У сераду, 2 верасня, надвор’е ў Беларусі будзе вызначаць тылавая частка цыклону «Тэса». Беларусаў чакаюць прахалода, кароткачасовыя дажджы і лакальныя навальніцы, з-за якіх па ўсёй краіне аб’яўлены жоўты ўзровень небяспекі. Пры гэтым зацяжных ападкаў сіноптыкі не абяцаюць — дажджы будуць кароткімі і «мазаічнымі».
Паводле інфармацыі Белгідрамета, 2 верасня на большай частцы тэрыторыі Беларусі пройдуць непрацяглыя дажджы. Месцамі магчымы навальніцы, таму сіноптыкі аб’явілі па краіне жоўты ўзровень небяспекі.
Такія ападкі спецыялісты называюць «папкорнавымі»: яны з’яўляюцца лакальна, хутка пачынаюцца і гэтак жа хутка заканчваюцца. Дождж можа прайсці ў адным раёне, а літаральна за некалькі кіламетраў ад яго ападкаў ужо не будзе.
З захаду на надвор’е ў рэгіёне таксама будзе спрабаваць паўплываць антыцыклон «Томас», аднак істотных зменаў для Беларусі ён не прынясе.
Вецер на працягу дня будзе заходнім, умераным, месцамі з парывамі. Дзённая тэмпература паветра складзе ад +17 да +23 градусаў.
