Мы жывём у эпоху глабальных перамен. З мэтай захавання і ўмацавання свайго становішча на рынку мы павінны аператыўна рэагаваць на запыты спажыўцоў, як мінімум, не саступаць канкурэнтам па цане і якасці прадукцыі і выйграваць за кошт гнуткай стратэгіі продажаў, развіцця сэрвіснай сеткі, прадастаўлення пакупніку комплекснага суправаджэння нашай прадукцыі на ўсім працягу яе жыццёвага цыклу.
Відавочна, што сістэма продажаў у дадзеным выпадку з’яўляецца ключавым звяном, якое не толькі забяспечвае сувязь паміж вытворчасцю і спажыўцом, але і ставіць перад канструктарскімі падраздзяленнямі арганізацыі задачы па ўдасканаленні прадукцыі, стварэнні новых мадэляў тэхнікі і абсталявання. У сваю чаргу, наменклатура новай прадукцыі вызначае задачы забеспячэння і вытворчасці. Усе падраздзяленні арганізацыі павінны працаваць у адной звязцы.
Пытанні распрацоўкі кожнага вырабу павінны быць дэталёва прапрацаваны з пункту гледжання аптымізацыі выдаткаў. Прычым не толькі фінансавых і матэрыяльных, але і выдаткаў часу, бо хуткасць вываду на рынак новага вырабу вызначае, хто, як кажуць, «здыме вяршкі», то-бок заробіць, а хто будзе даганяць.
Кампанія, па перакананні Андрэя Кузняцова, эфектыўнай можа быць толькі пры доўгатэрміновым планаванні. Прычым, пры распрацоўцы стратэгіі на сярэдне- і доўгатэрміновы перыяды служба маркетынгу вызначае не толькі кірункі інавацыйнага развіцця, але і кірункі інвестыцыйнай дзейнасці.
На думку міністра, інвестыцыі павінны накіроўвацца на рабатызацыю, закупку высокапрадукцыйнага абсталявання, лічбавыя тэхналогіі. Усё гэта неабходна прамысловасці, як паветра. Кожны інвестыцыйны праект павінен забяспечваць зніжэнне выдаткаў, рост прадукцыйнасці працы, павышэнне дакладнасці апрацоўкі і якасці вырабаў.
Мадэрнізацыю неабходна праводзіць не толькі для фізічнага нарошчвання аб’ёмаў вытворчасці, але, у першую чаргу, для ўкаранення сучасных тэхналогій, асваення новай прадукцыі, якая знаходзіцца ў пачатку жыццёвага цыкла і на якой можна атрымаць больш высокую маржынальнасць.
Продажы павінны стаць не выпадковасцю, а кіраваным працэсам. Неабходна стварыць і на пастаяннай аснове падтрымліваць зваротную сувязь са спажыўцамі. Кліента нельга выпускаць з поля зроку ні на хвіліну. Трэба сачыць, як ён абслугоўвае тэхніку, якія ў яго ёсць пажаданні, прэтэнзіі, як ён развівае свой бізнес, калі ў яго заканчваецца тэрмін эксплуатацыі тэхнікі, каб загадзя прапанаваць варыянты абнаўлення парка. Такую сістэму перманентных зносін са спажыўцамі — не надакучлівую, але настойлівую — неабходна развіваць на кожным прадпрыемстве.
Пры гэтым служба маркетынгу павінна разумець, якімі тэхналагічнымі магчымасцямі валодае арганізацыя і як іх выкарыстоўваць па максімуме.
Зыходзячы з магчымасцяў і перспектыў развіцця, арганізацыі неабходна вырашаць задачы дыверсіфікацыі збыту, працаваць на перспектыўных рынках Афрыкі, Блізкага Усходу і Лацінскай Амерыкі, захоўваючы і ўмацоўваючы пазіцыі на традыцыйных рынках Расіі, Узбекістана, Казахстана і Азербайджана.
Задача кіраўніцтва кожнай арганізацыі і службы збыту, у прыватнасці, — навучыцца не толькі вырабляць якасную прадукцыю і асвойваць новыя рынкі. Кожнаму пакупніку неабходна паказваць і справай даказваць, што з намі працаваць больш выгадна, чым з канкурэнтамі, што беларускія машынабудаўнікі былі і будуць надзейнымі партнёрамі.
Рэзюмуючы сказанае, міністр адзначыў, што на сучасныя выклікі неабходна рэагаваць аператыўна і прадумана. Бягучыя праблемы павінны вырашацца, зыходзячы са стратэгічных мэт і задач арганізацыі, ломка вытворчага цыкла на карысць імгненнай патрэбы, як правіла, прыводзіць да негатыўных наступстваў. Каб забяспечыць паспяховую працу арганізацыі ў наш дынамічны час, варта ўкараняць прынцыпы сучаснага менеджменту. Гэтаму трэба вучыцца. Працаваць у новых умовах са старымі падыходамі да кіравання не атрымаецца. У гэтым Андрэй Кузняцоў перакананы.
Уладзімір ВАЛЧКОЎ
