Алжыр — ужо чацвёртая дзяржава, якую Прэзідэнт наведвае падчас вялікай камандзіроўкі па краінах блізкага і далёкага замежжа. У гэтую краіну Аляксандр Лукашэнка прыбыў з Амана, дзе ён знаходзіўся з рабочым візітам. Да гэтага беларускі лідар наведаў М’янму і Кыргызстан.

Гэта першы візіт на вышэйшым узроўні ў гісторыі адносін паміж дзвюма краінамі. Каля трапа самалёта кіраўніка дзяржавы сустракаў Старшыня Савета нацыі Алжырскай Народнай Дэмакратычнай Рэспублікі Насеры Азуз.

Фактычна адразу пасля прылёту беларускі лідар правёў некалькі двухбаковых сустрэч.

«Дынаміка нашых адносін значна ўзмацнілася»

На сустрэчы са спікерам Нацыянальнай народнай асамблеі Алжырскай Народнай Дэмакратычнай Рэспублікі Ібрагімам Бугалі Аляксандр Лукашэнка выказаў упэўненасць, што Беларусь і Алжыр змогуць значна нарасціць тавараабарот.

«У апошнія гады дынаміка нашых адносін значна ўзмацнілася, і ў гэтым кірунку нам трэба рухацца. Але той тавараабарот, які мы маем на сённяшні дзень, зусім не адлюстроўвае патэнцыялу нашых краін. Мы правялі тут форум дзелавых колаў Беларусі і Алжыра, устанавілі адносіны непасрэдна паміж кампаніямі. Думаю, нам удасца значна павялічыць тавараабарот. Мы абавязковыя людзі і будзем няўхільна выконваць нашы дамоўленасці. Тармажэння з нашага боку не будзе», — сказаў Аляксандр Лукашэнка.

Кіраўнік дзяржавы адзначыў, што Беларусь — машынабудаўнічая краіна з развітой сельскай гаспадаркай. «Многія кірункі нам удалося развіць. Мы гатовы з вамі гэтым дзяліцца», — запэўніў беларускі лідар.

Па выніках 2024 года тавараабарот склаў крыху больш як 49 млн. долараў, з якіх практычна ўвесь аб’ём — гэта беларускі экспарт.

«Мы заўсёды будзем чакаць вас і дэпутатаў парламента ў Беларусі з мэтай азнаямлення з нашымі магчымасцямі», — звярнуўся Аляксандр Лукашэнка да Ібрагіма Бугалі.

«Парламенты абавязаны будуць адыграць найважнейшую ролю ў рэалізацыі нашых дамоўленасцяў», — падкрэсліў беларускі лідар.

Аляксандр Лукашэнка адзначыў, што нядаўна дэлегацыя дэпутатаў з Алжыра наведала Беларусь і візіт прайшоў вельмі добра. «Гэты абмен дэлегацыямі трэба падтрымліваць. Мы заўсёды будзем чакаць вас і дэпутатаў парламента ў любы час у Беларусі і гатовы аказаць вам усялякае садзейнічанне з мэтай азнаямлення з нашымі магчымасцямі», — сказаў ён.

У сваю чаргу Ібрагім Бугалі выказаў упэўненасць, што афіцыйны візіт Прэзідэнта Беларусі будзе дабратворным для абодвух бакоў. Сімвалічна, што ён праходзіць у год 30-годдзя ўстанаўлення дыпламатычных адносін паміж Беларуссю і Алжырам.

Спікер парламента павіншаваў беларускі бок з дасягненнямі ў прамысловасці, сельскай гаспадарцы і іншых галінах. «Ваша палітычная сістэма вельмі добрая, таму што дабратворная для вашай краіны, — сказаў ён. — Ваша эканамічная сістэма вельмі падобная на алжырскую. Яна забяспечвае незалежнасць краіны».

Ібрагім Бугалі канстатаваў рост інтэнсіўнасці супрацоўніцтва і тавараабароту, абмен шэрагам візітаў.

«Мы можам дасягнуць вельмі добрых вынікаў і ў сельскай гаспадарцы, і ў прамысловасці. У вас вельмі добрая вытворчасць трактароў. Гэта нас вельмі цікавіць, роўна як і іншыя тавары, якія вырабляюцца ў Беларусі», — дадаў спікер парламента.

Ібрагім Бугалі заявіў, што і на парламенцкім узроўні адносіны добра развіваюцца, і падзякаваў за цёплы прыём у Беларусі парламенцкай дэлегацыі з Алжыра. Беларускім парламентарыям таксама накіравана запрашэнне здзейсніць візіт у Алжыр.

Спікер парламента падкрэсліў, што бакі аб’ядноўвае супадзенне поглядаў па ключавых пытаннях. «Спадзяёмся, што мы ўмацуем гэтыя адносіны ў будучыні. Каб у нас былі сумесныя праекты, якія мы рэалізуем у найбліжэйшы час», — рэзюмаваў ён.

Патрэбны працаздольны план дзеянняў

На сустрэчы з прэм’ер-міністрам Алжыра Сіфі Грыебам Аляксандр Лукашэнка акцэнтаваў увагу на неабходнасці выпрацоўкі дакладнага плана ўзаемадзеяння.

