Кіраўнік МЗС адзначыў, што Алжыр у пэўнай ступені самадастатковая дзяржава — адзін з лідараў здабычы газу, нафты. «Але ў той жа час, сутыкнуўшыся з такімі адносінамі з боку Еўрапейскага саюза, асобных краін (размова ў тым ліку пра параўнальна нядаўняе каланіяльнае мінулае і барацьбу за незалежнасць. — «Зв.»), пачынае ўсё больш развіваць сваю ўласную прамысловасць, энергетыку», — сказаў ён.
«У гэтым, зразумела, сваімі тэхналогіямі мы можам дапамагчы. Пастаўкай і зборкай тут тэхнікі, патрэбнай ім для асваення новых зямель. У іх ёсць такая праграма „зялёная“, дзе могуць спатрэбіцца нашы энерганасычаныя трактары, — заявіў Максім Рыжанкоў. — Ідзе вельмі сур’ёзнае абнаўленне парку пасажырскай тэхнікі. Тут ёсць перспектывы і для нашых аўтобусаў, іншай камунальнай тэхнікі, электробусаў і гэтак далей».
Ёсць перспектывы супрацоўніцтва і ў будаўнічай сферы, дзе таксама можа спатрэбіцца беларуская тэхніка.
«Калі гаворым пра зборачную вытворчасць — тут мы прыходзім. Калі пра сельскую гаспадарку — арэхі, фінікі, фрукты — мы будзем гатовы ў Алжыры купляць гэта для беларускіх грамадзян», — абазначыў кіраўнік МЗС узаемадапаўняльны складнік супрацоўніцтва.
Максім Рыжанкоў таксама звярнуў увагу, што ў Алжыры развіты фармацэўтычны комплекс, і тут можна папрацаваць над тым, каб праз узаемадзеянне развіць кампетэнцыі адно аднаго па неабходных прэпаратах. Напрыклад, у Алжыры патрэбны беларускія прэпараты для барацьбы з анказахворваннямі.
Асобная тэма — пастаўкі прадуктаў харчавання з Беларусі. «На сённяшні момант даводзіцца канстатаваць, што пастаўкі сухога малака, сыроваткі, нейкіх падобных тавараў — гэта аснова нашага гандлю з Алжырам. Гэта сапраўды вельмі сур’ёзныя аб’ёмы. Дзякуючы рабоце, якую мы правялі з алжырскім бокам, і падтрымцы Прэзідэнта Алжыра, нам удалося атрымаць сертыфікаты на ўсю нашу малочную прадукцыю, што дае магчымасць сёння без перашкод тут гандляваць», — сказаў кіраўнік МЗС.
«У апошнія дні было прынята рашэнне аб уключэнні ў гэты пералік яшчэ і прадуктаў малочнага дзіцячага харчавання, што таксама адкрывае даволі сур’ёзныя перспектывы», — дадаў міністр.
Ён удакладніў, што размова перш за ўсё ідзе пра аптовыя пастаўкі з далейшай расфасоўкай ужо на тэрыторыі Алжыра для рэалізацыі як на ўнутраным рынку гэтай краіны, так і далей у іншых краінах рэгіёна.
Адказваючы на пытанне аб тым, як Алжыр упісваецца ў беларускую стратэгію прасоўвання на Афрыканскім кантыненце, Максім Рыжанкоў сказаў: «Абсалютна. Яны вельмі адкрытыя да супрацоўніцтва, яны бачаць у нас перспектыўнага партнёра. Няма ніякіх праблем у гісторыі, якія абцяжарвалі б нашы адносіны. Нават наадварот, у нас вельмі шмат агульнага, ад чаго мы можам адштурхоўвацца ў развіцці палітычнага дыялогу».
«Тэрыторыя Алжыра можа стаць таксама пэўным хабам для далейшага прасоўвання нашых тавараў у Афрыцы. Яны таксама спадзяюцца на наша садзейнічанне ў прасоўванні тавараў з Алжыра на тэрыторыі Еўразійскага эканамічнага саюза», — рэзюмаваў кіраўнік МЗС.
Таксама Беларусь і Алжыр у пытаннях свайго гістарычнага развіцця маюць шмат падобнага і на міжнароднай арэне выступаюць з адзіных пазіцый, адзначыў Максім Рыжанкоў.
«Гэта дзяржава-аднадумца. Фактычна мы выступаем на міжнароднай арэне з адзіных пазіцый. Што датычыцца любых кірункаў: абароны Статута ААН, пабудовы больш справядлівага шматпалярнага свету, вырашэння мірным шляхам пытанняў міжнароднай павесткі», — сказаў міністр.
Паводле слоў Максіма Рыжанкова, пытанні адказнасці еўрапейскіх краін за каланіялізм і за генацыд — гэта таксама адно з сувязных звёнаў агульнай палітыкі Беларусі і Алжыра.
Ён расказаў, што ў час знаходжання ў Алжыры меў магчымасць наведаць мясцовы музей, дзе пачарпнуў для сябе шмат новай інфармацыі адносна барацьбы алжырскага народа за сваю незалежнасць. Прычым гэта ўжо адбывалася ў перыяд пасля Другой сусветнай вайны. «Аказваецца, зусім нядаўна. І нават пазней, чым у нас быў генацыд супраць савецкага і беларускага народа з боку Германіі. Французскія ўлады ў барацьбе за незалежнасць Алжыра фактычна аддалі генацыду амаль паўтара мільёна чалавек. Тая глыбокая рана да гэтага часу жыве ў алжырскім грамадстве», — адзначыў кіраўнік МЗС.
«Гэта падобна і да нашых падыходаў да так званай еўрапейскай дэмакратыі, якая менавіта такімі спосабамі спрабавала прывесці „дэмакратыю“ ў такія краіны, як Беларусь і Алжыр, — сказаў Максім Рыжанкоў. — Таму мы вельмі добра разумеем тэмы развіцця, мы вельмі добра ведаем, што нас чакае там — у „цывілізаванай“ Еўропе. Мы вельмі добра разумеем, што, толькі абапіраючыся на ўласныя ўнутраныя сілы, мы можам развівацца. І для свайго развіцця павінны кансалідаваць нацыю і поўнасцю трымаць пад кантролем усё ўнутранае развіццё. І сацыяльна-эканамічнае, і палітычнае. У гэтым мы падобныя з Алжырам».
Паводле БелТА.
