«Поўнасцю прайшоў этап рэгістрацыі. Цяпер лічаныя адзінкі дзяцей, якія па пэўных жыццёвых абставінах не змаглі своечасова зарэгістравацца на іспыты, маюць магчымасць падаць адпаведныя хадайніцтвы ў дзяржаўную камісію. Іх мы, вядома, у многім стараемся разгледзець станоўча, для таго каб даць магчымасць дзецям здаць цэнтралізаванае тэсціраванне і мець шанц паступіць у нашы ўніверсітэты», — расказаў Андрэй Іванец.
Традыцыйна ў гэтым годзе будуць працаваць каля 140 пунктаў здачы цэнтралізаванага экзамену. «Каб забяспечыць камфортны прыезд навучэнцаў, школы арганізуюць цэнтралізаваны транспарт. Што датычыцца спецыфікацыі тэстаў, змяненняў ніякіх няма — яны поўнасцю адпавядаюць базаваму ўзроўню школьнай праграмы. Працягласць выканання тэстаў сёлета застанецца такой жа, як і папярэднія гады. Такім чынам, можна быць упэўненымі, калі дзіця поўнасцю засвоіла школьную вучэбную праграму і старанна вывучала падручнікі, у яго ёсць усе магчымасці здаць на 100 балаў цэнтралізаваны экзамен», — падкрэсліў кіраўнік адукацыйнага ведамства.
Немалаважны аспект — гэта забеспячэнне празрыстасці і справядлівасці. «У сувязі з гэтым хацеў бы нагадаць усім юнакам і дзяўчатам, якія будуць здаваць цэнтралізаваныя экзамены, аб тым, што дзейнічаюць даволі строгія патрабаванні па праносу на іспыты не толькі мабільных устройстваў, але і любых іншых сродкаў сувязі, а таксама калькулятараў. Тут неабходна разумець, што з сабой трэба мець веды, чорную ручку і пашпарт. Гэтага дастаткова для таго, каб паспяхова прайсці іспыты. Традыцыйна цэнтралізаваны экзамен сумешчаны з цэнтралізаваным тэсціраваннем для таго, каб яшчэ раз падкрэсліць, што выпускнікі мінулых гадоў, якія здаюць ЦТ, і выпускнікі гэтага года, якія здаюць ЦЭ, знаходзяцца ў абсалютна адзіных, роўных і справядлівых умовах. Акрамя таго, дзякуючы асобнай увазе кіраўніка дзяржавы, у адпаведнасці з указам якога створана дзяржаўная камісія па кантролі за ходам падрыхтоўкі і правядзення ўступнай кампаніі, на кожным пункце будзе забяспечаны адпаведны незалежны кантроль членамі дзяржкамісіі», — дадаў міністр.
