10 лістапада ў Доме моладзі ў г. Мінску пачаў сваю работу маладзёжны энергатон «Энергаэфектыўнасць-2025», прымеркаваны да Міжнароднага дня энергазберажэння.
На працягу двух дзён студэнты Беларускага нацыянальнага тэхнічнага ўніверсітэта, Беларускага дзяржаўнага аграрнага тэхнічнага ўніверсітэта, Беларускага дзяржаўнага тэхналагічнага ўніверсітэта, Міжнароднага дзяржаўнага экалагічнага інстытута імя А. Д. Сахарава Беларускага дзяржаўнага ўніверсітэта, Мінскага дзяржаўнага энергетычнага каледжа будуць працаваць над стварэннем прататыпаў вэб-праграм, накіраваных на павышэнне ўцягнутасці насельніцтва ў энергазберагальныя практыкі і падтрымку рэалізацыі дзяржаўнай праграмы ў сферы энергазберажэння.
Тэмы энергатона: «Разумны дом» — інавацыйныя падыходы да павышэння энергаэфектыўнасці ў побыце; «Электраацяпленне ў сельскіх населеных пунктах і малых гарадах» — сучасныя рашэнні для ўстойлівага развіцця рэгіёнаў.
У першы дзень удзельнікі пазнаёмяцца з тэмай мерапрыемства, сфарміруюць каманды і прыступяць да распрацоўкі рашэнняў, выкарыстоўваючы метады праектавання карыстальніцкага шляху і каманднага брэйнстормінгу. Другі дзень будзе прысвечаны прэзентацыі прататыпаў вэб-праграм і іх ацэнцы экспертным саветам.
Выступленні каманд будуць ацэнены па наступных крытэрыях: разуменне пытанняў энергазберажэння і энергаэфектыўнасці; арыентаванасць прапанаванага рашэння на патрэбы чалавека і грамадзяніна; інавацыйнасць прапанаванага рашэння; рэалізаванасць прапанаванага рашэння на практыцы; устойлівасць вынікаў прапанаванага рашэння; камандная работа пры выпрацоўцы рашэння.
Па выніках мерапрыемства ўдзельнікі атрымаюць рэкамендацыі экспертаў для далейшай дапрацоўкі і магчымага прасоўвання прапанаваных лічбавых рашэнняў.
У якасці экспертаў і мадэратараў выступаюць спецыялісты з праграмы развіцця ААН (ПРААН) у Беларусі, ДВА «Белэнерга», РУП «БЕЛТЭІ» і Дэпартамента па энергаэфектыўнасці Дзяржаўнага камітэта па стандартызацыі Рэспублікі Беларусь.
Правядзенне энергатона абумоўлена ўзрастаючай значнасцю энергаэфектыўнасці для ўстойлівага развіцця Беларусі. Маладыя людзі змогуць атрымаць практычныя навыкі вырашэння праблем у галіне энергаэфектыўнасці і распрацоўкі лічбавых інавацыйных рашэнняў.
Віктар Іванчыкаў
