Праект створаны інфармацыйным агенцтвам «Мінская праўда» па ініцыятыве Міністэрства інфармацыі і прысвечаны 30-годдзю УНС, якое адзначаецца якраз у кастрычніку гэтага года. Сайт расказвае гісторыю УНС вуснамі дэлегатаў розных гадоў — праз іх пачуцці, успаміны і разважанні пра тое, як прымаліся рашэнні, што вызначылі жыццё краіны.
У аснове праекта — больш за 150 гісторый дэлегатаў з розных рэгіёнаў Беларусі.
Як адзначыў першы намеснік міністра інфармацыі Рэспублікі Беларусь Дзяніс ЕЗЕРСКІ, сайт «УНС у асобах» — «жывы летапіс Усебеларускага народнага сходу, дзе замест сухіх пратаколаў і афіцыйных фармулёвак гучаць галасы саміх дэлегатаў». Ён дадаў, што на платформе можна знайсці гісторыі дэлегатаў розных гадоў, якія расказваюць, як прымаліся рашэнні, і дзеляцца перажытымі пачуццямі. Гэты праект сабралі раённыя і абласныя рэдакцыі. «Журналісты на месцах знаходзілі дэлегатаў, запісвалі іх успаміны і збіралі фотаздымкі з сямейных архіваў», — расказаў Дзяніс Езерскі.
Намеснік генеральнага дырэктара інфармацыйнага агенцтва «Мінская праўда», стваральніца сайта Вольга СЕЛЯЗНЁВА акцэнтавала ўвагу на тым, што пры падрыхтоўцы матэрыялаў журналісты, якія працавалі над імі, стараліся захаваць аўтэнтыку, асаблівасці кожнага раёна, прадстаўленага героямі партала.
Намеснік начальніка Сакратарыята УНС Ігар ГАЛУБІЦКІ звярнуў увагу, што пакуль на сайце апублікавана 150 сюжэтаў, аднак, лічыць ён, у інтэрнэт-рэсурсу вялікі патэнцыял, паколькі колькасць удзельнікаў усіх УНС — больш за 10 тысяч. Ігар Галубіцкі адзначыў, што за 30 гадоў змяніліся пакаленні, але нязменным засталося адно: «Дэлегаты заўсёды неслі на сваіх плячах велізарную адказнасць за сучаснасць і будучыню нашай краіны».
Героі інтэрнэт-версіі «УНС у асобах» — гэта розныя людзі. Урачы, настаўнікі, аграрыі, ветэраны, кіраўнікі раёнаў і прадпрыемстваў. Людзі, якія жывуць побач з намі, і іх гісторыі — гэта частка агульнай гісторыі краіны.
Сярод герояў публікацый сайта — Ганна ПАШКЕВІЧ, дэлегат VІІ УНС, настаўнік матэматыкі Калодзішчанскай СШ № 2: «У кастрычніку мы адзначым 30-годдзе УНС — і мне ў лістападзе спаўняецца таксама 30, што сімвалічна для мяне як грамадзянкі Рэспублікі Беларусь, і для маіх бацькоў, якія памятаюць 1996 год. Таму, напэўна, 17-18 снежня падчас чарговага пасяджэння сходу для мяне будзе самы трапяткі момант. Памятаю, як падчас першага пасяджэння ў 2024-м, адчувалася адзінства ўсіх людзей з розных сфер, мы ўсе разумелі адказнасць, ускладзеную на нас, за нашу краіну».
Людмілу БАБОК, аператара машыннага даення ААТ «Шчомысліца», дваццаць гадоў таму выбралі дэлегатам ІІІ УНС. Яна ўзгадала, што ўдзел у такім важным форуме быў для яе хвалюючым. «Тады было ўсё вельмі ўзнёсла, нас добра сустракалі, мы абмяркоўвалі важныя кірункі развіцця краіны. Я сядзела, можна сказаць, вельмі блізка да Прэзідэнта. Павага да нас адчувалася, адназначна. З цеплынёй успамінаю гэты час», — расказала жанчына.
Гісторыі дэлегатаў — частка агульнай гісторыі кожнага беларуса. Незалежнасць Беларусі, стабільнасць, сацыяльная абарона, развіццё рэгіёнаў — усё гэта вынік рашэнняў, прынятых дэлегатамі розных гадоў. Сайт «УНС у асобах» будзе папаўняцца новымі гісторыямі, каб захаваць жывую памяць пра тых, хто будаваў нашу суверэнную Беларусь.
Надзея ЗУЕВА
