Тварожная пасха — страва, якая гатуецца ў гонар светлага свята Вялікадня. Пасля доўгага Вялікага посту праваслаўныя хрысціяне імкнуцца накрыць стол найбольш шчодрымі і сытнымі пачастункамі. У наш час, калі вакол пануе багацце самых розных страў і прадуктаў, пасха ніколькі не страціла папулярнасць, яе гатуюць нават тыя, хто не прытрымліваўся посту і любяць яе за традыцыйны, асаблівы смак.

Мы сабралі некаторыя карысныя рэкамендацыі, каб усё атрымалася на найвышэйшым узроўні.

1. Аснова любой пасхі — гэта тварог. І ён павінен быць з добрай тлустасцю. Нават калі вы ў іншы час абмяжоўваеце сябе ў тлушчах, для пасхі выбірайце тлустасць не менш за 5%. Тварог не павінен быць занадта вільготным і залішне сухім. Выбірайце толькі натуральны тварог, без заменнікаў малочнага тлушчу. Праверыць такое на рынках, дзе тварог прадаецца на вагу, складана. Лепш выбіраць у пакаваннях у правераных вытворцаў.

2. Выдаткуйце крыху часу, каб працерці тварог праз сіта. Сам працэс нагадае вам тыя традыцыі, якіх прытрымліваліся яшчэ нашы бабулі. Ручная праца надае асаблівы змест прадукту. У тварагу не павінна быць сухіх макулінак, каб ён ператварыўся ў далікатную тварожную масу. (Безумоўна, тыя гаспадыні, у каго ёсць блендар, могуць скарыстацца гэтай прыладай для атрымання аднастайнай масы.)

3. Трымайцеся рэцэпта і не імкніцеся зменшыць тлустасць. Вяршкі, смятана, сметанковае масла — усе гэтыя прадукты — такая ж важная аснова смачнай пасхі, без якой не атрымаецца яе прыгатаваць. Калі тлустых элементаў будзе недастаткова, пасха будзе крышыцца, і ў вас не атрымаецца падзяліць яе на акуратныя кавалачкі.

4. Сырыя інгрэдыенты павінны прайсці цеплавую апрацоўку. Калі ў абраным вамі рэцэпце прысутнічаюць свежыя яйкі, то напэўна гэта пасха, якая патрабуе выпечкі. Не прапускайце гэты этап, бо ў яйках могуць утрымлівацца небяспечныя мікробы і бактэрыі.

5. У класічнага рэцэпта пасхі, якую не трэба пячы, ёсць абавязковая ўмова: выкласці атрыманую масу ў форму на тканіну або марлю і паставіць пад прэс у халоднае месца. Лішняя вадкасць абавязкова павінна сцячы. Таму пасху гатуюць загадзя, каб было ў запасе не менш за 8 гадзін. Не прапускайце гэты момант, інакш вам не ўдасца атрымаць патрэбную прыгожую форму.

Тварожная пасха з зефірам

стане сапраўдным упрыгожаннем святочнага стала. Гэты пачастунак не толькі парадуе смакам, але і падорыць прастору для творчасці: яркая мармеладная кіслінка, кветкі з зефіру, рознакаляровыя пласты ператвораць страву ў маленькі шэдэўр.

Інгрэдыенты

Тварог 5% 400 г, масла сметанковае 82,5% 150 г, мармелад жэлейны са смакам чорных парэчак 100 г, ёгурт фруктовы «Клубніцы» 100 мл, зефір са смакам клубніцы з вяршкамі 3 шт., цукар-пясок 150 г, ванільны цукар 1 ч. л.

Прыгатаванне

1 Тварог здрабніць блендарам да аднастайнасці.
2 Масла пакаёвай тэмпературы ўзбіць з цукрам і ванільным цукрам да пышнасці.
3 Злучыць тварог з маслам, старанна перамяшаць.
4 Падзяліць тварожную масу на тры часткі: ½, ¼ і ¼.

• Верхні пласт: змяшаць ½ масы з нарэзаным зефірам і некалькімі кавалачкамі мармеладу, пакінуўшы адну порцыю зефіру для ўпрыгожвання.

• Сярэдні пласт: дадаць у ¼ масы клубнічны ёгурт.

• Ніжні пласт: змяшаць ¼ масы з нарэзаным парэчкавым мармеладам, перабітым блендарам.

5 Заслаць форму (пасачніцу ці глыбокую міску) марляй ці харчовай плёнкай.
6 Выкласці пласты па парадку: асноўны белы пласт, клубнічны, парэчкавы. Кожны пласт акуратна ўтрамбаваць лыжкай.
7 Накрыць форму плёнкай, паставіць пад гнёт (напрыклад, слоічак з вадой) і прыбраць у халадзільнік на 8–12 гадзін (лепш на ноч).
8 Акуратна перакуліць пасху на талерку, зняць марлю/плёнку.
9 Упрыгожыць кветкамі з зефіру, глазурай, пасыпкай.

Лімонная пасха з макавым начыннем

Вельмі незвычайная і ўрачыстая

Інгрэдыенты

Тварог 600 г, масла сметанковае 100 г, смятана 100 г, мак 100 г, цукровы пясок 100 г, цэдра ад паловы лімона, куркума 0,5 ч. л. (можна замяніць на 1–2 кроплі жоўтага фарбавальніку).

Прыгатаванне

• Сметанковае масла загадзя дастаём з халадзільніка, каб стала мяккім. Праціраем тварог праз сіта, каб ён стаў лёгкім і без камячкоў. Можна скарыстацца пагружным блендарам. Дадаём да тварагу смятану, цукар і сметанковае масла. Усё змешваем да аднастайнасці.

• Перакладаем частку тварагу ў іншы посуд. У адну частку тварагу дадаём мак, у іншую — цэдру свежага лімона і куркуму, старанна змешваем.

• Пасачніцу знутры выкладваем марляй або паркалёвай/ільняной тканінай і размяркоўваем па сценках лімонную масу роўным пластом. Невялікую частку пакідаем для фармавання асновы нашай пасхі.

• Цэнтр пасхі шчыльна запаўняем тварожна-макавым начыннем, закрываем аснову пакінутай лімоннай масай, разраўноўваем.

• Зверху закрываем бакамі марлі, ставім невялікі груз і адпраўляем на ноч у халадзільнік, каб сцякла ўся сыроватка, і пасха стала шчыльнай. Сыроватку, якую аддзялілася, перыядычна зліваем.

• Раніцай акуратна дастаём пасху з формачкі, упрыгожваем, і можна атрымліваць асалоду ад найсмачнейшага дэсерту!

Шакаладная тварожная пасха

У якасці яшчэ аднаго незвычайнага варыянту прапануем дадаць какаву да велікоднай пасхі. Такі варыянт асабліва падабаецца дзецям і тым, хто любіць ласункі з насычаным смакам.

Інгрэдыенты

500 г тварагу; 80 г сметанковага масла; 80 г цукру ці мёду; 2 ст. л. какавы; 100 мл вяршкоў; крыху цёмнага шакаладу.

Прыгатаванне

Тварог змяшаць з маслам, вяршкамі і цукрам. Дадаць какаву і растоплены шакалад. Узбіць да аднастайнасці, выкласці ў форму і прыбраць у халадзільнік на 10–12 гадзін.

Як бачым, рэцэптаў прыгатавання пасхі дастаткова шмат. Можна кожны год знаходзіць нешта новенькае. І калі вы засвоіце асноўныя правілы, прыгатаванне гэтай святочнай стравы не складзе асаблівай цяжкасці.