У Мінскім дзяржаўным лінгвістычным універсітэце адбылося Свята нацыянальнага жаночага касцюма, прымеркаванае да Дня жанчын. З мэтай папулярызацыі беларускай культуры сярод замежных грамадзян у якасці ганаровых гасцей на мерапрыемства запрошаны кіраўнікі замежных дыпламатычных прадстаўніцтваў і іх жонкі з Венесуэлы, Ірана, Палесціны, В’етнама, Азербайджана і іншых краін, акрэдытаваных у Рэспубліцы Беларусь.

— Наш універсітэт — гэта тэрыторыя міжкультурных адносін. Па-першае, у нас навучаюцца студэнты з больш 100 краін свету. Па-другое, мы з’яўляемся ВНУ, якая рыхтуе спецыялістаў у сферы міжкультурнай камунікацыі. Гэтую прафесію сёння атрымліваюць больш за 700 маладых людзей. Па-трэцяе, цесна супрацоўнічаем з нашымі пасольствамі, разам адзначаем міжнародныя дні моў, — расказала рэктар МДЛУ Наталля Лапцева. — У нас нарадзілася ідэя зірнуць на культуру глыбей, прааналізаваўшы нацыянальныя жаночыя ўборы. І нашымі памочнікамі сталі жонкі паслоў. Мы рады, што шмат хто адгукнуўся і падзяліў з намі такое свята.

Праграма свята ўключыла ў сябе работу шматлікіх воркшопаў. У творчай зоне «Алея майстроў МДЛУ» студэнты, якія захапляюцца рукадзеллем, у рэжыме «тут і зараз» стваралі традыцыйныя элементы, якімі здаўна ўпрыгожвалі беларускія ўборы.

У рамках інтэрактыўнага майстар-класа «Канцэпты Беларусі і краін свету» былі прадстаўлены спрадвечныя беларускія сімвалы, а ганаровыя госці азнаёміліся з імі і графічна адлюстравалі сімвалы іншых культур. Акрамя таго, на мерапрыемстве адбылося адкрыццё выстаўкі-прэзентацыі кніг, прысвечаных беларускаму нацыянальнаму касцюму, з якіх можна даведацца пра сапраўдную інфармацыю аб традыцыйным народным строі. Завяршылася свята канцэртнай праграмай студэнтаў універсітэта з танцавальнымі і музычнымі нумарамі, кульмінацыяй якой стала дэфіле ў традыцыйных беларускіх жаночых касцюмах.

Віктар ДРАЧОЎ

Фота аўтара