі жадаючымі на платнай аснове. Таксама вучаць новай спецыяльнасці па накіраванні цэнтраў занятасці. Такія праграмы скарочаныя, каля паўгода, і фарміруюцца індывідуальна, з улікам базавай адукацыі чалавека.

Каледж таксама забяспечвае прафесійную падрыхтоўку школьнікаў. Штогод каля 200 старшакласнікаў Гомеля атрымліваюць тут працоўныя прафесіі, як некалі ў навучальна-вытворчых камбінатах.

Асобны і асаблівы кірунак дзейнасці каледжа — філіял у Гомельскай папраўчай калоніі № 4.

— Мы рыхтуем асуджаных па швейным і цырульніцкім профілях. І сёння выходзім на новы ўзровень: упершыню ў Беларусі на базе філіяла калоніі пачынаецца падрыхтоўка па праграмах сярэдняй спецыяльнай адукацыі. Гэта запатрабавана, і мы ўжо скарэкціравалі ўсе навучальныя планы для першага набору. Нас выбралі эксперыментальнай пляцоўкай укаранення падобнай практыкі навучання па ініцыятыве Дэпартамента выканання пакаранняў МУС і міністэрства адукацыі, — звяртае ўвагу Аляксандр Гурын.

Кадры для краіны

У каледжы двухузроўневая сістэма падрыхтоўкі. Першая ступень — прафесійна-тэхнічная падрыхтоўка: цырульнікі, швачкі, краўцы, майстры па манікюры. Другая ступень — сярэдняя спецыяльная адукацыя: мастакі-мадэльеры і мадэльеры-канструктары, якія навучаюцца па профілях «Цырульнае мастацтва і дэкаратыўная касметыка» і «Мадэляванне і канструяванне швейных вырабаў». На першую і другую ступень навучання — набор толькі пасля 9-га класа.

— Як паказала сёлетняя прыёмная кампанія, дзеці прыходзяць матываваныя. Конкурс дасягаў два чалавекі на месца па спецыяльнасці «Мастак-мадэльер», і 1,2-1,3 чалавека на месца — «Мадэльер-канструктар», — тлумачыць намеснік дырэктара Гомельскага дзяржаўнага каледжа бытавога абслугоўвання Яўгенія Ямпольская. — У нас адпрацаваны механізм работы па мэтавай падрыхтоўцы навучэнцаў не толькі з дзяржаўнымі, але і прыватнымі прадпрыемствамі і арганізацыямі. Увесь кантынгент навучэнцаў і колькасць груп фарміруем на аснове дзяржзаказу кадраў праз аўтаматызаваную сістэму. Працуем з заказчыкамі кадраў па ўсёй краіне, але асноўны партнёр — Гомельская вобласць: нашы вядомыя фабрыкі, камбінаты бытавога абслугоўвання, прыватныя прадпрыемствы.

ШІ для будучых мадэльераў

Сёння, без перабольшвання, гонар для Гомельшчыны — цэнтр кампетэнцый па швейнай вытворчасці на базе Гомельскага дзяржаўнага каледжа бытавога абслугоўвання. Цэнтр быў створаны тут яшчэ ў 2012 годзе, але сёлета ў межах рэалізацыі дзяржпраграмы развіцця прафесіянальна-тэхнічнага навучання гэту навучальную пляцоўку кардынальна абнавілі. Сёння гэта адзіны ў краіне цэнтр кампетэнцый па швейнай вытворчасці такой высокай ступені аснашчанасці.

— Гэта прарыў не толькі для нас, але і для ўсяго рэгіёна, — падкрэслівае дырэктар Аляксандр Гурын. — Мы сталі рэгіянальнай пляцоўкай — па дамове аб сеткавай форме ўзаемадзеяння да нас на навучанне прыязджаюць маладыя людзі з усіх аднапрофільных каледжаў вобласці. Калі раней у нас праходзіла навучанне 70–100 чалавек у год, то на гэты год запланавана ўжо 339 чалавек. Цэнтр абсталяваны тэхнікай найвышэйшага класа. Я б сказаў, гэта «космас». І што важна — абсталяванне цэнтра на парадак вышэй, чым на многіх прадпрыемствах, што дазваляе нам перайсці на ўзровень апераджальнай падрыхтоўкі кадраў, даваць веды і навыкі, якія будуць запатрабаваны яшчэ доўгія гады. Акрамя таго, магчымасці цэнтра плануецца выкарыстоўваць для перападрыхтоўкі майстроў вытворчага навучання і павышэння кваліфікацыі работнікаў швейных прадпрыемстваў.

Урокі дабрыні

Не менш цікавую форму практыка-арыентаванага навучання тут укараняюць для цырульнікаў. Выбудавана ўнікальная сістэма абслугоўвання насельніцтва. Любы жыхар горада можа запісацца і прыйсці на ўрок, дзе навучэнцы пад наглядам майстра аказваюць цырульніцкія паслугі. Гэта бясплатна. Важна, што будучыя спецыялісты не толькі адпрацоўваюць навыкі на «жывой мадэлі», але і вучацца камунікату з рознымі кліентамі. І такая практыка вельмі запатрабаваная — штодня ў каледж па такую паслугу звяртаецца 100–120 чалавек.

Каледж вядомы і сваёй валанцёрскай дзейнасцю. Навучэнцы рэгулярна выязджаюць з майстар-класамі ў дзіцячыя дамы, школы-інтэрнаты, сацыяльныя цэнтры, пансіянаты для пажылых людзей, састарэлых і інвалідаў: бясплатна стрыгуць і робяць укладкі.

— За гады работы з навучэнцамі мы пераканаліся: каб выхаваць прафесіянала і патрыёта, які разумее сваю адказнасць перад краінай, — стандартнага вучэбнага працэсу недастаткова. З 2008-га захапіліся ўдзелам у конкурсах прафмайстэрства. Гэты досвед дазволіў укараніць і новыя методыкі: каб запоўніць паўзы паміж буйнымі конкурсамі, прыдумваем уласныя творчыя праекты, дзе студэнты дэманструюць сваё майстэрства, — тлумачыць Аляксандр Гурын.

Толькі за апошнія 10 гадоў навучэнцы і педагогі заваявалі больш за 

200 прызавых месцаў на міжнародных конкурсах, а іх чэмпіёны — найлепшыя выпускнікі — вяртаюцца ў родны каледж ужо выкладчыкамі. Сёння 70 % педработнікаў каледжа — яго выпускнікі.

Тое, наколькі жаданне вучыцца і працаваць важна для любога чалавека, творчая педагагічная каманда Гомельскага дзяржаўнага каледжа бытавога абслугоўвання адлюстравала ў лозунгах пры ўваходзе і выхадзе. Калі перасякаеш парог, чытаеш: «Помнім мінулае, шануем сучаснасць, думаем аб будучыні». А калі ідзеш дадому пасля вучобы, працы, нагадваеш сабе: «Будучыня залежыць ад таго, што ты паспеў зрабіць сёння».

— Паміж гэтымі дзвюма фразамі і заключаны ўвесь наш цікавы, практыка-

арыентаваны навучальны працэс па падрыхтоўцы не проста спецыялістаў, а паспяховых прафесіяналаў і патрыётаў сваёй краіны, — матывуе на творчы падыход у любой справе калектыў Гомельскага дзяржаўнага каледжа бытавога абслугоўвання.

Наталля КАПРЫЛЕНКА

фота аўтара