З кожным днём беларуская сталіца ўсё больш і больш мяняецца да Новага года. Сёлета Мінск будуць упрыгожваць цэлых 28 ёлак, кожная са сваім характарам і гісторыяй.

Так, у самым сэрцы горада ўжо заканчваецца апошняя падрыхтоўка да сустрэчы з галоўнай ёлкай краіны. Вось-вось яна расхіне свае зіготкія галіны для ўсіх мінчан і гасцей горада. Гэта велічэзная 30-метровая госця — сапраўдны інжынерны цуд: яе магутны каркас важыць больш за 10 тон, а кожная «лапка» трымаецца на бетонным поясе вагой 3 тоны. 

Не адстае і пляцоўка каля Палаца спорту, дзе 18-метровую ёлку ўпрыгожвае вытанчаны дэкор з сімвалам надыходзячага года — Канём. А на плошчы Незалежнасці ўжо зусім хутка запаліцца яркая ілюмінацыя, у цэнтры якой — зіхатлівая арка і ўтульныя казачныя домікі, якія быццам прыйшлі з зімовай легенды.

Чакаць засталося нядоўга: хутка ўсё заіскрыцца, зазіхаціць і заспявае ціхай мелодыяй свята. Людзі чакаюць цуд — і беларуская сталіца абавязкова ім яго падорыць.

Лізавета ГОЛАД 

Фота аўтара