Да манумента «Няскораны чалавек» дэлегацыя ўсклала пунсовыя ружы. Каля дарожак, якія вядуць да помніка і Вечнага агню, са сцягамі Беларусі і Міністэрства ўнутраных спраў у знак смутку схілілі галовы курсанты Цэнтра падрыхтоўкі кадраў МУС. Двое ліцэістаў замерлі ў ганаровай варце — як напамін аб абавязку перад памяццю спаленых жыхароў Хатыні. Кветкі ад вартавых парадку розных пакаленняў таксама ляглі да Вечнага агню. У мітынгу-рэквіеме прынялі ўдзел дэлегацыі супрацоўнікаў цэнтральнага апарата і цэнтральнага падпарадкавання МУС, дэпартаментаў выканання пакаранняў і аховы, ведамасных устаноў адукацыі, ГУУС Мінгарвыканкама і УУС Мінскай вобласці.

Наступным прыпынкам для ўдзельнікаў аўтамотапрабегу, сярод якіх — дэлегацыі супрацоўнікаў органаў унутраных спраў, вайскоўцаў унутраных войскаў і іх сем’яў, стаў мемарыяльны комплекс «Курган Славы» ў Гродне. Тут разгарнуліся стылізаваныя ваенныя лакацыі — прывал, палявая пошта, рэйхстаг. Калону сустракалі супрацоўнікі органаў унутраных спраў і вайскоўцы ўнутраных войскаў Гродзеншчыны, выхаванцы ваенна-патрыятычных клубаў, жыхары і госці горада.

«Курган Славы» — знакавае месца. Зямля для яго ўзвядзення была ўзятая з месцаў пахавання Герояў Савецкага Саюза на тэрыторыі Гродзеншчыны, а таксама з брацкіх магіл кожнага раёна вобласці. У памяць аб тых, хто аддаў жыццё за свабоду і незалежнасць Айчыны, гарыць Вечны агонь.

«На працягу двух дзён, аддаючы даніну глыбокай павагі воінам, якія гераічна змагаліся з нямецка-фашысцкімі захопнікамі, мы наведалі святыя для кожнага з нас месцы, — адзначыў намеснік міністра ўнутраных спраў Дзмітрый Карзюк. — Беларускі народ, які страціў у той страшнай вайне кожнага трэцяга, як ніхто іншы ўсведамляе кошт міру і найвышэй усяго ставіць волю і незалежнасць сваёй Айчыны. Свет не ведае прыкладаў такога масавага супраціўлення, які быў аказаны ворагу на беларускай зямлі. Вытокі Перамогі складаліся ў крэпасці духу і адзінстве людзей, у іх сапраўдным патрыятызме».

Намеснік міністра канстатаваў, што разам з усім народам гераічныя старонкі ў гісторыю вайны ўпісалі і міліцыянеры. На перадавой і ў падполлі яны з добрай якасцю выконвалі самыя складаныя задачы. Ужо пасля вызвалення акупаваных тэрыторый супрацоўнікі вялі барацьбу з бандытызмам, злачыннасцю і бездагляднасцю. Многія загінулі, выконваючы службовы абавязак, не дачакаўшыся Перамогі.

«Праходзяць дзесяцігоддзі, змяняюцца пакаленні, але Вялікая Перамога як сімвал нацыянальнага гонару, воінскай славы і доблесці нашага народа застаецца ў нашых сэрцах», — рэзюмаваў Дзмітрый Карзюк.

Фінішуе двухдзённы аўтамотапрабег «На Варце Памяці Вялікага Подзвігу» ў Брэсце. Маштабнае мерапрыемства запланавана ў Брэсцкай крэпасці. Завершыцца акцыя МУС мітынгам-рэквіемам, канцэртам і святочным салютам!

Вераніка КАНЮТА

Фота прэс-службы МУС