Сабралі найбольш яркія цытаты беларускага лідара, агучаныя ім на Гомельшчыне, і абмеркавалі асноўныя акцэнты разам з экспертамі.

«Трэба кроў з носу аднавіць сельгастэхнікі! Трэба аднавіць у кожным раёне».

«Даручэнне Прэзідэнта павінна быць выканана рэальным працуючым прадпрыемствам у кожным раёне»

Як звярнуў увагу старшыня Пастаяннай камісіі па аграрнай палітыцы Палаты прадстаўнікоў Іван МАРКЕВІЧ, словы кіраўніка дзяржавы, якія прагучалі 24 красавіка падчас рабочай паездкі ў Мазырскі раён, з’яўляюцца дакладным стратэгічным арыенцірам для ўсіх узроўняў улады.

«Прэзідэнт цалкам справядліва акцэнтаваў увагу на тым, што наяўнасць у кожным раёне краіны спецыялізаваных прадпрыемстваў аграсэрвісу — гэта не проста пажаданне, а неабходная ўмова харчовай бяспекі і тэхналагічнай незалежнасці дзяржавы», — канкрэтызаваў дэпутат.

Чаму, па меркаванні парламентарыя, гэта прынцыпова важна. «Сельскагаспадарчая вытворчасць — высокатэхналагічная сфера, і прастой тэхнікі ў перыяд палявых работ абарочваецца прамымі стратамі ўраджаю і эканамічнай эфектыўнасці, — патлумачыў Іван Маркевіч. — Як справядліва адзначыў Аляксандр Рыгоравіч, праблема рамонту і абслугоўвання ўскладнілася не толькі з-за насычэння парка сучасным абсталяваннем, але і з-за кадравых пытанняў на месцах. Такім чынам, наяўнасць моцнага, аснашчанага і ўкамплектаванага кваліфікаванымі кадрамі „Мазыртэхсэрвіса“ або аналагічнай структуры ў кожным раёне — гэта рэальны механізм падтрымкі сельгаспрадпрыемстваў. Асабліва тых, у якіх няма ўласнай рамонтнай базы неабходнага ўзроўню».

Старшыня пастаяннай камісіі нагадаў, што кіраўнік дзяржавы назваў развіццё аграсэрвісаў найважнейшым праектам у кантэксце ініцыятывы «Адзін раён — адзін праект». «Гэта патрабуе ад мясцовай вертыкалі ўлады не фармальнага падыходу, а ўключэння пытання ў лік прыярытэтных інвестыцыйных і арганізацыйных задач, — адзначыў дэпутат. — Гаворка ідзе не толькі аб рамонце, але і аб мантажы абсталявання, пастаўках якасных запчастак — гэта значыць, аб поўным цыкле забеспячэння тэхнікай».

Па меркаванні Івана Маркевіча, даручэнне Прэзідэнта павінна быць выканана не фармальнай справаздачай, а рэальным працуючым прадпрыемствам у кожным раёне Беларусі.

«Трэба хутка зрабіць тое, што мы ўмеем рабіць. Нашы дзеці гэтага не зробяць»

«На першым месцы — чалавек і яго дабрабыт»

Старшыня праўлення Беларускага таварыства «Веды» Аляксей АЎДОНІН у эфіры ток-шоу «Будні» на «Альфа Радыё» патлумачыў, чаму Беларусь засяроджана на развіцці рэгіёнаў і сацыяльнай сферы.

«У наш час рэгіёны маюць патрэбу ў павышанай увазе, — адзначыў госць праграмы. — Калі ідзе перабудова сусветнай эканомікі, развіццё свайго ўнутранага рынку і ўласных рэгіёнаў становіцца прыярытэтным. І гэта актуальна не толькі для Беларусі. Многія краіны ўсведамляюць: калі знешні рынак і сусветная эканоміка нестабільныя, то лепшы рынак — унутраны. Мы актыўна развіваем свае рэгіёны, бо ў іх закладзены вялікі патэнцыял для інвестыцый і стварэння дабаўленай вартасці ў розных сектарах эканомікі: аграрным, прамысловым, харчовым».

Аляксей Аўдонін падкрэсліў, што кіраўнік дзяржавы ўдзяляе павышаную ўвагу стварэнню ў рэгіёнах новых прадпрыемстваў і рабочых месцаў. Па словах эксперта, важным складнікам развіцця рэгіёнаў з’яўляецца і сацыяльны аспект. «Калі ёсць праца, людзі не з’язджаюць у абласныя гарады і сталіцу, — канстатаваў Аляксей Аўдонін. — Яны імкнуцца развіваць сябе і свае гаспадаркі на зямлі, у рэгіёнах. Гэта вялізны патэнцыял. Задача дзяржавы — стварыць усе ўмовы для развіцця інфраструктуры і забеспячэння высокага ўзроўню бытавога абслугоўвання. І Прэзідэнт удзяляе пільную ўвагу таму, каб мясцовая ўлада паспяхова рэалізоўвала ўсе гэтыя праекты і працавала на карысць нашых грамадзян».
На думку госця эфіру, Беларусь можа выступаць ідэалагічным цэнтрам, які трансліруе ідэі сацыяльна арыентаванай эканомікі. «Мы паказваем на практыцы: на першым месцы — чалавек, яго дабрабыт і асобасны рост, — заўважыў эксперт. — А значыць, і развіццё грамадзяніна, і развіццё ўсяго грамадства».

«Трэба разабрацца, каб мы не трацілі лішнія грошы. Я не за тое, каб закрываць ФАПы, бальніцы ўчастковыя і гэтак далей. Але трэба паглядзець там, дзе трэба».

