Законапраект прадугледжвае комплексную карэкціроўку профільных законаў (уключаючы законы аб аўтарскім праве, таварных знаках, патэнтах на вынаходствы, прамысловыя ўзоры і геаграфічныя ўказанні). Галоўная мэта навацый — прывядзенне заканадаўства ў адпаведнасць з Грамадзянскім кодэксам і Кодэксам грамадзянскага судаводства Рэспублікі Беларусь, а таксама стварэнне максімальна празрыстых умоў для абароны нацыянальнага інтэлектуальнага прадукту.

З асноўным дакладам па праекце закона выступіў старшыня Дзяржаўнага камітэта па навуцы і тэхналогіях Дзяніс Каржыцкі. Ён прапанаваў скараціць тэрміны публікацыі звестак аб выдачы патэнтаў з 3 месяцаў да 20 рабочых дзён, зменшыць пералік дакументаў, якія падаюцца заяўнікам.

«Пашыраецца пералік мерапрыемстваў, на якіх можна выкарыстоўваць музычны твор без згоды аўтара, але з выплатай яму ўзнагароджання. Акрамя гэтага, прадугледжана магчымасць свабоднага выкарыстання музычных твораў пры стварэнні тэлеперадач для абавязковага агульнадаступнага пакета тэлепраграм з абавязковай выплатай узнагароды праваўладальнікам», — падкрэсліў старшыня ДКНТ.

Таксама законапраект удакладняе парадак выплат аўтарам узнагароджанняў за выкарыстанне службовых твораў, вынаходак і сакрэтаў вытворчасці, рэгулюе парадак рэгістрацыі дагавораў аб залогу выключнага права. Асобная ўвага была ўдзелена абароне правоў аўтараў у медыясферы. Законапраектам устанаўліваецца дакладны тэрмін дзеяння выключнага права на творы навукі, літаратуры і мастацтва — на працягу жыцця аўтара і 70 гадоў пасля яго смерці.

Старшыня Пастаяннай камісіі Савета Рэспублікі па адукацыі, навуцы, культуры і сацыяльным развіцці Наталля Паўлючэнка адзначыла, што праект закона накіраваны на комплекснае рэгуляванне пытанняў прававой аховы аб’ектаў інтэлектуальнай уласнасці, што наўпрост звязана з забеспячэннем тэхналагічнага суверэнітэту і доўгатэрміновым устойлівым развіццём нашай краіны.

У ходзе пасяджэння члены Экспертнага савета дэталёва абмеркавалі асноўныя змяненні, сярод якіх — аптымізацыя адміністрацыйных працэдур, якія ажыццяўляюцца Нацыянальным цэнтрам інтэлектуальнай уласнасці; дакладнае ўрэгуляванне парадку рэгістрацыі дагавораў аб залогу выключнага права; удакладненне парадку выплат аўтарам узнагароджанняў за выкарыстанне службовых твораў, вынаходак і сакрэтаў вытворчасці.

Па выніках абмеркавання члены Экспертнага савета падтрымалі праект закона.

Паводле прэс-службы Савета Рэспублікі
Фота Савета Рэспублікі