Ужо прайшлі «сляпыя» дэгустацыі. Тэхнолагі, прадстаўнікі гандлёвых сетак, шэф-кухары, дыетолагі, галіновыя эксперты і звычайныя спажыўцы каштуюць прадукцыю — без усялякіх падказак, хто з’яўляецца яе вытворцам. Эксперты ацэньваюць не толькі якасць, але і знешні выгляд прадукцыі, тэкстуру, кансістэнцыю. Народныя дэгустатары могуць падзякаваць вытворцам як сваімі галасамі, якія пакідаюць у мабільным дадатку, так і падказкамі — што спадабалася ці наадварот засмуціла ў прадукцыі, прапановамі, як яе палепшыць, нават ідэямі аб тым, якія б новыя прадукты маглі б стаць запатрабаванымі.
Шпінатны хлеб і каўбаса з водарам клубніц
Народныя дэгустацыі праводзяцца таксама і падчас міжнароднай выстаўкі «Белагра». Тут вытворцы выстаўляюць і тыя тавары, якія ўжо знайшлі сваіх прыхільнікаў, і навінкі, якіх пакуль яшчэ няма ў продажы. Як, напрыклад, новы від згушчонкі са смакам апельсіна ў шакаладзе. Вытворцы гуляюць са смакамі — падаюць ласунак з водарам ляснога арэха, кавы, какавы, ванілі, ірландскага крэму. Мяняецца і ўпакоўка, да знаёмай бляшанкі дадаецца мяккая ўпакоўка. Прадстаўлены і новыя прадукты — пратэінавыя кактэйлі (сярод навінак, прадстаўленых на «Белагра», — бананавы і з фісташкамі), напоі на аснове малочнай сыроваткі, сухія сумесі для прыгатавання мяккага марожанага.
На «Белагра» можна пакаштаваць і шпінатны хлеб. Народныя дэгустацыі ўжо падказваюць, што попыт на такую прадукцыю будзе — значыць можна запускаць яе ў вытворчасць. Як падзяліліся назіраннямі прадстаўнікі прадпрыемства, сёння звычайны хлеб многіх сучасных пакупнікоў ужо не цікавіць, людзі чакаюць навінак, ці падбіраюць прадукты, звязаныя са здаровым ладам жыцця, таму і даводзіцца шукаць ідэі і спалучэнні смакаў.
У асартыменце ўжо ёсць хлеб з ільняным семем, морквай, марской капустай, часнаком, выраблены з фіялетавай пшаніцы.
На «Белагра» прэзентавалі нямала мясных вырабаў: ад далікатэсаў, зробленых па італьянскіх рэцэптах, да традыцыйных «бабуліных» каўбас. Адзін з мясакамбінатаў зрабіў стаўку на моду на прадукты «а-ля СССР» — на конкурс «Чэмпіён смаку» прапанаваў каўбасу «Савецкую». Яна падаецца ў рэтрацэлафане, такім, што быў на мясных прадуктах у часы Саюза. . На «Белагра» прадпрыемства прывезла і класічны сальцісон і тушонку па ДАСЦЕ. Тут не толькі адраджаюць прадукты з «мінулага» , але і эксперыментуюць. На выстаўцы былі прадстаўлены каўбасы з курагой і смакам клубніц.
Смак дзяцінства
Якая ж дэгустацыя без прысмакаў. У дадатак да традыцыйных ласункаў , знаёмых не аднаму пакаленню, вытворцы імкнуцца дагадзіць сучаснаму спакушанаму пакупніку, якога трэба пастаянна здзіўляць, лавіць на сучасныя трэнды, звязаныя са здаровым ладам жыцця. Таму на выстаўку
вытворцы прывезлі мармелад з насеннем чыа і экзатычнымі летнімі смакамі (маракуі, петахаі). А яшчэ — зефіры піраговыя — са смакам яблычнага штрудзеля, чарнічнага і лімоннага пірагоў.
З адсылкай да бабуліных рэцэптаў — сокі і варэнне. Прадукцыя робіцца з традыцыйнай сыравіны — лінейка варэння з дзікаросаў (маліны, чарніцы, журавіны, брусніцы) і вітамінаў з саду-агарода (яблыкі, гарбузы, морква, вішні). Беларускія вытворцы ўжо навучыліся рабіць навамодныя смузі, сокі (той жа бярозавік) без цукру, але і беларускія рэцэпты з вёсак сёння запатрабаваныя — так з’явіўся новы таматны сок з семкамі і тушаныя па-хатняму буякі. Класічныя сокі з морквы сёння дапаўняюцца новымі спалучэннямі — з малінамі, чарніцамі. Пра тое, што на напоі з традыцыйнай сыравіны ёсць асаблівы запыт, сведчаць шматлікія дыпломы вытворцаў, звязаныя з папярэднімі народнымі дэгустацыямі. Дзякуючы прапановам спажыўцоў з’яўляюцца новыя прадукты: сярод такіх — таматны сок «пікантны», дзе дадаецца перчык.
Камлімент жанчыне
На «Белагра» можна ўбачыць і прадукцыю, зробленую да Года жанчыны. Напрыклад, наборы печыва «Самыя лепшыя» — склад іх выбіраў жаночы калектыў прадпрыемства.
У якасці падарунка турысты часта выбіраюць шакалад, на ўпакоўцы якога — беларускія краявіды. На «Белагра» побач з такімі сувенірнымі прысмакамі — і набор міні-шакладак — «Шакаладны камплімент», звязаны з Годам жанчыны. Сваю знакамітую серыю, прысвечаную Палессю, вытворцы вырашылі падаць у незвычайнай упакоўцы — керамічнай бочачцы. Уласна і самі цукеркі адметнай формы, а для начыння бяруцца беларускія ягады, у тым ліку рабіна і журавіны.
Турысты вязуць з Беларусі і сыры. Ёсць што везці — беларускія вытворцы стварылі вельмі шырокую лінейку цвёрдых сыроў, эксперыментуюць з дабаўкамі — з ільняным семем, кменам, грэцкім арэхам.
Алена Дзядзюля
Фота БелТА