«Неабходна прытрымлівацца разумнага балансу дзяржаўных і эканамічных інтарэсаў»

Па словах члена Пастаяннай камісіі Палаты прадстаўнікоў па міжнародных справах Аляксандра ШПАКОЎСКАГА, вялікая камандзіроўка кіраўніка дзяржавы ў Гомельскую вобласць у чарговы раз прадэманстравала, што ўлады адкрыта гавораць не толькі аб дасягненнях, але і аб праблемах у рэгіёнах.

«Моцныя бакі падобных прэзідэнцкіх паездак — гэта праведзеная аналітычная работа і аб’ектыўнасць ацэнак, — адзначыў дэпутат у эфіры ток-шоу „Будні“ на „Альфа Радыё“. — Мы, з аднаго боку, заяўляем аб нашых паспяховых праектах, а з іншага — не саромеемся адкрыта гаварыць аб слабых баках».

На неабходнасць устаранення недахопаў, па словах парламентарыя, трэба звярнуць увагу не толькі кіраўнікоў рознага ўзроўню, але і радавых работнікаў. «Людзі павінны бачыць, што праблемы не закідаюцца пад дыван, — заўважыў ён. — Кіраўнік дзяржавы выдатна ведае, як людзі ставяцца да рознага роду паказушных праверак. Наш нацыянальны лідар заклікае чыноўнікаў і дзяржапарат заўсёды зыходзіць з меркавання людзей і працаваць „ад зямлі“, дэманструе, як гэта трэба рабіць».

Гаворачы аб арганізацыі сістэмы аховы здароўя ў рэгіёнах, Аляксандр Шпакоўскі акцэнтаваў увагу на тым, што дзяржава выконвае свае сацыяльныя абавязацельствы. «Ні ў якім разе нельга дапускаць разрыву ў якасці жыцця (а паслугі ў сферы аховы здароўя — адзін з элементаў якасці жыцця чалавека) паміж рэгіёнамі, абласнымі цэнтрамі і сталіцай, — лічыць дэпутат. — З іншага боку, неабходна прытрымлівацца разумнага балансу дзяржаўных і эканамічных інтарэсаў, а таксама ўлічваць асабістыя і кар’ерныя стратэгіі беларускіх урачоў. Прэзідэнт сказаў, што, нягледзячы на ўсе выдаткі, ФАПы на месцах трэба захоўваць. Вось па гэтым шляху і пойдзем».

«Павінна быць жалезная дысцыпліна, калі мы хочам выжыць».

«Абраная стратэгія развіцця Гомельскай вобласці паслядоўна рэалізуецца і дае адчувальны вынік»

Як адзначыла член Пастаяннай камісіі Савета Рэспублікі па рэгіянальнай палітыцы і мясцовым самакіраванні, старшыня Гомельскага абласнога Савета дэпутатаў Кацярына ЗЕНКЕВІЧ, кіраўнік дзяржавы заўсёды знаходзіць час для наведвання Гомельскай вобласці, надае ўвагу ўсім пытанням жыцця людзей у паўднёва-ўсходнім рэгіёне.

«У ходзе візіту Прэзідэнт дакладна абазначыў прыярытэты далейшага развіцця і эканомікі, і сацыяльнай сферы, — канкрэтызавала сенатар. — Асаблівая ўвага была засяроджана на адраджэнні палескіх зямель. Вядома, Прэзідэнт вылучыў перспектыўныя кірункі работы, у якіх неабходна паскорыцца. Канкрэтная пазіцыя кіраўніка дзяржавы прагучала ў адносінах да аграрнага сектара. Зямля — стратэгічны рэсурс краіны, які патрабуе максімальнай аддачы. І ў гэтай сферы, як зрэшты і іншых, востра стаіць пытанне захавання дысцыпліны, захавання тэхналогій, эфектыўнасці і якасці працы. І патрабаванні да выніку заканамерна ўзрастаюць».

Асаблівую ўвагу падчас гэтай камандзіроўкі, як удакладніла парламентарый, кіраўнік дзяржавы ўдзяліў сацыяльнай сферы. «Якасці медыцыны, развіццю адукацыі, забеспячэнню жыллём і ў цэлым задавальненню базавых патрэб, якія павінны быць гарантаваны незалежна ад месца пражывання людзей, — падкрэсліла Кацярына Зенкевіч. — Пры гэтым акцэнт зроблены на якасці работы і ў гэтым кірунку, і вынік павінен быць адчувальным для кожнага чалавека».
Па словах члена Савета Рэспублікі, у вобласці будзе прадоўжана будаўніцтва сучасных вытворчых аб’ектаў. «Як было адзначана, праграма „Адзін раён — адзін праект“ дае кожнаму раёну шанс абаперціся на свае моцныя бакі, — канстатавала яна. — І яе рэалізацыя паказвае станоўчыя вынікі. Вядома, такая работа будзе працягвацца».

Кацярына Зенкевіч адзначыла, што па выніках візіту Прэзідэнта і тым пытанням у рэгіёне, на якія кіраўнік дзяржавы скіраваў асаблівую ўвагу, дакладна можна сказаць, што абраная стратэгія развіцця Гомельскай вобласці паслядоўна рэалізуецца і дае адчувальны вынік. «Рэгіён прайшоў шлях ад аднаўлення да ўстойлівага росту, сфарміравана эканамічная база, забяспечаны сацыяльныя стандарты, — заўважыла сенатар. — Прынятыя рашэнні ўзмацняюць гэты курс і задаюць канкрэтныя арыенціры для далейшай працы».

Вераніка КАНЮТА, Наталля КАПРЫЛЕНКА