Як адзначыў на сустрэчы з моладдзю намеснік Старшыні Савета Рэспублікі Ігар БРЫЛЕВІЧ, заканатворчасць — гэта справа не толькі юрыстаў і дзяржслужачых. «Законы рэгулююць усе сферы жыцця грамадства: адукацыю, працу, ахову здароўя, лічбавае асяроддзе, маладзёжную палітыку, культуру, мясцовае самакіраванне, — удакладніў ён. — І калі маладыя людзі, уступаючы ў самастойнае жыццё, разумеюць, як фарміруецца прававая норма, якія этапы праходзіць праект закона, якія існуюць прынцыпы прававога рэгулявання, яны лепш арыентуюцца ў дзяржаўных працэсах. Гэта, у сваю чаргу, садзейнічае росту прававой культуры, павагі да дзяржаўных інстытутаў і ўменню ацэньваць рашэнні не на ўзроўні эмоцый, а з пункту гледжання іх карысці, законнасці і грамадскага балансу».

«Работа над законамі патрабуе не толькі глыбокага разумення грамадскіх працэсаў, рознабаковых ведаў і практычных навыкаў, але і высокай культуры мыслення, імкнення прымаць збалансаваныя і абгрунтаваныя рашэнні, пачуцця веры, павагі да права як асновы стабільнасці і дабрабыту дзяржавы», — падкрэсліў сенатар.

У гэтым кантэксце Ігар Брылевіч адзначыў асаблівую значнасць такіх семінараў для маладых парламентарыяў. «Моладзь — гэта магутная крыніца новых ідэй, якія часта кладуцца ў аснову дзяржаўнага парадку дня», — акцэнтаваў ён увагу. У якасці прыкладу ён прывёў такія актуальныя кірункі, як лічбавізацыя, экалагічная адказнасць, развіццё валанцёрства, новыя фарматы адукацыі, маладзёжная занятасць, прафілактыка залежнасцяў, медыяпісьменнасць і бяспека ў інтэрнэце. Многія з маладзёжных ініцыятыў ужо прайшлі шлях ад ініцыятывы да нарматыўнага акта.

Па словах намесніка Старшыні Савета Рэспублікі, вельмі важным з’яўляецца разуменне моладдзю прынцыпаў работы прававой сістэмы і працэсу прыняцця законаў. «Якасць заканадаўчай работы непасрэдна звязана з якасцю жыцця людзей, — патлумачыў сенатар. — У заканатворчасці няма месца павярхоўнасці: тут цэняцца ясная думка, уменне бачыць інтарэсы розных бакоў і гатоўнасць шукаць узважаныя рашэнні. Гэтыя якасці фарміруюцца не за адзін дзень, і менавіта такія сустрэчы служаць эфектыўным інструментам для іх развіцця».

Паводле БелТА