Чацвёрты год у рамках фестывалю праводзіцца маладзёжны форум «Памяць. Выбар. Адказнасць», у якім бяруць удзел студэнты, маладыя выкладчыкі гісторыі і грамадскіх дысцыплін ВНУ і школ, магістранты і аспіранты. У цэнтры іх увагі — актуальныя пытанні гісторыі і сучаснай павесткі дня.
Шчырыя зносіны моладзі дзвюх краін з’яўляюцца гарантыяй таго, што ў саюзнага праекта — вялікая будучыня, і гэта гарантыя заснавана на падмурку агульных каштоўнасцяў, адзначыў Старшыня Палаты прадстаўнікоў Ігар СЕРГЯЕНКА:
— Любы чалавек будуе сваю будучыню, абапіраючыся на сямейныя паданні, вопыт, асаблівасці асяроддзя, у якім ён фарміруецца як асоба. А згуртаваць грамадства і даць дзяржаве неабходны запас трываласці ва ўмовах маштабнай геапалітычнай трансфармацыі дапамагаюць калектыўная памяць, традыцыйныя каштоўнасці і надзейныя маральныя арыенціры.
Ён таксама падкрэсліў, што, абараняючы праўду пра вайну, братэрскія народы абараняюць сваё права і права сваіх дзяцей жыць у міры і згодзе.
Ігар Сергяенка нагадаў пра вынікі работы міжнароднага форуму Саюзнай дзяржавы «Вялікая спадчына — агульнае будучае», які адбыўся ў чэрвені ў Брэсце. У ім узялі ўдзел прадстаўнікі 16 дзяржаў. Гэта сведчанне таго, што Беларусь і Расія ў сваіх памкненнях не адзіныя.
Падчас пленарнага пасяджэння, якое праходзіла ў Музеі Славы Магілёўшчыны, старшыня Камісіі Парламенцкага сходу Саюза Беларусі і Расіі па маладзёжнай палітыцы, спорце і турызме Арцём ТУРАЎ паведаміў, што распрацавана стратэгія маладзёжнай палітыкі:
— Гэта так званы план дзеянняў на найбліжэйшыя пяць гадоў, які адказвае на тыя выклікі, пагрозы, што стаяць перад краінамі і ў прыватнасці перад моладдзю. Вельмі важна рабіць усё магчымае для захавання гістарычнай памяці, нашай агульнай гісторыі.
Ініцыятыўныя, разумныя, таленавітыя юнакі і дзяўчаты Саюзнай дзяржавы гатовы прыняць на сябе адказнасць за будучыню сваіх краін, упэўнены малады выкладчык Брэсцкага дзяржаўнага ўніверсітэта імя А.С. Пушкіна Дзмітрый КУЛІКОВІЧ:
— У гэтым форуме я бяру ўдзел ужо ў трэці раз. Ён цікавы тым, што тут ёсць вельмі важны элемент, як кажуць цяпер, нетворкінгу, злучэння людзей, якія так ці інакш у адной сферы працуюць і звязаны з палітыкай, гісторыяй. Ёсць магчымасць абмяняцца ідэямі, увабраць нейкія новыя сэнсы, ідэі, зноў жа, падзяліцца меркаваннямі.
На думку старшыні Камісіі па ахове здароўя, фізічнай культуры, сямейнай і маладзёжнай палітыкі Палаты прадстаўнікоў, старшыні Камісіі па ахове здароўя Парламенцкага сходу Саюза Беларусі і Расіі Валерыя МАЛАШКІ, веданне гісторыі дае нам сёння сілы выжываць у той складанай геапалітычнай сітуацыі, у якой знаходзіцца ўвесь зямны шар:
— Толькі абапіраючыся на свае карані, лёс і досвед, мы і можам выжываць у свеце, які будуе свае ўзаемаадносіны на меркантыльных інтарэсах — на карысць пэўных слаёў насельніцтва.
А традыцыйны творчы складнік фестывалю «Моладзь — за Саюзную дзяржаву» дапамагае ацаніць яшчэ і агульную спадчыну, якую цяпер папулярызуе моладзь дзвюх краін.
Нэлі ЗІГУЛЯ
Фота аўтара і БелТА
