У аўторак беларуская сталіца стала цэнтрам прыцягнення прадпрымальнікаў, дзелавых супольнасцяў і бізнес-колаў. Тут адбыўся І Форум рэгіёнаў Беларусі і Кыргызстана. Гэта ўнікальная магчымасць устанавіць прамыя кантакты паміж прадстаўнікамі органаў улады, дзелавых колаў і профільных арганізацый дзвюх краін. Канкрэтным вынікам маштабнага форуму стала падпісанне шэрагу дакументаў, накіраваных на ўмацаванне супрацоўніцтва паміж рэгіёнамі дзвюх краін.
Як адзначыў намеснік Прэм’ер-міністра Беларусі Аляксандр Церахаў, прыярытэтнымі кірункамі супрацоўніцтва Беларусі і Кыргызстана павінны стаць сумесная вытворчасць і абмен тэхналогіямі, кааперацыя ў прамысловасці, сельскай гаспадарцы, перапрацоўцы сыравіны, будаўніцтве, камунальнай інфраструктуры і іншых сферах, якія маюць непасрэднае значэнне для ўстойлівага развіцця дзяржаў. «Перад намі стаіць задача вызначыць новыя пункты росту беларуска-кыргызскага ўзаемадзеяння. Неабходна актывізаваць прамыя кантакты паміж рэгіёнамі і забяспечыць рэгулярны абмен інфармацыяй аб свабодных вытворчых пляцоўках, інвестпрапановах і патрэбах прадпрыемстваў», — сказаў віцэ-прэм’ер, дадаўшы, што кожнаму рэгіёну варта сфарміраваць пералік сумесных праектаў, якія могуць быць запушчаны ў найбліжэйшай перспектыве. «Акрамя таго, важна стварыць эфектыўны механізм суправаджэння інвестара. Патэнцыйны партнёр павінен разумець, да каго звярнуцца, якія дакументы падрыхтаваць, якія меры падтрымкі даступныя і якія крокі неабходна прайсці для запуску праекта, — заўважыў ён. — Таксама трэба ўдзяліць асаблівую ўвагу падрыхтоўцы кадраў. Сучасная вытворчасць немагчыма без інжынераў, тэхнолагаў, спецыялістаў па сэрвісу, кіраўнікоў і працоўных высокай кваліфікацыі. Неабходна наладзіць эфектыўнае ўзаемадзеянне па пытаннях падрыхтоўкі кадраў і павышэння кваліфікацыі спецыялістаў, а таксама мадэрнізацыі інжынерна-тэхнічнай адукацыі».
Беларускі бок зацікаўлены ў пашырэнні кантактаў паміж прадпрыемствамі, рэгіёнамі і дзелавымі супольнасцямі. «Разам мы здольныя ствараць праекты, якія будуць мець не толькі камерцыйную, але і доўгатэрміновую грамадскую каштоўнасць для народаў нашых краін», — рэзюмаваў Аляксандр Церахаў.
У сваю чаргу намеснік старшыні Кабінета Міністраў Кыргызстана Эрліст Акунбекаў заявіў, што аб’ём узаемнага тавараабароту паміж Беларуссю і Кыргызстанам павялічыўся амаль у чатыры разы за 2021—2025Tгады. «Кыргызскі бок разглядае міжрэгіянальнае супрацоўніцтва як важны кірунак у двухбаковым узаемадзеянні, патэнцыял якога яшчэ трэба будзе раскрыць у поўнай меры. Наша агульная задача — напоўніць яго канкрэтнымі праектамі, якія адпавядаюць прыярытэтам дарожнай карты па развіцці гандлёва-эканамічнага супрацоўніцтва да 2030 года», — падкрэсліў Эрліст Акунбекаў.
Паводле яго слоў, развіццё рэгіянальных сувязяў абапіраецца на станоўчую дынаміку ўзаемнага гандлю: «Гэтыя вынікі сведчаць аб росце зацікаўленасці прадпрыемстваў дзвюх краін у супрацоўніцтве. Дадатковыя магчымасці для сумеснай працы стварае развіццё эканомікі Кыргызстана».
***
Вынікам маштабнага форуму стала падпісанне шэрагу пагадненняў. Так, заключана пагадненне паміж Магілёўскім аблвыканкамам і Апаратам паўнамоцнага прадстаўніка Прэзідэнта Кыргызскай Рэспублікі ў Нарынскай вобласці аб супрацоўніцтве ў гандлёва-эканамічнай, навукова-тэхнічнай і сацыяльнай сферах.
Акрамя таго, бакі падпісалі мемарандум аб узаемаразуменні паміж Брэсцкім аблвыканкамам і Апаратам паўнамоцнага прадстаўніка Прэзідэнта Кыргызскай Рэспублікі ў Джалал-Абадскай вобласці.
Падпісаны таксама план мерапрыемстваў на 2027–2028 гады па рэалізацыі пагаднення аб супрацоўніцтве паміж Брэсцкай і Баткенскай вобласцю, план мерапрыемстваў (дарожная карта) развіцця супрацоўніцтва паміж Віцебскім аблвыканкамам і апаратам паўнамоцнага прадстаўніка Прэзідэнта Кыргызскай Рэспублікі ў Ісык-Кульскай вобласці ў гандлёва-эканамічнай, навукова-тэхнічнай, культурнай і гуманітарнай сферах на 2027–2029 гады, план мерапрыемстваў па пашырэнні гандлёва-эканамічнага, навукова-тэхнічнага і культурнага супрацоўніцтва паміж мэрыяй горада Бішкек і Мінскім гарвыканкамам на 2027–2028 гады.
Заключаны мемарандум аб устанаўленні пабрацімскіх адносін паміж Гомелем і горадам Ош. Падпісана дарожная карта па развіцці супрацоўніцтва Магілёва і горада Нарына ў эканоміцы, гандлі, культуры, адукацыі, турызме на 2027–2029 гады.
Арганізатарамі форуму выступаюць Нацыянальны Цэнтр падтрымкі экспарту Беларусі і Міністэрства эканомікі і камерцыі Кыргызстана.
Паводле БелТА