«Мы абавязкова павінны выпрацаваць абсалютна працаздольны план нашых адносін, нашых дзеянняў», — сказаў кіраўнік дзяржавы, гаворачы аб неабходнасці распрацоўкі дарожнай карты развіцця супрацоўніцтва.

«Я добра разумею, што такое Алжыр для Афрыкі. Мы супрацоўнічаем са многімі краінамі Афрыканскага кантынента, бо за Афрыкай будучыня», — падкрэсліў беларускі лідар.

Кіраўнік дзяржавы адзначыў, што ўся прадукцыя, якая вырабляецца ў Беларусі, патрэбна ў Алжыры. Ён звярнуў увагу, што гэта краіна, як і многія іншыя на Афрыканскім кантыненце, арыентуецца перш за ўсё на набыццё тэхналогій. «Мы гатовы забяспечыць вас тэхналогіямі ў галіне машынабудавання, нафтахіміі, хіміі, сельскай гаспадаркі, ІT-тэхналогій. Мы гатовы з вамі супрацоўнічаць у сферы ваенна-прамысловага комплексу. Словам, закрытых тэм у нашых адносінах няма», — сказаў Аляксандр Лукашэнка.

Ён прапанаваў спецыялістам з Алжыра і прэм’ер-міністру асабіста прыехаць у Беларусь, вывучыць існуючыя магчымасці і прыняць рашэнне ў рамках таго, што трэба ўзяць з Беларусі. «І ў гэтым кірунку мы будзем працаваць, — запэўніў кіраўнік дзяржавы. — Прыязджайце ў Беларусь, вызначыцеся, што вам выгадна, што вам трэба. Калі мы нешта зможам зрабіць для вас, будзем толькі рады».

Прэзідэнт адзначыў, што спецыялісты з Беларусі дапамогуць наладзіць тэхналагічнае супрацоўніцтва, але ў выніку ў Алжыры павінны працаваць мясцовыя людзі. «Мы павінны навучыць вашых людзей гэтым тэхналогіям, за кошт чаго і павялічыць наш тавараабарот», — сказаў Аляксандр Лукашэнка.

Кіраўнік дзяржавы таксама звярнуў увагу на адзін важны момант: «Грошы сёння — а заўтра тым больш — нічога не значаць. Вы бачыце, што адбываецца. Жудасная інфляцыя па асноўных рэзервовых валютах у свеце. Таму нас жыццё падштурхоўвае да таго, каб інвесціраваць, укладваць гэтыя грошы ў канкрэтныя праекты».

«Калі алжырскі бок жадае з намі супрацоўнічаць (а я ведаю, што жадае — у нас вялікі вопыт супрацоўніцтва перш за ўсё ў рамках Савецкага Саюза), у нас ёсць гэты вопыт, і нам трэба выкарыстаць яго і рухацца ў гэтым кірунку, вырашаючы надзённыя задачы, якія хвалююць нашы народы. Трэба спяшацца. Ні ў якім разе нельга марудзіць, час такі», — рэзюмаваў кіраўнік дзяржавы.

У сваю чаргу Сіфі Грыеб адзначыў, што афіцыйны візіт Аляксандра Лукашэнкі праходзіць якраз пасля таго, як краіны адзначылі 30-годдзе ўстанаўлення дыпламатычных адносін.

Ён канстатаваў узрастаючую дынаміку адносін Беларусі і Алжыра пасля шэрагу папярэдніх візітаў на высокім узроўні. «Мы змаглі ўжо вызначыць, па якіх кірунках можна развіваць супрацоўніцтва. У сферах прамысловасці, сельскай гаспадаркі, фармацэўтыкі, па стартапах», — адзначыў прэм’ер-міністр Алжыра.

Сіфі Грыеб упэўнены, што бізнес-форум, які прайшоў у Алжыры напярэдадні афіцыйнага візіту Прэзідэнта Беларусі, і дасягнутыя на ім дамоўленасці нададуць новы імпульс двухбаковым адносінам.

«Алжыр з’яўляецца дзвярыма для Афрыкі. Гэта дае магчымасць для гандлю з афрыканскімі дзяржавамі. Можна скласці базіс для двухбаковых адносін і скласці дарожную карту», — сказаў ён.

***

3 снежня кіраўнік беларускай дзяржавы Аляксандр Лукашэнка і Прэзідэнт Алжыра Абдэльмаджыд Тэбун правядуць перагаворы ў вузкім і пашыраным складах з акцэнтам на паглыбленне гандлёва-эканамічнага супрацоўніцтва і рэалізацыю ўзаемавыгадных двухбаковых праектаў. Плануецца абмеркаваць перспектывы паставак тэхнікі і кааперацыі, узаемадзеяння ў аграпрамысловым комплексе, медыцыне, адукацыі і гуманітарнай сферы ў цэлым.

Па выніках перагавораў лідараў краін і візіту ў цэлым плануецца падпісанне двухбаковых дакументаў па развіцці супрацоўніцтва ў розных сферах.

Паводле БелТА