Беларускае — значыць якаснае

Для кандытарскіх прадпрыемстваў гарачая пара па падрыхтоўцы навагодніх падарункаў пачынаецца зусім не зімой. Як адзначае намеснік начальніка ўпраўлення па вытворчасці прадуктаў харчавання канцэрна «Белдзяржхарчпрам» Ксенія ГЕРШОНЧЫК, работа вядзецца практычна круглы год. Справа ў тым, што працэс уключае ў сябе не толькі вытворчасць, але і карпатлівую работу над дызайнам упакоўкі і фарміраваннем напаўнення падарункаў з улікам пажаданняў спажыўцоў.

А яны, у сваю чаргу, вельмі разнастайныя і зменлівыя. Аднак пастаянным застаецца адно: атрымаць салодкі падарунак, сабраны з айчыннай прадукцыі, лічыцца ў жыхароў і гасцей нашай краіны прэстыжным. І нядзіўна: у свядомасці масавага спажыўца даўно замацавалася, што беларускае — значыць якаснае. Пра гэта згадала і Ксенія Гершончык: «Нашы прадпрыемствы ўстанаўліваюць да сваёй прадукцыі жорсткія патрабаванні, якія ажыццяўляюцца на ўсіх этапах тэхналагічнага працэсу, — ад сыравіны да кантролю якасці гатовай прадукцыі».

• У прыклад спецыяліст прывяла прынцыповую пазіцыю айчынных вытворцаў. Беларускія прадпрыемствы кандытарскай галіны не пайшлі на паслабленне патрабаванняў да шакаладнай глазуры, не павялічылі долю эквівалентаў масла какавы. Дзякуючы гэтаму беларуская кандытарская прадукцыя ў шакаладзе і шакаладнай глазуры раўнацэнная па сваіх якасных характарыстыках і адпавядае патрабаванням міжнародных стандартаў. Высокая якасць пацвярджаецца і шматлікімі ўзнагародамі на айчынных і замежных конкурсах. Нагадаем: у 2024 годзе ў міжнародным фестывалі-конкурсе «Выбар года» «Камунарка» стала пераможцам у намінацыі «Шакалад беларускай вытворчасці». А лінейка чорнага шакаладу без цукру ад гэтай фабрыкі — сярод першых уладальнікаў Знака якасці.

Прычым прадпрыемствы не стаяць на месцы, пастаянна мадэрнізуючы абсталяванне і запускаючы новыя тэхналагічныя лініі. Так у вытворцаў з’яўляецца магчымасць выпускаць як імпартазамяшчальную, так і па-сапраўднаму інавацыйную прадукцыю. Сярод самых значных праектаў апошняга часу — выраб на філіяле кандытарскай фабрыкі «Слодыч» вафельных рулецікаў, а таксама мяккай карамелі розных фарматаў. А вось на «Чырвоным харчавіку» ўсталявана лінія па вытворчасці дражэ на аснове шакаладу — між іншым, прадукт імпартазамяшчальны. «Чырвоны Мазыранін», у сваю чаргу, на ўсю моц асвойвае вытворчасць ірысу тыражаванага на новай лініі, тут жа ў далейшым плануецца выпускаць высокабялковыя батончыкі і казінакі.

Сярод навінак варта адзначыць і лімітаваную серыю зефіру «Чырвонага харчавіка» — з астуджальным і сагравальным эфектам. Увогуле, сёлета «Белдзяржхарчпрам» парадаваў пакупнікоў незвычайнымі смакамі — чаго варта тая ж халва са скваркамі і цыбуляй, зефір са смакам колы і ванілі ці цукеркі са смакам кактуса і маліны. Для тых, хто аддае перавагу больш класічным варыянтам, існуе белы шакалад з лімоннай і какосавай начынкамі.

Падарункаў — мільёны

У структуру «Белдзяржхарчпрама» ўваходзяць шэсць арганізацый кандытарскай галіны, дзве з якіх — «Камунарка» і «Спартак» — з’яўляюцца найбуйнейшымі вытворцамі салодкіх навагодніх падарункаў. «На бягучы сезон у нас вялікія планы. Плануецца вырабіць каля 2 мільёнаў 800 тысяч адзінак навагодніх падарункаў. У адносінах да аналагічнага перыяду мінулага года — на 20 % вышэй, каб задаволіць увесь наяўны попыт спажыўцоў. Большая частка гэтых падарункаў ужо гатовая», — падзялілася падрабязнасцямі намеснік начальніка ўпраўлення па вытворчасці прадуктаў харчавання канцэрна.

Так, падрыхтоўка да Новага года на «Камунарцы» пачалася 15 верасня, і за гэты час было выраблена 314 тысяч святочных набораў. Як паведаміла намеснік генеральнага дырэктара па вытворчасці Юлія ГАСЦЕЕВА, найбольш папулярныя ў беларусаў падарункі вагой 1 кг: «У кастрычніку тэмп росту склаў 580 тысяч штук навагодніх пачастункаў, у лістападзе ідзём з апераджальнымі тэмпамі. Арыентуемся на выпуск 1,5 мільёна штук навагодніх падарункаў, якія карыстаюцца традыцыйна вялікім попытам».

Першачарговая задача — забеспячэнне ўнутранага рынку, але частка кандытарскай прадукцыі адправіцца і на экспарт, галоўным напрамкам якога традыцыйна застаецца Расія. Паралельна з гэтым наладжаны пастаўкі ў дзяржавы далёкага замежжа. Асобыя перспектывы для развіцця галіны мае і кітайскі рынак: «Нашы кандытарскія прадпрыемствы, нашы спецыялісты сапраўды актыўна працуюць на тое, каб задаволіць патрабаванні ўсіх спажыўцоў. І вельмі спадзяёмся, што не толькі ў рамках навагодняй кампаніі, але і кожны дзень мы будзем цешыць іх сваімі кандытарскімі вырабамі», — рэзюмавала Ксенія Гершончык.

Аміна НАЗАРАВА

Фота Ксеніі ЛІННІК