Паводле яго слоў, запуск тайландскіх рэйсаў стане знакавай падзеяй. «Мы пачынаем палёты ў новую для нас краіну. Гэта ўжо 17-я краіна на карце палётаў „Белавія“, — адзначыў Ігар Чаргінец. Першы рэйс адбудзецца 8 студзеня ў Патаю (аэрапорт Утапао), адкуль пасажыры змогуць з лёгкасцю дабрацца да Бангкока. Праз некалькі дзён, 11 студзеня, будуць адкрыты рэйсы на Пхукет.

Загрузка, паводле слоў кіраўніка авіякампаніі, ужо цяпер вельмі высокая: „Пхукет крыху больш запатрабаваны, чым Патая. Гэта не значыць, што загрузка туды слабая — яна добрая, проста на Пхукет жадаючых больш“. Рэйсы будуць выконвацца на новых Aіrbus A330, а працягласць палёту — прыблізна 10 гадзін. Пакуль рэйсы будуць чартэрнымі, але ідзе работа над тым, каб пераўтварыць іх у рэгулярныя.

Разам з тайландскімі рэйсамі „Белавія“ рыхтуецца да шэрагу іншых важных падзей. З 18 снежня пасля чатырохгадовага перапынку з’явяцца рэйсы ў Алматы. А 8 студзеня авіякампанія аднаўляе палёты ў Тэль-Авіў. Продаж білетаў ужо адкрыты. Увесну плануюцца рэйсы ў Іарданію, а таксама ў Туніс.

Паводле слоў Ігара Чаргінца, 2025 год можна лічыць для „Белавіі“ сапраўды прарыўным: „Былі прыкладзены вялікія намаганні ў папярэднія гады. Дальнемагістральныя самалёты дазволілі нам адкрыць новыя напрамкі — Санья ў Кітаі, В’етнам, Шры-Ланка. Цяпер — Тайланд“.

Першы намеснік міністра замежных спраў Сяргей ЛУКАШЭВІЧ адзначыў, што запуск новых рэйсаў у краіны Паўднёва-Усходняй Азіі стаў лагічным працягам маштабнай работы, якая вядзецца на дыпламатычным узроўні.

„Белавія“ фактычна ўварвалася ў рэгіён Паўднёва-Усходняй Азіі. Гэтаму папярэднічала планамерная работа МЗС. У ліпені міністр замежных спраў Максім Рыжанкоў наведаў Тайланд, і ўжо тады пытанне адкрыцця прамых авіязносін абмяркоўвалася з калегамі. І сёння мы бачым вынік», — падкрэсліў ён.

Асобна Сяргей Лукашэвіч звярнуў увагу на тое, што Беларусь паслядоўна працуе над тым, каб кантынентальная Паўднёва-Усходняя Азія стала бязвізавай зонай для беларускіх турыстаў.

Міхаіл ДАНІЛКОВІЧ.