— За 2021–2024 гады ў апрацоўчай прамысловасці, якая з’яўляецца асноўным лакаматывам развіцця рэгіёна, аб’ёмы вытворчасці ў фактычных цэнах узраслі ў 1,7 раза, экспарт высокатэхналагічных тавараў— у 7,8 раза, — адзначыў старшыня камітэта эканомікі Віцебскага аблвыканкама Дзмітрый Навацкі. — Больш за 58 % інвестыцый вобласці накіравана ў сферу вытворчасці. Забяспечаны рост намінальнай налічанай сярэднямесячнай зарплаты ў 1,8 раза, уласных даходаў бюджэту — у 2 разы.
Грашовыя даходы на душу насельніцтва вобласці павялічыліся з 671,9 руб. у 2020 годзе да 1159,2 руб. у 2024-м. Рэальныя наяўныя даходы насельніцтва выраслі на 14,3 %. Суадносіны намінальнай зарплаты па вобласці да сярэднерэспубліканскага ўзроўню павялічыліся з 82,7 % у 2022 годзе да 83,4 % — у студзені — кастрычніку 2025-га. Міжрэгіянальная дыферэнцыяцыя па ўзроўні аплаты працы скарацілася ў 18 раёнах вобласці.
За чатыры гады вобласць спрацавала з ростам валавога рэгіянальнага прадукту (102,6 % да 2020 года), прамысловай вытворчасці (100,8 %), рознічнага і аптовага тавараабароту (112,5 % і ў 2,5 раза адпаведна), грамадскага харчавання (у 1,4 раза), пасажыраабароту, экспарту тавараў і паслуг у 2,7 і 2,2 раза адпаведна.
Валавы рэгіянальны прадукт на душу насельніцтва павялічыўся ў 1,9 раза з 10,4 тыс. руб. у 2020 годзе да 19,7 тыс. руб. у 2024-м, інвестыцыі ў асноўны капітал — у 1,5 раза з 2,5 тыс. руб. да 3,7 тыс. руб.
Восем з 13 галін апрацоўчай прамысловасці забяспечылі рост аб’ёмаў вытворчасці. Нарошчваецца аб’ём экспартных паставак. У сельскай гаспадарцы рост вытворчасці прадукцыі жывёлагадоўлі ацэньваецца на ўзроўні 105 %. Да канца пяцігодкі плануецца пабудаваць больш за 1,7 млн кв. м жылля.
Расце інвестыцыйная актыўнасць бізнесу. Доля інвестыцый у аб’ёме валавога рэгіянальнага прадукту павялічылася з 14,8 % у 2022 годзе да 19,6 % у студзені — кастрычніку 2025-га і перасягнула рэспубліканскі ўзровень. Тэмп прыросту інвестыцый штогод апярэджваў сярэднерэспубліканскае значэнне.
У рэальным сектары эканомікі з 2021 года рэалізавана больш за 160 інвестыцыйных праектаў, з іх трэцяя частка — у малых і сярэдніх населеных пунктах. Створана больш за 2 тысячы працоўных месцаў.
У рамках ініцыятывы «Адзін раён — адзін праект» рэалізавана 17 інвестыцыйных праектаў, сярод якіх — вытворчасць харчовых араматызатараў ТАА «Скорпіа-кветка» ў Бешанковіцкім раёне, рыбнай прадукцыі ТАА «Лукомльскі кансервавы завод» у Чашніцкім раёне, фруктовых і агароднінных сокаў ТАА «Арганічныя прадукты» ў Шаркаўшчынскім раёне, будаўніцтва цэха па перапрацоўцы малака і вытворчасці сыроў ДЗУП «Эльрост» у Гарадоцкім раёне. Асвоена 417,3 млн руб. інвестыцый у асноўны капітал. Створана 485 працоўных месцаў. Да канца 2025 года плануецца завяршыць рэалізацыю яшчэ васьмі праектаў.
З 2021 года прамысловымі прадпрыемствамі вобласці прыцягнута больш за 5,9 млрд руб. інвестыцый у асноўны капітал, або каля 1,2 млрд руб. у сярэднім за год. Пастаянна мадэрнізуюцца вытворчасці, ідзе тэхнічнае пераўзбраенне прамысловага комплексу. Так, ЗУП «ВІК — здароўе жывёл» і ТАА «Белкаралін» увялі ў эксплуатацыю новыя вытворчасці, СТАА «Манулі Гідраўлікс Мануфактурынг Бел» асвоіла вытворчасць рукавоў высокага ціску.
УП «Мёрскі мясакамбінат» завяршыла праект «Тэхнічная мадэрнізацыя халадзільнай камеры ў будынку забойнага ўчастка», ААТ «Аршанскі інструментальны завод» — праект «Арганізацыя вытворчасці сучаснага металарэзнага і дапаможнага інструмента з укараненнем інавацыйных тэхналагічных працэсаў». У філіяле «Аршанскі хлебазавод» ААТ «Віцебскхлебпрам» запусцілі лініі па вытворчасці мафінаў, замарозкі хлеба, вытворчасці жытнёва-пшанічнага подавага збожжа. Гэта дало магчымасць палепшыць структуру выпуску прамысловай прадукцыі ў частцы росту ў агульным аб’ёме вытворчасці долі галін, якія працуюць на мясцовых і высокатэхналагічных сыравінных рэсурсах.
— Ацэньваючы работу прамысловага комплексу ў бягучай пяцігодцы, можна вылучыць шэраг галін, якія з’яўляюцца драйверамі росту аб’ёмаў вытворчасці ў супастаўных умовах, — адзначыў Дзмітрый Навацкі. — Гэта металургічная вытворчасць, вытворчасць гатовых вырабаў, электраабсталявання і машын, вылічальнай, электроннай і аптычнай апаратуры, іншых гатовых вырабаў, фармацэўтычнай прадукцыі.
Вобласць падтрымлівае знешнія гандлёва-эканамічныя адносіны больш як са 100 краінамі. Тройку асноўных партнёраў фарміруюць Расія, Кітай, Казахстан, трэцюю частку экспарту ў якія складаюць харчовыя тавары і сельскагаспадарчая сыравіна. Прадпрыемствы вобласці актыўна асвойваюць рынкі краін Блізкага Усходу і Паўднёва-Усходняй Азіі. У бягучым годзе забяспечаны рост экспартных паставак мясных кансерваў, сыру, лесаматэрыялаў, металапракату, лекавых прэпаратаў, прысадак да маслаў, тэлевізараў, мэблі. Траціна прадукцыі, што экспартуецца (без уліку нафтапрадуктаў), адносіцца да высока- і сярэднетэхналагічнай.
Паток турыстаў, якія наведалі Віцебскую вобласць у 2024 годзе, у 1,7 раза перасягнуў паказчык 2020-га. Экспарт турыстычных паслуг вырас у 4,5 раза.
Святлана ЯКАЎЛЕВА
Фота БелТА
